ءماجىلىس ءتوراعاسى ەلىمىزدە شەشىلمەي جاتقان ماسەلەلەردى اتادى

استانا. KAZINFORM - ۇكىمەت دەپۋتاتتار ايتقان بارلىق ۇسىنىستى ەسكەرىپ، نازارعا الۋعا ءتيىس. بۇل تۋرالى ءماجىلىستىڭ جالپى وتىرىسىندا پالاتا ءتوراعاسى ەرلان قوشانوۆ ايتتى.

«سايلاۋشىلاردىڭ پروبلەمالارىن شەشۋ جۇمىسى جوسپارلى تۇردە جۇرگىزىلىپ جاتقانىن كورىپ وتىرمىز. مۇنى دا ايتىپ ءوتۋ كەرەك. سونىمەن قاتار، شەشىلمەگەن ماسەلەلەر دە بار. بۇل جايىندا بۇگىن دەپۋتاتتار، فراكسيا جەتەكشىلەرى سويلەگەن سوزدەرىندە ايتتى. ۇكىمەت وسى جايتتارعا ەرەكشە نازار اۋدارۋى كەرەك. شاعىن مەكتەپتەر، ءۇش اۋىسىمدى جانە اۆاريالىق كۇيدەگى مەكتەپتەر پروبلەماسىن شەشۋ قاجەت. دەنساۋلىق ساقتاۋ سالاسىن قارجىلاندىرۋ تەتىكتەرى جەتە پىسىقتالماعان. جىلۋ ەلەكتر ورتالىقتارىنا قاتىستى شەشىلمەگەن ماسەلەلەر بار. وڭىرلەردە ولاردىڭ 80 پايىزعا جۋىعى توزعان. سۋمەن جابدىقتاۋ ماسەلەسىندە دە جاعداي وسىنداي»، - دەدى ە. قوشانوۆ.

ونىڭ پايىمىنشا، اۋىل شارۋاشىلىعى قاجەتتىلىگى ءۇشىن سۋمەن جابدىقتاۋ جانە ازاماتتاردى تازا اۋىز سۋمەن قامتاماسىز ەتۋ جايى اسا ءماز ەمەس. ۇنەمى كوتەرىلىپ جۇرگەن، ۇلكەن پروبلەمانىڭ تاعى ءبىرى - جولداردىڭ احۋالىنا قاتىستى. جالپى، بۇل ايتىلعان پروبلەمالار بيىل عانا پايدا بولىپ وتىرعان جوق.

«ولاردى شەشۋ ءۇشىن جۇيەلى، تۇراقتى شارالار قابىلداۋ قاجەت. قوردالانعان وسى پروبلەمالاردى ۋاقتىلى شەشۋ - حالىقتىڭ ءومىر ءسۇرۋ ساپاسىنا تىكەلەي اسەر ەتەتىنىن ەستەن شىعارماۋىمىز كەرەك. ال ازاماتتاردىڭ ءال- اۋقاتىن ارتتىرۋ - ۇكىمەتتىڭ، جەرگىلىكتى اتقارۋشى ورگاندار مەن دەپۋتاتتاردىڭ، ياعني ءبىزدىڭ ورتاق مىندەتىمىز. ۇكىمەت دەپۋتاتتار ايتقان بارلىق ۇسىنىستى ەسكەرىپ، نازارعا الۋعا ءتيىس. جالپى، سايلاۋشىلاردىڭ وزەكتى ماسەلەلەرى بويىنشا ۇكىمەتتىڭ جاريا ەسەبى تيىمدىلىگىن كورسەتتى. سوندىقتان مۇنداي جۇمىس فورماتىن كەلەشەكتە جالعاستىراتىن بولامىز. وتكەن سەسسيادا جوعارى اۋديتورلىق پالاتا ءتوراعاسىنىڭ سۋ ماسەلەلەرى جونىندەگى، سونداي-اق كولىك سالاسىنا قاتىستى ەسەبىن ەكى رەت تىڭدادىق. وسىلايشا، جاڭا كونستيتۋتسيالىق نورمانىڭ ارقاسىندا دەپۋتاتتار رەسپۋبليكالىق بيۋدجەتتىڭ اتقارىلۋى ساپاسىنا پارلامەنتتىك باقىلاۋدى كۇشەيتتى»، - دەدى ءماجىلىس ءتوراعاسى.

سونىمەن قاتار ول وسى پارلامەنتتىك سەسسيانى قورىتىندىلادى.

«ارىپتەستەر، پارلامەنتتىك سەسسيا اياقتالدى. ءبىراق، بۇل تەك زاڭ قابىلداۋ جۇمىسىندا عانا ەكى اي ءۇزىلىس بولاتىنىن بىلدىرەدى. ال دەپۋتاتتاردىڭ قىزمەتى جالعاسا بەرەدى. وڭىرلەرگە بارىپ، جۇرتشىلىقپەن جۇزدەسەتىن بولامىز. ەل پرەزيدەنتى دەپۋتاتتاردىڭ وڭىرلەرگە بارىپ جۇمىس ىستەۋى ماڭىزدى ەكەنىن اتاپ ءوتتى. سايلاۋشىلاردىڭ مۇڭ- مۇقتاجىن ءوز اۋزىنان تىڭداپ- ءبىلۋ - بىزگە بەرىلگەن زور مۇمكىندىك. بولاشاقتا مۇنىڭ ءبارى جاڭا زاڭنامالىق باستامالار مەن دەپۋتاتتىق ساۋالدارعا نەگىز بولادى. سىزدەرگە سەسسيا بارىسىندا ناتيجەلى جۇمىس ىستەگەندەرىڭىز ءۇشىن راقمەت ايتقىم كەلەدى. بىرلەسە جۇمىس اتقارعانى ءۇشىن ۇكىمەتكە تاعى دا العىس ايتامىن. جۇمىسىمىزدى وبەكتيۆتى تۇردە جاريالاپ- كورسەتكەن بۇقارالىق اقپارات قۇرالدارى وكىلدەرىنە دە ەرەكشە ريزاشىلىق بىلدىرەمىن»، - دەدى ەرلان قوشانوۆ.