ءسىزدى جالعان اقپاراتپەن جاڭىلىستىرعان: يگور لەپەحا دەپۋتاتپەن سوزگە كەلىپ قالدى

استانا. KAZINFORM - ماجىلىستە قۇقىق بۇزۋدىڭ الدىن الۋعا باعىتتالعان بىرنەشە زاڭدى ءبىر زاڭعا بىرىكتىرىپ جەتىلدىرۋگە ارنالعان زاڭ جوباسى تالقىلانىپ جاتىر.

تالقىلاۋ كەزىندە دەپۋتات جۇلدىز سۇلەيمەنوۆا ىشكى ىستەر ءمينيسترىنىڭ ورىنباسارى يگور لەپەحاعا ءبىر توپ زاڭگەردىڭ اتالمىش زاڭ جوباسىنا قارسى ءۋاجىن جەتكىزدى.

- ايەل قۇقىقتارى جونىندەگى، تۇرمىستىق زورلىق-زومبىلىق ماسەلەسىمەن اينالىسىپ جۇرگەن ساراپشىلار، زاڭگەرلەر بىزگە دابىل قاعىپ جۇگىندى. ءسىز تانىستىرعان زاڭ جوباسىنىڭ اياسىندا 2009 -جىلى قابىلدانعان «تۇرمىستىق زورلىق-زومبىلىق پروفيلاكتيكاسى تۋرالى» زاڭنىڭ كۇشىن جويىپ، ول زاڭدى وسى زاڭعا بىرىكتىرۋدى ۇسىنىپ وتىرسىزدار. 2024 -جىلى ايەلدەردىڭ قۇقىعىن قورعاپ، بالالاردىڭ قاۋىپسىزدىگىن ساقتاۋعا ارنالعان زاڭ قابىلدادىق. ۇرىپ-سوعۋ، دەنساۋلىققا قاساقانا جەڭىل زيان كەلتىرۋ باپتارىن قىلمىس رەتىندە سارالاعانبىز. 2009 -جىلدان بەرى جۇمىس ىستەپ كەلە جاتقان زاڭدى بۇگىنگى زاڭعا بىرىكتىرۋگە نە نەگىز بولدى؟ مەنىڭ ويىمشا، تۇرمىستىق زورلىق- زومبىلىق پروفيلاكتيكاسى زاڭنىڭ كۇشىن جويۋ - 2023، 2024 -جىلدارى قابىلدانعان بارلىق زاڭنان كەرى كەتۋ، - دەدى دەپۋتات.

يگور لەپەحا دەپۋتاتقا وسى ماسەلەمەن جۇگىنگەن ادامدار جالعان اقپارات ايتقان دەپ ەسەپتەيتىنىن ءمالىم ەتتى.

- تۇسىندىرە كەتكىم كەلەدى. ءسوزىمنىڭ باسىندا قولدانىستاعى زاڭداردىڭ ىشىندەگى ۋاقىت سىنىنان وتكەن، تيىمدىلىگىن كورسەتكەن نورمالاردى وزگەرىسسىز قالدىراتىنىمدى ايتىپ كەتتىم. ۇرىپ-سوعۋ مەن دەنساۋلىققا قاساقانا جەڭىل زيان كەلتىرۋمەن بايلانىستى باپتاردى قىلمىس رەتىندە سارالاۋ نورمالارىنا كەلسەك، ايەلدەر مەن بالالاردىڭ قۇقىعىن بۇزۋمەن بايلانىستى باپتار تۋرالى ايتساق، ءبارى ساقتالعان. قاراساڭىز، قىلمىستىق كودەكسكە دە، اكىمشىلىك كودەكسكە ەشقانداي ەلەۋلى وزگەرىس ەنگىزگەلى وتىرعان جوقپىز، ياعني، ءسىزدى جالعان اقپاراتپەن جاڭىلىستىرعانى انىق. 2009 -جىلعى زاڭدى قازىرگى زاڭمەن بىرىكتىرۋ ماسەلەسىنە كەلسەك، بۇل مەنىڭ باستامام ەمەس. جوعارى جاقتان، ناقتى كىمنىڭ باستاماسى بويىنشا تاپسىرما كەلگەنىن ءبىلىپ وتىرسىز عوي، - دەدى ول.

يگور لەپەحا بۇل قۇجات زاڭناماداعى قايشىلىقتاردى بىرىزدەندىرۋ ءۇشىن ازىرلەنىپ جاتقانىن ەسكە سالدى.

- جاسوسپىرىمدەردىڭ اراسىنداعى قۇقىق بۇزۋدىڭ الدىن الۋ، ماسكۇنەمدىكتىڭ الدىن الۋ سياقتى زاڭداردىڭ بارىنە كوپتەگەن تۇزەتۋ مەن وزگەرىس ەنگىزىل كەلدى. قازىر ولاردىڭ كەيبىر باپتارى ەكىنشى زاڭنىڭ كەيبىر باپتارىنا قايشى كەلەتىندەي جاعدايعا جەتكەن. سوندىقتان بىزگە بەس زاڭدى بىرىكتىرىپ، جالپىعا تۇسىنىكتى ءبىر زاڭ ەتىپ جەتىلدىرۋ تۋرالى تاپسىرما بەرىلگەن، - دەپ ءتۇسىندىردى ءمينيستردىڭ ورىنباسارى.

ايتا كەتۋ كەرەك، ءى ءى م دەرەگى بويىنشا، جىل سايىن پوليتسياعا تۇرمىستىق زورلىق-زومبىلىق تۋرالى 100 مىڭنان استام حابارلاما تۇسەدى.

اۆتور

ەسىمجان ناقتىباي