عىلىم جانە جوعارى ءبىلىم مينيسترلىگى جالعان ديپلومنىڭ جولىن كەسۋ ءۇشىن ءبىرىڭعاي بازا قۇردى

استانا. KAZINFORM - كەيىنگى ۋاقىتتا ينتەرنەت كەڭىستىگىندە جالعان ديپلومدار تۋرالى ءتۇرلى اقپارات كەڭ تارالىپ وتىر. وسىعان بايلانىستى ق ر عىلىم جانە جوعارى ءبىلىم مينيسترلىگى ديپلومداردىڭ زاڭسىز اينالىمىنا توسقاۋىل قويۋ ءۇشىن ءبىرقاتار ناقتى شارا قابىلدادى.

مينيسترلىكتىڭ مالىمەتىنشە، بۇگىندە 1991 -جىلدان بەرى بەرىلگەن جوعارى ءبىلىم تۋرالى ديپلومداردىڭ ءبىرىڭعاي بازاسى جاساقتالعان. اتالعان بازاعا قازىرگى تاڭدا 3 ميلليوننان استام دەرەك ەنگىزىلدى. بۇل جۇمىس 2018 -جىلدان بەرى كەزەڭ-كەزەڭىمەن جۇزەگە اسىرىلىپ كەلەدى.

- 2021 -جىلدان باستاپ بارلىق جوعارى وقۋ ورىنى (ازاماتتىق ەمەس جانە مەديتسينالىق ج و و- لاردى قوسپاعاندا) ءبىلىم تۋرالى زاڭناماعا سايكەس وزىندىك ۇلگىدەگى ديپلومداردى بەرىپ جاتىر. ولاردىڭ ءتۇپنۇسقالىعىن جوعارى ءبىلىم بەرۋدىڭ ءبىرىڭعاي پلاتفورماسى - EPVO ارقىلى تەكسەرۋگە بولادى، - دەدى عىلىم جانە جوعارى ءبىلىم مينيسترلىگىنە قاراستى جوعارى جانە جوعارى وقۋ ورنىنان كەيىنگى ءبىلىم كوميتەتىنىڭ ءتوراعاسى گۇلزات كوبەنوۆا.

كوميتەت باسشىسىنىڭ ايتۋىنشا، مينيسترلىك وزىندىك ۇلگىدەگى ديپلومداردىڭ مازمۇنىنا قويىلاتىن نەگىزگى تالاپتاردى، سونداي-اق ديپلوم سەرياسىن بەكىتەدى. ديپلوم ءنومىرى مەن QR- كودى ارنايى مودۋل ارقىلى EPVO جۇيەسىندە گەنەراتسيالانادى. بۇل قىزمەتكە تەك سول جۇيەدە تىركەلگەن، جاۋاپتى رەتىندە تاعايىندالعان جوو قىزمەتكەرلەرىنە عانا قولجەتىمدى.

- ەگەر EPVO جۇيەسىندە ءبىلىم الۋشى تۋرالى مالىمەت بولماسا، ديپلوم ءنومىرىن گەنەراتسيالاۋ مۇمكىن ەمەس. گەنەراتسيالانعان ءنومىرى مەن QR- كودى جوق ديپلومدار جارامسىز بولىپ ەسەپتەلەدى، - دەدى گۇلزات كوبەنوۆا.

سونىمەن قاتار EPVO جۇيەسىندە جۇمىس بەرۋشىلەرگە ارنالعان ارنايى مودۋل ىسكە قوسىلعان. ونىڭ كومەگىمەن كەز كەلگەن جۇمىس بەرۋشى وزىندىك ۇلگىدەگى ديپلومداردى، سونداي-اق بۇرىنعى مەملەكەتتىك ۇلگىدەگى ديپلومداردىڭ ءتۇپنۇسقالىعىن تەكسەرە الادى.

مينيسترلىك وكىلى جالعان ديپلومداردى دايىنداۋ جانە ساتۋ فاكتىلەرىن انىقتاۋ بويىنشا مادەنيەت جانە اقپارات مينيسترلىگىمەن، سونداي-اق ىشكى ىستەر مينيسترلىگىمەن بىرلەسىپ تۇراقتى نەگىزدە جۇمىس جۇرگىزىلىپ جاتقانىن اتاپ ءوتتى.

- جالعان قۇجات جاساعانى ءۇشىن زاڭنامادا 2000-ايلىق ەسەپتىك كورسەتكىشكە دەيىن ايىپپۇل نە 2 جىلعا دەيىن باس بوستاندىعىنان شەكتەۋ نەمەسە ايىرۋ جازاسى كوزدەلگەن. ال جالعان قۇجاتتى پايدالانعاندار 160 ا ە ك مولشەرىندە ايىپپۇل تولەيدى نەمەسە 40 تاۋلىككە دەيىن اكىمشىلىك قاماققا الىنادى، - دەدى كوميتەت ءتوراعاسى.

ايتا كەتەيىك، بيىل وقۋ جىلىندا ەلىمىزگە 31500 شەتەلدىك ستۋدەنت كەلگەنىن جازعانبىز.

اۆتور

تاستان تويانوۆ