ءماجىلىس ساۋساق ءىزىن تاپسىرۋ مىندەتى تۋرالى باستامانى زاڭنان الىپ تاستادى

ءماجىلىس ءتولقۇجات پەن جەكە كۋالىك راسىمدەيتىن ازاماتتاردى ساۋساق ءىزىن تاپسىرۋعا مىندەتتەۋ تۋرالى باستامانى زاڭنان الىپ تاستادى. ءبىراق بۇل تالاپ شەتەلدىك ازاماتتار ءۇشىن مىندەتتى بولىپ قالادى، دەپ حابارلايدى Kazinform.

«مەملەكەتتىك كورپوراتسيا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكىنشى وقىلىمدا تالقىلاعان دەپۋتاتتار وسىنداي شەشىم قابىلدادى.

جالپى اتالعان زاڭ جوباسىندا 17 زاڭنامالىق اكتىگە، ونىڭ ىشىندە قازاقستان رەسپۋبليكاسىنىڭ 5 كودەكسىنە جانە 12 زاڭىنا وزگەرىستەر مەن تولىقتىرۋلار ەنگىزۋ كوزدەلگەن.

جالپى بۇل زاڭ جوباسى 2023-جىلعى 4- قازاندا ءبىرىنشى وقىلىمدا ماقۇلدانعان بولاتىن. بۇل جولى دەپۋتاتتار بىرنەشە تۇزەتۋلەر قوسىپ وتىر.

ول تۇزەتۋلەردىڭ نەگىزگى تەزيستەرى مىنانداي:

- «ازاماتتارعا ارنالعان ۇكىمەت» مەملەكەتتىك كورپوراتسياسى» كوممەرتسيالىق ەمەس اكسيونەرلىك قوعامى قىزمەتكەرلەرىنىڭ ساناتتارىن ناقتىلاۋ؛

- وتىنىشتەردى كاسىپكەرلىك سۋبەكتىلەرى ارقىلى ارىپتەستىك كەلىسىمدەر نەگىزىندە قابىلداۋ جانە مەملەكەتتىك قىزمەت كورسەتۋدىڭ دايىن ناتيجەلەرىن بەرۋ مۇمكىندىگىن ۇسىنۋ؛

- مەملەكەتتىك كورپوراتسيانىڭ كورسەتىلەتىن قىزمەتتى الۋشىنىڭ قالاۋى بويىنشا جەكە اقىعا قوسىمشا سەرۆيستىك قىزمەتتەر كورسەتۋ؛

- «استانا حاب» حالىقارالىق تەحنولوگيالىق پاركى قاتىسۋشىلارىن ورنالاستىرۋ تالاپتارىن وڭتايلاندىرۋ؛

- قازاقستان رەسپۋبليكاسى ازاماتتارىنىڭ جەكە كۋالىگىن جانە (نەمەسە) قازاقستان رەسپۋبليكاسى ازاماتىنىڭ پاسپورتىن العان كەزدە داكتيلوسكوپيالىق تىركەۋدەن ءوتۋ مىندەتتىلىگىن الىپ تاستاۋ.

«قۇجاتتاردى العان كەزدە داكتيلوسكوپيالىق تىركەۋدەن ءوتۋ مىندەتتىلىگى الىنىپ تاستالادى. قازاقستاندىقتار تىركەۋدەن ءوز ەركىمەن وتە الادى. بۇل رەتتە داكتيلوسكوپيا شەتەلدىك ازاماتتار ءۇشىن مىندەتتى بولىپ تابىلادى»، - دەدى ءماجىلىس دەپۋتاتى ەكاتەرينا سمىشليايەۆا.

دەپۋتاتتار زاڭدى قابىلداپ، سەنات ماقۇلداۋىنا جىبەرۋ تۋرالى شەشىم قابىلدادى.