ءماجىلىس مەملەكەتتىڭ قاۋىپسىزدىگىن قامتاماسىز ەتەتىن قۇرىلىمدار قىزمەتىنىڭ تيىمدىلىگىن ارتتىرماق

سونىمەن الدىمەن ءماجىلىس اكىمشىلىك قۇقىق بۇزۋشىلىق تۋرالى كودەكسكە جانە ارناۋلى مەملەكەتتىك ورگانداردىڭ قىزمەتى ماسەلەلەرى بويىنشا ءبىرقاتار زاڭنامالىق اكتىگە ەنگىزىلەتىن تۇزەتۋلەردى ءبىرىنشى وقىلىمدا قارايدى.

بۇل زاڭ جوباسىن ءماجىلىس وسى جىلدىڭ 4-اقپانىندا جۇمىسقا قابىلداعان بولاتىن. سول كەزدە حالىقارالىق ىستەر، قورعانىس جانە قاۋىپسىزدىك كوميتەتىنىڭ ءتوراعاسى ايگۇل قۇسپان ۇسىنىلعان زاڭ جوبالارى پارلامەنتتىڭ ءبىر توپ دەپۋتاتىنىڭ باستاماسىمەن ازىرلەنگەنىن ايتتى.

- نەگىزگى زاڭ جوباسى قازاقستان رەسپۋبليكاسىنىڭ ارناۋى مەملەكەتتىك ورگاندارىندا قىزمەت وتكەرۋگە قاتىستى زاڭنامانى ودان ارى جەتىلدىرۋدى كوزدەيدى. ىلەسپە زاڭ جوباسى مەملەكەتتىك قۇپيالاردى قورعاۋ سالاسىنداعى، سونىمەن قاتار اسكەري كولىك قۇرالدارىن پايدالانۋعا بايلانىستى قۇقىق بۇزۋشىلىقتاردىڭ الدىن الۋ نەمەسە بولدىرماۋعا باعىتتالعان، - دەدى ءماجىلىس دەپۋتاتى.

تۇزەتۋلەر مەملەكەتتىڭ قاۋىپسىزدىگىن قامتاماسىز ەتەتىن قۇرىلىمدار قىزمەتىنىڭ تيىمدىلىگىن ارتتىرۋعا، قۇقىق قولدانۋ پراكتيكاسى بارىسىندا انىقتالعان قۇقىقتىق ولقىلىقتاردى جويۋعا، سونداي-اق نورمالاردى قولدانىستاعى زاڭناماعا سايكەستەندىرۋگە باعىتتالعان.

بۇدان بولەك، دەپۋتاتتار قازاقستان مەن حالىقارالىق ۆاليۋتا قورى اراسىنداعى كاۆكاز، ورتالىق ازيا جانە موڭعوليا ءۇشىن الەۋەتتى دامىتۋدىڭ وڭىرلىك ورتالىعىنا قاتىستى ءوزارا تۇسىنىستىك جونىندەگى مەموراندۋمدى قارايدى.

2024 -جىلعى 23-قازاندا ۆاشينگتوندا قول قويىلعان قۇجات الماتىدا ورنالاسقان ورتالىقتىڭ جۇمىسىن رەتتەيدى. ال وڭىرلىك ورتالىقتى قازاقستاندا ورنالاستىرۋ تۋرالى شەشىمدى حالىقارالىق ۆاليۋتا قورى 2019 -جىلدىڭ قازان ايىندا قازاقستاننان، وزبەكستاننان جانە گرۋزيادان تۇسكەن وتىنىمدەردى قاراعاننان كەيىن قابىلداعان ەدى.

الەۋەتتى دامىتۋدىڭ وڭىرلىك ورتالىعىنىڭ قىزمەتى ماكروەكونوميكالىق تالداۋ، اقشا- كرەديت جانە بيۋدجەت ساياساتى، قارجىلىق رەتتەۋ مەن قاداعالاۋ، ماكروەكونوميكالىق ستاتيستيكا ماسەلەلەرى بويىنشا قازاقستان رەسپۋبليكاسىنىڭ مەملەكەتتىك ورگاندارى قىزمەتكەرلەرىنىڭ كاسىپتىك داعدىلارىن دامىتۋعا جانە كاسىپتىك قۇزىرەتىن ارتتىرۋعا ىقپال ەتەتىن بولادى.

سونىمەن قاتار ول كاۆكاز، ورتالىق ازيا جانە موڭعوليا ءوڭىرىنىڭ ەلدەرى اراسىندا ءبىلىم مەن تاجىريبە الماسۋ الاڭىنا اينالادى جانە ودان ءارى وڭىرلىك ينتەگراتسياعا، ەكىجاقتى جانە كوپجاقتى ىنتىماقتاستىقتى كەڭەيتۋگە وڭ اسەرىن تيگىزەدى.

بۇل ورتالىقتىڭ باعدارلامالارى بەنەفيتسيار ەلدەردە (قازاقستان، ارمەنيا، ازەربايجان، گرۋزيا، قىرعىزستان، موڭعوليا، تاجىكستان، تۇرىكمەنستان جانە وزبەكستان) مىقتى ينستيتۋتتار قۇرۋعا، ماكروەكونوميكالىق تالداۋ، اقشا- نەسيە جانە بيۋدجەت ساياساتى، قارجىلىق رەتتەۋ جانە قاداعالاۋ، ماكروەكونوميكالىق ستاتيستيكا ماسەلەلەرى بويىنشا مەملەكەتتىك ورگاندار قىزمەتكەرلەرىنىڭ كاسىبي داعدىلارى مەن قۇزىرەتتەرىن دامىتۋعا جانە ارتتىرۋعا ىقپال ەتۋگە باعىتتالعان.

