ءۇرىمجى اۋدانىندا مىڭ ادامدىق «قارا جورعا» بيلەنەدى - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
تۇركيا ەكسپورتى 13,8 پايىز ءوستى - TRT
تۇركيا ستاتيستيكا مەكەمەسى سىرتقى ساۋدا دەرەكتەرىن جاريالادى. تۇركيانىڭ 2024 -جىلدىڭ شىلدە ايىنداعى ەكسپورت كولەمى وتكەن جىلدىڭ شىلدە ايىمەن سالىستىرعاندا 13,8 پايىزعا ءوسىپ، 22 ميلليارد 510 ميلليون دوللارعا جەتكەن.
بۇل تۋرالى وسى اپتادا تۇركيا راديو تەلەۆيزيا پورتالى حابارلادى.
اتالعان ب ا ق-تىڭ دەرەگىنشە، تۇركيا ستاتيستيكا مەكەمەسى سىرتقى ساۋدا دەرەكتەرىن جاريالاعان. وسىعان سايكەس 2024 -جىلدىڭ شىلدە ايىنداعى ەكسپورت كولەمى وتكەن جىلدىڭ شىلدە ايىمەن سالىستىرعاندا 13,8 پايىزعا ءوسىپ، 22 ميلليارد 510 ميلليون دوللارعا جەتكەن. 2024 -جىلدىڭ قاڭتار-شىلدە ارالىعىنداعى ەكسپورت كولەمى وتكەن جىلدىڭ قاڭتار-شىلدە كەزەڭىمەن سالىستىرعاندا 4,1 پايىزعا ارتىپ، 148 ميلليارد 738 ميلليون دوللارعا شىققان.
قازاقستاننىڭ ەنەرگەتيكا مينيسترلىگىنىڭ باسشىسى قىتايعا ساپارمەن كەلدى - «حالىق گازەتى»
29-30-تامىز ارالىعىندا قازاقستاننىڭ ەنەرگەتيكا ءمينيسترى الماسادام ساتقاليەۆ باستاعان قازاقستاندىق دەلەگاتسيا ق ح ر- عا رەسمي ساپارمەن كەلدى، دەپ جازدى قىتايدىڭ «حالىق گازەتى» ق ر ەنەرگەتيكا مينيسترلىگىنە سىلتەمە جاساپ.
اقپارات كوزىنىڭ كەلتىرگەن دەرەگىنە سۇيەنسەك، قازاقستان ەنەرگەتيكا مينيسترلىگىنىڭ باسشىسى ق ح ر ءىرى ەنەرگەتيكالىق كومپانيالارىنىڭ وكىلدەرىمەن جانە مەملەكەتتىك ورگاندارمەن ءبىرقاتار كەزدەسۋلەر وتكىزگەن.
تاراپتار ەلدەردىڭ ەنەرگەتيكا سالاسىنداعى ىنتىماقتاستىعىنىڭ پەرسپەكتيۆالارى تۋرالى پىكىر الماستى.
ساپار بارىسىندا قىتاي تاراپى قازاقستاندىق دەلەگاتسيانى كومپانيانىڭ كورمە پاۆيلونىمەن تانىستىرىپ، قىتاي اۋماعىندا دا، ودان تىس جەرلەردە دە جۇزەگە اسىرىلىپ جاتقان جوبالاردى تانىستىرعان.
قازاقستان ەلشىسى سۋرەتشى ورال تاڭسىقبايەۆتىڭ ونەر تۋىندىلارىمەن تانىستى - «ءوز ا»
قازاقستاننىڭ وزبەكستانداعى توتەنشە جانە وكىلەتتى ەلشىسى بەيبىت اتامقۇلوۆ اتاقتى سۋرەتشى ورال تاڭسىقبايەۆتىڭ تاشكەنتتەگى مەموريالدىق مۇراجاي-ۇيىنە بارىپ، ونىڭ ونەر تۋىندىلارىمەن تانىستى، دەپ حابارلايدى وزبەكستاندىق «ءوز ا» اقپاراتتىق اگەنتتىگى.
