ءۇيىرلى شەگىرتكەمەن كۇرەسكە بيۋدجەتتەن 8,1 ميلليارد تەڭگە قاراجات بولىنەدى
استانا. KAZINFORM - بيىل ەلىمىزدىڭ ءبىرقاتار ءوڭىرىن شەگىرتكەلەر شابۋىلداپ، ەگىستىك القاپقا قاۋىپ ءتوندىرىپ وتىر. ق ر اۋىل شارۋاشىلىعى مينيسترلىگى ازىرگە شىعىننىڭ جوق ەكەنىنە سەندىرۋدە. بەلگىلى بولعانداي، قازاقستان اۋماعىندا ءۇيىرلى (ازيالىق شەگىرتكە، يتالياندىق پرۋس جانە ماروككالىق شەگىرتكە) جانە ساياق شەگىرتكە تارالعان. ءبىر عانا ساياق شەگىرتكەنىڭ شامامەن 270-تەن استام ءتۇرى بار ەكەن.
ءۇيىرلى شەگىرتكەنىڭ جاپپاي كوبەيۋى اۋىل شارۋاشىلىعى جەرلەرى مەن ەگىستىكتەرىنە ۇلكەن قاۋىپ ءتوندىرىپ وتىر. وسىعان بايلانىستى ءۇيىرلى شەگىرتكەگە قارسى كۇرەس شارالارىن ۇيىمداستىرۋدى اۋىل شارۋاشىلىعى مينيسترلىگى رەسپۋبليكالىق بيۋدجەت قاراجاتىنان پەستيتسيدتەردى ساتىپ الۋ، ساقتاۋ، تاسىمالداۋ جانە قولدانۋ قىزمەتتەرى ارقىلى ورتالىقتاندىرىلعان تۇردە جۇزەگە اسىرادى. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە ق ر اۋىل شارۋاشىلىعى ۆيتسە-ءمينيسترى ەرمەك كەنجەحان ۇلى ايتتى.
«ءۇيىرلى شەگىرتكەلەردى وڭدەۋ جۇمىستارىنا بيۋدجەتتەن 8,1 ميلليارد تەڭگە قاراجات قاراستىرىلعان. ونىڭ ىشىندە رەسپۋبليكالىق بيۋدجەتتەن 4,2 ميلليارد بولىنسە، ۇكىمەتتىڭ رەزەرۆىنەن قوسىمشا 3,9 ميلليارد تەڭگە ۇلەستىرىلەدى. بۇل قاراجاتتىڭ بارلىعى زيانكەستەرگە قارسى پرەپاراتتاردى ساتىپ الۋ جۇمىستارىن ۇيىمداستىرۋعا باعىتتالادى»، - دەدى ول.
ال، ساياق شەگىرتكەگە قارسى كۇرەس جەرگىلىكتى بيۋدجەت قاراجاتى ەسەبىنەن جۇرگىزىلەدى. سوڭعى جىلدارى ونىڭ تارالۋ الاڭىنىڭ وسكەنى بايقالدى: 2020 -جىلى - 514 مىڭ گەكتار، 2021 -جىلى - 626 مىڭ گەكتار ، 2022 -جىلى - 975 مىڭ گەكتار.
2023 -جىلى وڭدەۋ شارالارى 1,6 ميلليون گەكتار الاڭدا جۇرگىزىلسە، بيىل ەل اۋماعىندا ءۇيىرلى شەگىرتكە تەكتەستەردىڭ تارالۋ بولجامى 2,5 ميلليون گەكتار (اقتوبەدە 784,4 مىڭ گەكتار ، قوستانايدا 775 مىڭ گەكتار ، ال تۇركىستان وڭىرىندە 271 مىڭ گەكتار) قۇراپ وتىر.
اۆتور
ورالحان قوجانوۆ