سونداي-اق، ءماجىلىستىڭ «قازاقستان رەسپۋبليكاسىنداعى كەدەندىك رەتتەۋ تۋرالى» كودەكسكە تۇزەتۋلەر ەنگىزۋ جانە 2014 -جىلعى 29-مامىرداعى ەۋرازيالىق ەكونوميكالىق وداق تۋرالى شارتقا وزگەرىستەر ەنگىزۋ سىندى جاڭا زاڭ جوبالارىن جۇمىسقا قابىلداۋى جوسپارلانعان.

ەستەرىڭىزگە سالا كەتسەك، وتكەن اپتادا ءماجىلىس سپيكەرى ەرلان قوشانوۆتىڭ توراعالىعىمەن وتكەن پارلامەنت پالاتالارىنىڭ بىرلەسكەن وتىرىسىندا «الاتاۋ قالاسىنىڭ ارناۋلى قۇقىقتىق رەجيمى تۋرالى» كونستيتۋتسيالىق زاڭ ەكىنشى وقىلىمدا قابىلداندى. زاڭ جوباسى بويىنشا نەگىزگى باياندامانى پارلامەنت پالاتالارىنىڭ بىرلەسكەن كوميسسياسىنىڭ ءتوراعاسى، ءماجىلىس دەپۋتاتى نۇرتاي سابيليانوۆ جاسادى.

- ەكىنشى وقىلىمعا دايىنداۋ بارىسىندا بىرلەسكەن كوميسسيا پارلامەنت دەپۋتاتتارى مەن تۇراقتى كوميتەتتەردىڭ ۇسىنىستارىن قاراپ، جان-جاقتى تالقىلادى. دەپۋتاتتاردىڭ تۇزەتۋلەرى بويىنشا زاڭ جوباسىنىڭ نورمالارى جاڭا كونستيتۋتسيا ەرەجەلەرىنە سايكەس كەلتىرىلدى. قۇجاتتىڭ اتاۋى ەندى «الاتاۋ قالاسىنىڭ ارناۋلى قۇقىقتىق رەجيمى تۋرالى» ق ر كونستيتۋتسيالىق زاڭى بولىپ وزگەرتىلدى، - دەدى ءماجىلىس دەپۋتاتى نۇرتاي سابيليانوۆ.

كونستيتۋتسيالىق زاڭ اياسىندا كاسىپكەرلەر مەن ينۆەستورلار قۇقىقتارىنىڭ قورعالۋىن كۇشەيتۋگە ەرەكشە نازار اۋدارىلدى. بيزنەس سۋبەكتىلەرىنە قاتىستى تەكسەرۋ جۇرگىزۋدى تەك قانا باس پروكۋراتۋرا ورگاندارىنىڭ جۇرگىزە الاتىنى تۋرالى نورما ەنگىزىلدى. بۇل ىسكەرلىك ورتانىڭ تۇراقتى ءارى بولجامدى بولۋىنا قوسىمشا كەپىلدىك بەرەدى.

بۇدان بولەك، دەپۋتاتتار بيۋدجەت قاراجاتىنىڭ پايدالانىلۋىن باقىلاۋدى كۇشەيتۋگە قاتىستى تۇزەتۋلەر ەنگىزدى. ەندى ۇكىمەت پەن جوعارى اۋديتورلىق پالاتانىڭ قازاقستان رەسپۋبليكاسىنىڭ قۇرىلتايىنا ۇسىنىلاتىن جىل سايىنعى ەسەپتەرىنىڭ قۇرامىنا الاتاۋ قالاسى اكىمشىلىگىنىڭ رەسپۋبليكالىق بيۋدجەت قاراجاتى بويىنشا بيۋدجەتتىڭ اتقارىلۋى تۋرالى ەسەبى ەنگىزىلەتىن بولادى. سونداي-اق، اكىمشىلىكتىڭ بيۋدجەتتىڭ اتقارىلۋى تۋرالى ەسەبى مەن الاتاۋ قالاسىن دامىتۋ تۋرالى جىلدىق ەسەپتى ينتەرنەت- رەسۋرستاردا جاريالاپ وتىرۋدىڭ مىندەتتى بولۋى قاراستىرىلدى.

- دەپۋتاتتاردىڭ تۇزەتۋلەرىندە اكىمشىلىكتىڭ لاۋازىمدى ادامدارىنىڭ (باس اتقارۋشى ديرەكتور مەن اكىمشىلىك قىزمەتشىلەرىنىڭ)، سونداي-اق الاتاۋ قالاسىنىڭ اكىمى مەن ونىڭ ورىنباسارلارىنىڭ وكىلەتتىكتەرىن جۇزەگە اسىرۋ كەزىندەگى جاۋاپكەرشىلىگىن ەنگىزۋ كوزدەلدى.

سونىمەن قاتار، «ينكليۋزيۆتى پارلامەنت» دەپۋتاتتىق توبىنىڭ باسشىسى - دەپۋتات ەرلان ابديەۆ حالىقتىڭ ءجۇرىپ-تۇرۋى شەكتەلگەن توپتارىنىڭ قالا ىشىندە ەركىن قوزعالىسىنا قولايلى جاعداي جاساۋعا قاتىستى تۇزەتۋلەر ەنگىزدى. سونداي-اق، ول ساۋلەت جانە قالا قۇرىلىسى قىزمەتىن رەتتەۋ كەزىندە ينكليۋزيۆتى ءارى جايلى ورتا قالىپتاستىرۋ ءۇشىن ۋنيۆەرسالدى ديزايندى قولدانۋدى دا ۇسىنادى. زاڭ جوباسىن جەتىلدىرۋگە قاتىستى باسقا دا ۇسىنىستار قاراستىرىلدى، - دەدى دەپۋتات.

اۆتور

مارلان جيەمباي