وزبەكستاندىق ب ا ق- تىڭ دەرەگىنشە، بيىل ورتالىق ازيا ەلدەرىنىڭ كوركەم سۋرەت ونەرىنىڭ نەگىزىن قالاۋشىلارىنىڭ ءبىرى ورال تاڭسىقبايەۆتىڭ تۋعانىنا 120 جىل تولۋىنا وراي، وسى مەرەيلى داتا قازاقستان مەن وزبەكستاندا كەڭىنەن اتالىپ وتۋدە.
ەلشى تانىمال قىلقالام شەبەرىنىڭ سىزعان ونەر تۋىندىلارىن، سونداي-اق ونىڭ ءومىرى مەن شىعارماشىلىعىن باياندايتىن جەكە زاتتارى جانە مۇراعاتتىق ماتەريالدارىن قامتيتىن مۇراجاي ەكسپوزيتسياسىمەن تانىستى.
مۋزەي ديرەكتورى فارحود جاليلوۆپەن اڭگىمەلەسۋ بارىسىندا ديپميسسيا باسشىسى كەلەسى جىلى قازاقستاندا اتاقتى وزبەكستاندىق سۋرەتشى ورال تاڭسىقبايەۆتىڭ كورمەسىن وتكىزۋ جوسپارلانعانىن اتاپ وتكەن.
ايتا كەتەيىك، ورال تاڭسىقبايەۆ 1904 -جىلى تاشكەنت قالاسىندا تۋىپ، 1974 -جىلى نۇكىستە قايتىس بولعان. كەسكىندەمەشى، ك س ر و حالىق سۋرەتشىسى (1963)، ك س ر و كوركەم سۋرەت اكادەمياسىنىڭ تولىق مۇشەسى (1958). ورال تاڭسىقبايەۆتىڭ ۇلتى - قازاق.
سونداي-اق وسى اپتادا «ءو ز ا» - دا «رەگيستاندا الەم حالىقتارىنىڭ اندەرى ورىندالۋدا» دەگەن تاقىرىپتاعى اقپارات جاريالاندى.
كەلتىرىلگەن مالىمەتتەرگە سۇيەنسەك، «شىعىس اۋەندەرى» ⅩⅢ حالىقارالىق مۋزىكا فەستيۆالىنىڭ ءبىرىنشى كۇنى سامارقاندىقتار مەن شەتەلدىك تۋريستەر ءتۇرلى ۇلت پەن ۇلىس وكىلدەرىنىڭ ۇلتتىق اندەرىن تىڭدادى.
اتاپ ايتقاندا، فەستيۆالدىڭ ءبىرىنشى كۇنى بولگاريا، لاتۆيا، سۋدان، گرەكيا، ءۇندىستان، قازاقستان، يران، تۇركىمەنستان، جاپونيا، مالايزيا، موڭعوليا، ازەربايجان ەلدەرىنىڭ وكىلدەرى ۇلتتىق اندەردى ورىنداعان.
التايدىڭ موڭكە جايلاۋىندا ءداستۇرلى مادەنيەت فەستيۆالى ءوتتى - «التاي اقپارات ورتالىعى»
25-تامىز كۇنى كەشتە «جايلاۋداعى حالىقتىق سالت-ءداستۇر، موڭكەدەگى روك كەشى» دەپ اتالاتىن شىڭجاڭ حالىقتىق مادەنيەت فەستيۆالى التاي قالاسىنا قاراستى موڭكە جايلاۋىندا سالتاناتتى تۇردە اشىلدى، دەپ حابارلايدى قىتايدىڭ «التاي اقپارات ورتالىعى» باسىلىمى.
