دجو بايدەن ازەربايجان پرەزيدەنتىنە جىل سوڭىنا دەيىن ءبىتىم شارتىن جاساسۋعا شاقىرعان حات جولدادى

استانا. KAZINFORM - بۇل تۋرالى ازەربايجان رەسپۋبليكاسى پرەزيدەنتىنىڭ رەسمي سايتىندا ايتىلعان، دەپ حابارلايدى Kazinform-نىڭ مەنشىكتى ءتىلشىسى.

«قۇرمەتتى پرەزيدەنت مىرزا، مەن ازەربايجان مەن ارمەنيانىڭ ەكى ەل اراسىنداعى قارىم-قاتىناستى قالىپقا كەلتىرۋگە قىزمەت ەتەتىن ءبىتىم شارتىن جاساسۋ جولىنداعى جەتىستىكتەرىنە قۋانىشتىمىن. مەن ا ق ش-تىڭ ازەربايجان مەن ارمەنيا اراسىنداعى عاسىرلار بويى جالعاسىپ كەلە جاتقان قاقتىعىستى اقىرىندا توقتاتاتىن مىعىم جانە لايىقتى بەيبىتشىلىككە قول جەتكىزۋدى قولداۋعا دايىن ەكەنىنە سەندىرگىم كەلەدى. ءبىتىم شارتى ازەربايجاننىڭ ەگەمەندىگى مەن اۋماقتىق تۇتاستىعىن قامتاماسىز ەتۋمەن قاتار، بۇكىل ايماقتى تۇرلەندىرىپ، ەۋروپا مەن ورتالىق ازيا اراسىنداعى ساۋدانى، ينۆەستيتسيانى جانە بايلانىستاردى ارتتىرۋعا مۇمكىندىك بەرەدى. COP29 حالىقارالىق كونفەرەنسياسى كەزىندە الەمنىڭ نازارى باكۋگە اۋىپ جاتقاندا، سىزدە حالىقارالىق قاۋىمداستىق الدىندا بەيبىتشىلىككە دەگەن ادالدىعىڭىزدى كورسەتۋدىڭ تەڭدەسسىز مۇمكىندىگى بار. مەن ءسىزدى كەلىسىمگە قول قويۋدى وسى جىلى اياقتاۋعا شاقىرامىن»، - دەلىنگەن ا ق ش پرەزيدەنتى دجو بايدەننىڭ ازەربايجاندىق ارىپتەسى اليەۆكە جولداعان حاتىندا.

سول كۇنى پرەزيدەنت يلحام اليەۆ ا ق ش پرەزيدەنتىنىڭ ارنايى كومەكشىسى جانە ۇلتتىق قاۋىپسىزدىك كەڭەسىنىڭ ەۋروپا ىستەرى جونىندەگى اعا ديرەكتورى مايكل كارپەنتەردى قابىلدادى.

كەزدەسۋ بارىسىندا مەملەكەت باسشىسى ازەربايجان ارمەنيامەن ءبىتىم شارتىنىڭ باستاماشىسى ەكەنىن جانە ايماقتىق بەيبىتشىلىك كۇن ءتارتىبىن قولدايتىنىن اتاپ ءوتتى. ءوز كەزەگىندە ا ق ش پرەزيدەنتىنىڭ ارنايى كومەكشىسى ۆاشينگتوننىڭ ءبىتىم شارتىنا ەرتەرەك قول قويۋدى قولدايتىنىن مالىمدەپ، قازىرگى جاعدايدا بۇل ءۇشىن تاريحي مۇمكىندىكتەر بار ەكەنىن اتاپ ءوتتى.

قىركۇيەك ايىندا ا ق ش مەملەكەتتىك حاتشىسى ەنتوني بلينكەن ازەربايجان پرەزيدەنتىمەن تەلەفون ارقىلى سويلەسىپ، ا ق ش- تىڭ ايماقتا تۇراقتى بەيبىتشىلىككە قول جەتكىزۋ ءۇشىن كۇش- جىگەرىن جۇمسايتىنىنا سەندىردى جانە 30-تامىزدا مەملەكەتتىك شەكارانى مەجەلەۋ جونىندەگى كوميسسيالاردىڭ بىرلەسكەن قىزمەتىنە وڭ باعاسىن بەردى.

بۇرىن حابارلانعانداي، مەملەكەت باسشىسى قاسىم-جومارت توقايەۆ يلحام اليەۆپەن تەلەفون ارقىلى سويلەسۋ بارىسىندا ازەربايجان مەن ارمەنيانىڭ بەيبىت كەلىسىمگە كەلۋى ءۇشىن قازاقستان تاراپىنىڭ الداعى ۋاقىتتا دا الماتى الاڭىن كەلىسسوزگە ۇسىنۋعا دايىن ەكەنىن راستادى.

اۆتور

زارينا تۋعانبايەۆا