ءسىبىر جاراسى: الماتىداعى بازاردا 4 مىڭ كەلىگە جۋىق قاۋىپتى ەت جويىلدى
قونايەۆ. KAZINFORM - قازاقستاندا جىل باسىنان بەرى ءسىبىر جاراسىن جۇقتىرۋدىڭ 17 جاعدايى بەلگىلى بولسا، ونىڭ 14 جاعدايى الماتى وبلىسىنىڭ ۇيعىر اۋدانىندا تىركەلگەن.
وسى ورايدا، Kazinform ءتىلشىسى الماتى وبلىسىنىڭ دەنساۋلىق ساقتاۋ باسقارماسىنا ساۋال جولداپ، اۋدانداعى قاۋىپتى اۋرۋعا قارسى قانداي جۇمىس اتقارىلىپ جاتقانىن انىقتادى.
بيىل 3 -قىركۇيەك كۇنى الماتى وبلىسى ۇيعىر اۋدانىنا قاراستى ۇلكەن اقسۋ اۋىلدىق وكرۋگىندە 4 ادام ءسىبىر جاراسىن جۇقتىرعانى حابارلاندى. 5 -قىركۇيەك كۇنى ۇلكەن اقسۋ اۋىلىندا كارانتين ەنگىزىلدى. 27 -قىركۇيەك كۇنى جاعدايدىڭ تۇراقتانۋىنا بايلانىستى كارانتين الىنىپ تاستالدى.
الماتى وبلىسىنىڭ دەنساۋلىق ساقتاۋ باسقارماسىنا قاراستى ۇيعىر اۋداندىق ورتالىق اۋرۋحانا مالىمەتىنە سايكەس، اۋداندا 9 ايدا ءسىبىر جاراسىنىڭ جالپى 14 جاعدايى تىركەلگەن. ونىڭ ىشىندە 11 جاعدايدا اۋرۋ زەرتحانالىق جاعدايدا راستالسا، 3 جاعداي كلينيكالىق، ەپيدەميولوگيالىق كورسەتكىشتەرىمەن ناقتىلاندى. اۋرۋ وشاقتارىندا قارىم-قاتىناستا بولعان 41 ادام مەديتسينالىق باقىلاۋعا الىندى.
«بارلىق جاعدايدىڭ ناقتىلانعان دياگنوزى - ءسىبىر جاراسى، تەرىلىك ءتۇرى. اۋرۋ وشاقتارىنا ۆەتەرينارلىق قىزمەتپەن بىرگە ەپيدەميولوگيالى- ەپيزووتولوگيالىق تەكسەرۋلەر جۇرگىزىلدى. بارلىق جاعدايدا ناۋقاستار مالدارمەن تۇرمىستىق جاناسۋ كەزىندە اۋرۋ جۇقتىرعان»، - دەدى ۇيعىر اۋداندىق ورتالىق اۋرۋحانانىڭ ديرەكتورى ءاليا اقجولتايەۆا.
سونداي- اق، مەكەمە باسشىسى ءسىبىر جاراسىن جۇقتىرعان ناۋقاستاردىڭ بىرەۋى عانا بۇگىنگى كۇنى ەمىن جالعاستىرىپ جاتقانىن، قالعان ناۋقاستار اۋرۋحانالىق جاعدايدا ەمدەلگەنىن اتاپ ءوتتى. جالپى ءسىبىر جاراسىنا قارسى اۋداندا 170 دوزا ەكپە الىنىپ، ونى بۇگىنگە دەيىن 158 ادام العان.
كارانتين كەزىندە ءۇي-ءۇيدى ارالاپ، ناۋقاستاردى انىقتاۋ ماقساتىندا ۇلكەن اقسۋ اۋىلىندا 273 اۋلا تەكسەرىلگەن. وعان قوسا، اۋرۋ وشاقتارىنان، سىرتقى قورشاعان ورتادان زەرتتەۋلەرگە 498 سىنامالار الىندى. ەپيدەميولوگيالىق تەكسەرۋ مەن زەرتتەۋلەر ناتيجەسىندە 30 سىناما وڭ ناتيجە بەرگەن. ءسىبىر جاراسىنىڭ بەلگىلەرى مال ەتىنەن، تەرىسىنەن، قيىنان، مال سويىلعان جەردىڭ توپىراعىنان، جايىلىم توپىراعىنان تابىلعان.
«اۋرۋ وشاقتارىن ەپيدەميولوگيالىق تەكسەرۋ كەزىندە ناۋقاس سويىپ العان اۋرۋ مالدىڭ ەتىن دەلدارلار الماتى قالاسىنا الىپ كەتكەندىگى انىقتالىپ، اۋداندىق پوليتسيا ءبولىمى حاباردار ەتىلدى. ىزدەستىرۋ بارىسىندا ەت الماتى قالاسىنىڭ «ەلامان» بازارىنا الىنىپ بارعاندىعى انىقتالىپ، اتالعان بازاردان 3800 كگ ەت كۇيدىرۋ ارقىلى جويىلدى»، - دەدى ءاليا اقجولتايەۆا.
جالپى ۇلكەن اقسۋ اۋىلدىق وكرۋگىندە بارلىعى 7510 باس ءىرى قارا، 18615 باس ۇساق مال، 1240 باس جىلقى ءسىبىر جاراسىنا قارسى ۆاكسيناتسيالانعان. مال قورالارى مەن جايىلىم جەرلەرگە 33998 شارشى مەتر اۋماققا (ونىڭ ىشىندە، 13000 شارشى مەتر جايىلىم جەر) %3- دىق گليۋزامين ۆەت ەرىتىندىسىمەن دەزينفەكسيا جۇرگىزىلگەن. سونىمەن قاتار، اۋداندا ءسىبىر جاراسىنىڭ توپىراقتىق وشاعى انىقتالعان ەلدى مەكەندەر ەسەپكە الىنعان، ولار: شارىن، شونجى، اقتام اۋىلدارى.
ەسكە سالايىق، بۇعان دەيىن قازاقستاندا ءسىبىر جاراسىنا شالدىعۋ دەڭگەيى 2024 -جىلدىڭ سوڭعى 10-ايىندا 2023 -جىلدىڭ سايكەس كەزەڭىمەن سالىستىرعاندا ەكى ەسە تومەندەگەنىن جازعانبىز.
اۆتور
دوسبول اتاجان
