ءۇش جىلدا قانشا جاس عالىم باسپانالى بولدى

ۆەدومستۆو مالىمەتىنشە، جاس عالىمداردى قولداۋعا باعىتتالعان «جاس عالىم» گرانتتىق باعدارلاماسى اياسىندا 2022-2025-جىلدارى جالپى سوماسى 23,16 ميلليارد تەڭگە بولاتىن 941 جوبا ماقۇلداندى. باعدارلاما عىلىمداعى دارىندى جاستاردى قولداۋعا، تاۋەلسىز زەرتتەۋ توپتارىن دامىتۋعا جانە عىلىمي كوشباسشىلاردىڭ جاڭا بۋىنىن قالىپتاستىرۋعا باعىتتالعان.

جوبالاردى قارجىلاندىرۋ كولەمى دە ارتقان. اتاپ ايتقاندا، قولدانىستاعى جوبالاردى قارجىلاندىرۋ 2023-جىلعى 2,75 ميلليارد تەڭگەدەن 2025-جىلى 7,58 ميلليارد تەڭگەگە دەيىن ءوستى.

- سونىمەن قاتار جاس عالىمداردى تۇرعىن ۇيمەن قامتاماسىز ەتۋ بويىنشا دا شارالار قابىلدانىپ جاتىر. مەملەكەت باسشىسىنىڭ تاپسىرماسىنا سايكەس، 803 جاس عالىم باسپانالى بولدى. ونىڭ ىشىندە 2023-2026-جىلدارى «وتباسى بانك» ا ق ارقىلى ىسكە اسىرىلاتىن نەسيە باعدارلاماسى شەڭبەرىندە 660 پاتەر بەرىلدى. ال 2024-2026-جىلدارى الماتى قالاسىندا 143 جاس عالىمعا پاتەر تەگىن تابىستالدى، - دەپ اتاپ ءوتتى مينيسترلىكتەن اگەنتتىكتىڭ رەسمي ساۋالىنا وراي.

بۇعان دەيىن جاس زەرتتەۋشىلەر ەلەكتر جەلىلەرىنە ارنالعان ج ي جانە قاتەرلى ىسىكتى ەمدەيتىن نانوگەل ازىرلەپ جاتقانىن جازعان ەدىك.