دەنساۋلىق ساقتاۋ ءمينيسترى ومبىلاپ قار كەشكەن اقتوبەلىك فەلدشەرلەرگە العىسىن ءبىلدىردى

اقتوبە. KAZINFORM - ەلىمىزدىڭ جاڭا تاعايىنالعان دەنساۋلىق ساقتاۋ ءمينيسترى اقمارال ءالنازاروۆا ومبى قاردا شاقىرتۋعا بارعان فەلدشەرلەردىڭ ەڭبەگىن باعالاپ، العىس ايتتى.

اقتوبە وبلىسى حرومتاۋ اۋدانىندا جۇرەگى سىر بەرگەن ناۋقاسقا بارعان فەلدشەرلەردىڭ ەڭبەگىن ءمينيستردىڭ ءوزى باعالادى. سول كۇنى جەدەل جاردەم بريگاداسىنىڭ كولىگى قار باسقان كوشەگە كىرە الماي، ءۇش مامان جارتى جولدا جاياۋ شىققان. بوراندى كۇنى ومبىلاپ، ۇزاق جۇرۋگە تۋرا كەلگەن. ولاردىڭ بۇل ەڭبەگى ەلەندى.

- كەز كەلگەن اۋا رايىندا، اياز بەن بوراندا، جول جوق جەردە جەدەل جاردەم بريگادالارى توتەنشە جاعدايلارعا قاراماستان ادامداردىڭ ءومىرىن ساقتاپ قالۋ قاجەت ميلليونداعان شاقىرتۋعا قىزمەت كورسەتەدى. وسىنداي باتىرلاردىڭ قاتارىندا - حرومتاۋ اۋدانىنىڭ جەدەل جاردەم فەلدشەرلەرى قۇدياروۆ باۋىرجان سۇلتانحان ۇلى، تىلەۋ قايرات بەرىك ۇلى، رىسباي سايا ىبىراي قىزى بار. ولار ومبى قارعا قاراماستان جۇرەك ۇستاماسىمەن اۋىراتىن ناۋقاسقا جەتىپ، وزدەرىنىڭ اسىل كاسىبىنە ادالدىقتارى مەن كۇش-جىگەرلەرىن تانىتتى. دارىگەرلەردىڭ ايتۋىنشا، سول جەردە كارديوگرامما جاسالىپ، ۇسىنىمدار بەرىلدى، ءساتىن سالعاندا پاتسيەنت ەمدەۋگە جاتقىزۋدى قاجەت ەتپەدى. دەنساۋلىق ساقتاۋ مينيسترلىگى حرومتاۋ اۋدانىنىڭ جەدەل جاردەم بريگاداسى فەلدشەرلەرىنىڭ قاجىرلى ەڭبەگىن اتاپ وتەدى. ءارتۇرلى قيىندىقتاردى جەڭە وتىرىپ، ناۋقاستاردىڭ ءومىرىن ساقتاپ قالاتىن بارلىق مەديتسينا قىزمەتكەرلەرىنە العىسىمىزدى بىلدىرەمىز، - دەپ جازدى دەنساۋلىق ساقتاۋ ءمينيسترى اقمارال ءالنازاروۆا الەۋمەتتىك جەلىدەگى پاراقشاسىندا.

وسىعان دەيىن اقتوبە وبلىسى حرومتاۋ اۋدانىندا جەدەل جاردەم قىزمەتكەرلەرى شاقىرتۋعا جارتى جولدان جاياۋ بارعانى تۋرالى ماتەريال جاريالاعان ەدىك.