ءماجىلىس «ماسس-مەديا» تۋرالى زاڭ جوباسىن ماقۇلدادى
ءماجىلىس «ماسس-مەديا» تۋرالى زاڭ جوباسىن ءبىرىنشى وقىلىمدا ماقۇلدادى، دەپ حابارلايدى Kazinform.
قۇجاتتى تانىستىرعان مادەنيەت جانە اقپارات ءمينيسترى ايدا بالايەۆا مەملەكەتتىك ورگانداردىڭ ب ا ق- تىڭ رەسمي ساۋالىنا جاۋاپ بەرۋ مەرزىمىن 7 كۇننەن 5 كۇنگە قىسقارتۋ نورماسى ەۋروپا قاۋىپسىزدىك جانە ىنتىماقتاستىق ۇيىمىنىڭ تاراپىنان وڭ باعالانعانىن ايتىپ قالدى.
«زاڭ جوباسىندا «ماسس-مەديا»، «گرانت»، «ءبىرىڭعاي مەديا پلاتفورما»، «جۋرناليستەردىڭ قۇقىقتارى تۋرالى ۇلتتىق بايانداما» دەگەن ۇعىمدار ەنگىزىلەدى»، - دەدى مينيستر.
ا. بالايەۆانىڭ سوزىنشە، زاڭ جوباسىندا مىناداي باعىتتاعى نورمالار ۇسىنىلىپ وتىر:
بۇقارالىق اقپارات قۇرالدارىنىڭ ماتەريالدارىنا قويىلاتىن ەسكىرۋ مەرزىمىن ءۇش جىل دەپ بەلگىلەۋ؛
بۇقارالىق اقپارات قۇرالدارىنىڭ سۇراۋ سالۋلارىن قاراۋدى جەتى جۇمىس كۇنىنەن بەس جۇمىس كۇنىنە دەيىن قىسقارتۋ؛
جۋرناليستەردىڭ قۇقىقتارى مەن بوستاندىقتارىنىڭ ساقتالۋى تۋرالى ۇلتتىق باياندامانى دايىنداۋ.
باسپا ءسوز كارتاسىن ەنگىزۋ؛
وتاندىق تەلەراديو حابار تاراتاتىن سپۋتنيكتىك وپەراتورلاردىڭ شىعىندارىنىڭ ءبىر بولىگىن سۋبسيديالاۋ؛
2025-جىلدان باستاپ رەسپۋبليكالىق دەڭگەيدە گرانتتىق قارجىلاندىرۋعا كوشۋ؛
بۇقارالىق اقپارات قۇرالدارىن ەسەپكە قويۋ تەتىگىن جەتىلدىرۋ؛
بۇقارالىق اقپارات قۇرالدارىنىڭ قىزمەتىن ءوزىن-ءوزى رەتتەۋ ماسەلەلەرى جونىندەگى قوعامدىق-كاسىپتىك كەڭەستەر قۇرۋ.
دەپۋتاتتار دا، مينيستر دە تالقىلاۋدا ايتىلعان تۇيتكىلدەر مەن ۇسىنىستاردى ەكىنشى وقىلىمعا دەيىن پىسىقتاپ، ءارقايسىسى بويىنشا ورتاق شەشىم قابىلداۋ تۋرالى پايىمعا كەلدى.