«التىن ساحارا»، «التايىم»، «اي نۇرى» قاتارلى تۋىندىلاردى ءانشى، سازگەر جان چۋ ساحنادا ورىنداپ، دومبىرا شەرتىپ توسىن سىي سىيلاسا، تانىمال ءانشى اراي ايدارقان ۇلى دا جەرلەستەرىنە ەرەكشە اندەرىن تارتۋ ەتتى. وسى سياقتى كونسەرتپەن قاتار قىزقۋار، كوكپار، بالۋانعا ءتۇسۋ قاتارلى وزگەشە تارتىمدى ۇلتتىق سپورتتىق جارىستار وتكىزىلدى. سونىمەن قاتار قازاقتىڭ ءداستۇرلى كيىز باسۋ ونەرى، قۇرت جاساۋ ونەرى كوپشىلىكتى ءتانتى قىلعان. ءارتۇرلى ءدامدى تاعىمدار كوپتىڭ كوڭىلىنەن شىققان.
قىتايدىڭ گۋاڭدۇڭ پروۆينتسياسىنان كەلگەن حۋان شين التايدىڭ كورىنىسى وتە كوركەم ەكەندىگىن، ءارتۇرلى ءدامدى تاعامداردان ءدام تاتقانىن، موڭكە جايلاۋىنداعى سپورتتىق، مادەنيەت كەشى كوزاياسىن كەڭەيتكەنىن ايتقان.
التاي قالالىق مادەنيەت، سپورت، راديو-تەلەۆيزيا جانە ساياحات مەكەمەسىنىڭ ءتوراعاسى لي يۋن ايتۋىنشا، الداعى ۋاقىتتا وسى سەكىلدى مادەنيەت، سپورتتىق جانە ساياحات ءىس-شارالارىن ۇنەمى وتكىزۋ ارقىلى ەگىنشى- مالشىلاردىڭ كىرىسىن ارتتىرۋعا كۇش سالىنباق.
ءۇرىمجىنىڭ نانشان تاۋىندا مىڭ ادامدىق قارا جورعا ءبيى بيلەنەدى - Harajorga
اپتانىڭ سوڭىندا ءۇرىمجىنىڭ نانشان تاۋىندا ەكى كۇن بويى تۋريستىك مادەنيەت ءىس-شاراسى وتكىزىلەدى. ءۇرىمجى اۋداندىق مادەنيەت، سپورت، راديو، تەلەۆيدەنيە جانە تۋريزم بيۋروسىنىڭ حابارلاۋىنشا، 31-تامىز كۇنى «نانشان فيرماسىنداعى جىلقى مۋزىكا فەستيۆالى» لاستاي كورىنىس اۋماعىندا وتكىزىلسە، 1-قىركۇيەكتە ءۇرىمجى اۋدانىنداعى شىبايانگوۋ يپپودرومىندا «تيانشاننان تۋعان جارىق اي» اتتى مادەني تۋريزم تاقىرىبىنا ارنالعان ءىس-شارالار وتەدى.
بۇل تۋرالى وسى اپتادا قىتايلىق «Harajorga» الەۋمەتتىك جەلىسىندە حابارلاندى. اتالعان ب ا ق- تىڭ مالىمەتىنشە، بۇل جولى وتەتىن ەكى كۇندىك شارانىڭ مازمۇنى باي بولعاندىقتان كورەرمەندەردى قىزىقتىرماي قويمايدى.
اتاپ ايتقاندا «نانشان فيرماسىنداعى جىلقى مۋزىكا فەستيۆالى» وتكىزىلەتىن كۇنى تۇستەن بۇرىن الاڭنان جىلقى، سىيىر، قوي، تۇيەلەردەن قۇرالعان تاڭعى شوۋمەن باستالادى. ودان كەيىن ءارتۇرلى ات ونەرى، قىز قۋۋ سياقتى ۇلتتىق ات سپورتى ويىندارى وتەدى. ال تۇستەن كەيىن، اقىندار ايتىسىمەن جالعاسىن تاۋىپ، ارى قاراي مىڭ ادامدىق قارا جورعا ءبيى بيلەنەدى. سونداي-اق شىڭجاڭنىڭ ءىشى-سىرتىنا بەلگىلى انشىلەر، وركەسترلەر كوپشىلىككە 40-تان استام ءان، كۇي ۇسىنادى.
