عىلىم ءمينيسترى 1-كۋرس ستۋدەنتتەرىنە ءۇش كەڭەس بەردى

استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك 1- كۋرس ستۋدەنتتەرىنە ءۇش كەڭەسىن بەردى.

«ءبىرىنشىسى - وقۋ پروتسەسى. سونى اياققا تۇرعىزىپ الىڭىز. وسى قاتەنى كوپ ادام جاسايدى، مەن دە جاسادىم - جاڭا قالاعا كەلىپ جوعالىپ كەتتىك. ءبىرىنشى جىل وتە ماڭىزدى. وقۋ پروتسەسىن ءاۋ باستان دۇرىس جولعا قويماساڭىزدار، ودان كەيىن قوردالانىپ قالادى، ەكىنشى، ءۇشىنشى سەمەستردە قيىن بولادى»، - دەيدى مينيستر.

ساياسات نۇربەك ايتقان ەكىنشى كەڭەس - اقپاراتپەن جۇمىس ىستەۋ داعدىسىن قالىپتاستىرۋ.

«قازىر اقپارات وتە كوپ. كەز كەلگەن دارىستەن شىققان سوڭ، بىرنەشە سلايد، بىرنەشە كىتاپ پەن سىلتەمە بولادى. ونى جۇيەگە كەلتىرەتىن ءوز ءتارتىبىڭىز بولۋى كەرەك. سوندىقتان سيفرلىق ءتارتىپ نەمەسە سيفرلىق قاۋىپسىزدىك وتە ماڭىزدى. ءۇشىنشى كەڭەس - دەنساۋلىق. تاماعىڭىزدى، كۇندىك ءتارتىبىڭىزدى، دەنساۋلىعىڭىزدى، سۋ مەن تاماق ساپاسىن مۇقيات قاراڭىز. ءسىزدىڭ دەنساۋلىعىڭىز - تەك قانا ءسىزدىڭ جاۋاپكەرشىلىگىڭىز»، - دەيدى عىلىم ءمينيسترى.

ايتا كەتەيىك، 2024-2025 وقۋ جىلىندا گرانت سانى 94 مىڭنان استى.

ونىڭ ىشىندە 78 مىڭ گرانت - باكالاۆريات ستۋدەنتتەرىنە، 13 مىڭ گرانت - ماگيستراتۋراعا بەرىلسە، 3 مىڭ گرانت بولاشاق دوكتورانتتارعا قاراستىرىلعان.

اۆتور

ايجان سەرىكجان قىزى