ءوتىپ بارا جاتقان جىل نەسىمەن ەستە قالدى - ەرلان قارين پايىمى

استانا. KAZINFORM - مەملەكەتتىك كەڭەسشى ەرلان قارين Telegram-دا ىشكى ساياسي تۇرعىدا ءوتىپ بارا جاتقان جىل نەسىمەن ەستە قالعانىن جازدى.

رەفورمالار باعىتىنىڭ جالعاسى

مەملەكەت باسشىسى قاڭتارداعى سۇحباتىندا جانە ۇلتتىق قۇرىلتايدىڭ ءۇشىنشى وتىرىسىندا بۇكىل 2024-جىلعا ارنالعان ىشكى ساياسي جۇمىستاردىڭ كۇنتارتىبى مەن مازمۇنىن ايقىنداپ بەردى.

جىل بويى الەۋمەتتىك ماڭىزى بار زاڭداردىڭ تۇتاس كەشەنى ازىرلەنىپ، قابىلداندى. قوعامدىق پەتيتسيالار ينستيتۋتى ىسكە قوسىلدى. ت م د جانە ورتالىق ازيادا العاش رەت اتوم ەلەكتر ستانتسياسى قۇرىلىسىنا قاتىستى رەفەرەندۋم ءوتتى، ونى تالقىلاۋ ەڭ ۇزاق ەلەكتورالدىق ناۋقانعا اينالدى. اۋىل اكىمدەرىن سايلاۋ جالعاسىن تاپتى. ونوماستيكا، ەسكەرتكىشتەر مەن گەرالديكا، مەملەكەتتىك جانە قوعامدىق ناگرادالار سالاسىن رەتكە كەلتىرۋ جۇمىستارى باستالدى.

الەۋمەتتىك-گۋمانيتارلىق سالاداعى مەملەكەتتىك باستامالاردى كەزەڭ-كەزەڭمەن جۇزەگە اسىرۋ جالعاسىن تاپتى: «ۇلتتىق قور بالالارعا!» باعدارلاماسى، «جايلى مەكتەپ» ۇلتتىق جوباسى، مەكتەپتەردەگى تاربيە جۇمىسىنىڭ ءبىرىڭعاي باعدارلاماسى، جاس عالىمدارعا ارنالعان جاڭا گرانتتار مەن تاعىلىمدامالار، جۇمىسشى ماماندىقتارىنىڭ مارتەبەسى مەن بەدەلىن ارتتىرۋ.

جاڭا سىن-قاتەرلەرگە جاۋاپ

مەملەكەتتىك اپپارات تۋىنداعان سىن-قاتەرلەردى تابىستى ەڭسەرە ءبىلدى. پرەزيدەنت ساياساتى بۇرىن-سوڭدى بولماعان حالىقارالىق شيەلەنىس جاعدايىندا ەلىمىزدەگى بەيبىتشىلىك پەن كەلىسىمنىڭ ساقتالۋىنا، قازاقستاننىڭ ەگەمەندىگى مەن قاۋىپسىزدىگىنىڭ نىعايۋىنا سەپتىگىن تيگىزدى.

الاپات سۋ تاسقىنىنىڭ زارداپتارى قىسقا ۋاقىتتىڭ ىشىندە جويىلىپ، زارداپ شەككەندەردىڭ بارلىعىنا مەملەكەت تاراپىنان جان-جاقتى كومەك كورسەتىلدى. ايەلدەر مەن بالالاردىڭ قۇقىقتارىن قورعاۋ، سونداي-اق بالالار سۋيتسيدىمەن كۇرەستى ۇيلەستىرۋ سالالارى بويىنشا جۇيەلى شارالار قابىلداندى.

جاڭا قوعامدىق ادەپ

جاڭا قوعامدىق قۇندىلىقتاردىڭ كريستالداۋ پروتسەسى جالعاستى. ادىلدىك، زاڭدىلىق پەن ءتارتىپ قاعيدالارى تەك مەملەكەتتىك ورگانداردىڭ عانا ەمەس، سونىمەن بىرگە بۇكىل قوعامنىڭ نەگىزگى نارراتيۆىنە اينالدى.

ازاماتتىق قوعام پرەزيدەنتتىڭ «تازا قازاقستان» باستاماسىنا، سونداي-اق تۇرمىستىق زورلىق-زومبىلىققا، اگرەسسيا مەن ۆانداليزمگە، ناشاقورلىققا، لۋدومانياعا جانە ىسىراپشىلدىققا قارسى تۇرۋعا بەلسەندى اتسالىستى.

مىنەز-قۇلىق نورمالارى مەن ادەپ ساقتاۋ تاقىرىبى بارعان سايىن قوعامدىق تالقىلاۋلاردىڭ وزەگىنە اينالا باستادى.

قوعام بىرىگۋىنىڭ دامۋى

وزەكتى تاقىرىپتار توڭىرەگىندە ورىن الىپ جاتقان پىكىرتالاستارعا قاراماستان، تۇتاستاي العاندا، بيلىك پەن قوعامنىڭ بولاشاققا دەگەن ورتاق تۇسىنىگى مەن كوزقاراسى بار. جاقىندا قازاقستاننىڭ ستراتەگيالىق زەرتتەۋلەر ينستيتۋتى جۇرگىزگەن ساۋالناماعا سايكەس، ازاماتتاردىڭ 77,7 پايىزى قازاقستان دۇرىس باعىتتا دامىپ كەلە جاتىر دەپ ەسەپتەيدى. قوعامدىق قولداۋ الداعى 2025-جىلى رەفورمالاردى جالعاستىرۋدىڭ كۇشتى تىرەگى سانالادى.

ەسكە سالا كەتەيىك، بۇعان دەيىن ەرلان قارين ەندى مەملەكەتتىك ناگرادالار جۇيەسىنە 9 جاڭا قۇرمەتتى اتاق ەنگىزىلەتىنىن ايتقانىن جازعان بولاتىنبىز.