«1-قىركۇيەك كۇنى، ءۇرىمجى اۋدانىندا وتكىزىلەتىن 2024 -جىلعى «تيانشاننان تۋعان جارىق اي» اتتى مادەني تۋريزم تاقىرىبىنا ارنالعان ءىس-شارالاردا كۇرەس، ات بايگەسى سياقتى سپورتتىق ويىندارمەن قاتار قىز قۋۋ، تەڭگە ءىلۋ، كوكپار، سونداي- اق، اقىندار ايتىسى، ۇلتتىق قولونەر بۇيىمدارى مەن اۋىل شارۋاشىلىق ونىمدەر جارمەڭكەسى بولادى»، - دەپ دەپ تۇيىندەيدى قىتايلىق ب ا ق.
يراننىڭ 7 عاسىرلىق تاريحى بار قۇپياعا تولى كونە قامالى - Parstoday
«فالاك ۋل- افلاك» قامالى - يراننىڭ لۋريستان وبلىسىندا ورنالاسقان ەڭ ماڭىزدى تاريحي ەسكەرتكىشتەرىنىڭ ءبىرى. قامال ۇلتتىق مۇرا تىزىمىنە تىركەلگەن. ساسانيلەر داۋىرىنە (ب. ز. 3-7 ع ع) تيەسىلى بۇل سالتاناتتى قامال لۋريستان وبلىسىنىڭ حورراماباد توبەلەرىندە ورنالاسقان. 7 عاسىرلىق تاريحى بار قامال جىل سايىن كوپتەگەن يراندىق جانە شەتەلدىك تۋريستەردى قابىلدايدى، - دەپ جازادى يراننىڭ «Parstoday» اقپارات اگەنتتىگى.
اتالعان اقپارات اگەنتتىگىنىڭ وسى ماقالاسىندا لۋريستان وبلىسىنىڭ اسىل تاسى «فالاك ۋل- افلاك» قامالى جايلى كەڭىنەن باياندايدى.
يراندىق باسىلىمنىڭ دەرەگىنشە، «12 مۇنارا» دەگەن اتپەن دە تانىمال «فالاك ۋل- افلاك» قامالى - حورراماباد قالاسىنىڭ ورتاسىنداعى كونە توبەلەردىڭ ۇستىندە ورنالاسقان. ول 651 -جىلى ساسانيلەر زامانىندا سالىنعان ەكەن. تاريحي دەرەكتەر بويىنشا، قامال كوبىنە ءتۇرلى پاتشالار ورنالاسقان رەزيدەنسيا بولعان. كەيبىر تاريحي كەزەڭدەردە ونى تۇرمە رەتىندە دە پايدالانعان.
اتالعان تاريحي قامالدىڭ جوباسى تۋرالى ايتار بولساق، قامال 5300 شارشى مەتر اۋداندى الىپ جاتىر. تاس، كىرپىش، شيكى كىرپىش، الەباستر مەن اكتاستان سالىنعان.
ايتا كەتەيىك، «فالاك ۋل- افلاك» ءسوزى «اسپانداردىڭ اسپانى» دەگەن ماعىنا بەرەدى. بۇل اتاۋ قادجارلار زامانىندا (1789-1925) وسى قامالعا بەرىلگەن. سول زاماننان بۇگىنگە جەتىپ وتىر. شىن مانىندە قامالدىڭ اتاۋى كىرەبەرىس قاقپاسىندا اسپاننىڭ ون ەكى شوقجۇلدىزىن بىلدىرەتىن 12 مۇنارانىڭ بولۋىمەن بايلانىستى بولۋى مۇمكىن. بۇدان بولەك، قامال اتاۋى وعان قول جەتكىزۋدىڭ قيىندىعىن بىلدىرەتىن مەتافورا بولۋى ىقتيمال. اتالعان «اسپانداردىڭ اسپانى» تۋرالى جازىلعان ماقالانى «Parstoday» اقپارات اگەنتتىگىنەن تولىقتاي وقي الاسىز.
اۆتور
بەيسەن سۇلتان
