ءۇش جىلدا بيۋدجەت تاپشىلىعىن ەكى ەسەگە جۋىق تومەندەتەمىز - ولجاس بەكتەنوۆ

استانا. KAZINFORM — پرەمەر- مينيستر ولجاس بەكتەنوۆ پارلامەنت پالاتالارىنىڭ بىرلەسكەن وتىرىسىندا بيۋدجەت تاپشىلىعىن قالاي تومەندەتەتىندەرىن ايتتى.

- جالپى ەكونوميكالىق احۋال تۇراقتى. ءبىراق ءسىز ايتىپ وتكەن ماسەلەلەر جوق ەمەس، بار. ولار ءبىر كۇندە پايدا بولعان ماسەلە ەمەس، بىرنەشە جىلدار بويى قالىپتاسىپ جاتقان پروبلەما. ۇكىمەت ونىڭ ءبارىن شەشۋ ءۇشىن بەلسەندى جۇمىس اتقارىپ جاتىر. ۇكىمەتتىڭ باستاماسىمەن ەلىمىزدە سالىق رەفورماسى ءجۇرىپ جاتىر.

 وسى جۋىردا عانا جاڭا سالىق كودەكسى قابىلداندى. جاڭا سالىق كودەكسىنىڭ ارقاسىندا ءبىز كەلەسى جىلدان باستاپ رەسپۋبليكالىق بيۋدجەتكە شامامەن 3 تريلليون تەڭگەدەن استام قوسىمشا ءتۇسىم تۇسەدى دەپ ەسەپتەيمىز. بۇل اقشانىڭ ءبارى تەك دامۋ ماقساتتارىنا باعىتتالادى. ياعني كەزەكتە ينفراقۇرىلىمدىق نىسانداردى ىسكە قوسۋ، ەلەكتر قۋاتى كوزدەرىن، اۆتوموبيل جانە تەمىرجول جەلىسىن دامىتۋ، ينجەنەرلىك جەلىلەردى جاڭعىرتۋ سياقتى وتە ماڭىزدى مىندەتتەرگە جولدانادى. بۇل سالالار ۇزاق مەرزىمدى، تۇراقتى ەكونوميكالىق ءوسىمدى قامتاماسىز ەتۋگە نەگىز قالايدى، - دەدى ول دەپۋتات ەرلان سايروۆتىڭ سۇراعىنا بەرگەن جاۋابىندا.

ايتۋىنشا، ۇكىمەت وسى باعىتتاردا بەلسەندى ءارى ءتيىمدى جۇمىس جاساسا، ەلىمىزدە تۇراقتى ەكونوميكالىق ءوسىم بولادى.

- وسىنىڭ ناتيجەسىندە سالىق بازاسى كەڭەيىپ، رەسپۋبليكالىق بيۋدجەتكە قوسىمشا قايتادان تۇسىمدەر تۇسەدى. سونىڭ ارقاسىندا مەملەكەت ءوز مىندەتتەمەلەرىن ءارى قاراي دا مىندەتتى تۇردە ورىندايدى. قازىر ءبىز كەلەسى 3 جىلعا ارنالعان رەسپۋبليكالىق بيۋدجەت جوباسىن دايىنداپ جاتىرمىز. وتە قىزۋ جۇمىس ءجۇرىپ جاتىر. الدىن الا ايتاتىنىم، ءبىز 2026 -جىلى بيۋدجەت تاپشىلىعىن قازىرگى 2,7 پايىزدان 2,5 پايىزعا دەيىن، 2027 -جىلى 1,8 پايىزعا دەيىن، 2028 -جىلى 1,4 پايىزعا دەيىن تومەندەتەمىز دەپ جوسپارلاپ جاتىرمىز، - دەدى ۇكىمەت باسشىسى.

ايتا كەتەيىك، ۇكىمەت ۇيىندە پارلامەنت پالاتالارىنىڭ بىرلەسكەن وتىرىسى ءوتىپ جاتىر.