ءبىرقاتار ەل تەگىن قوعامدىق كولىك جوباسىن جۇزەگە اسىرا باستادى

استانا. قازاقپارات - قازىرگى زاماندا تەگىن ءسوزىن ەستۋ سيرەك كەزدەسەتىن قۇبىلىس. باعا ارزاندادى دەگەننىڭ وزىنە كوبى سەنبەيدى. ايتەۋىر استارىنان ءبىر قيتۇرقىلىق ىزدەپ تۇرادى. ال وسى ساتتە الەمنىڭ ءبىرقاتار ەلى ازاماتتاردى قوعامدىق كولىكتەرمەن تەگىن تاسىمالداۋ جوباسىن جۇزەگە اسىرا باستاعان.

بيلىك وكىلدەرىنىڭ مۇنداعى ماقساتى نە؟ ليۋكسەمبۋرگ ليۋكسەمبۋرگ - قوعامدىق كولىكتى تەگىن ەتكەن الەمدەگى العاشقى ەلدەردىڭ ءبىرى. پويىز، ترامۆاي، تروللەيبۋستا اقى تولەۋ 2020 -جىلدان باستاپ جويىلعان. ءبىر قىزىعى، بۇل ەرەجە تەك ەل تۇرعىندارىنا عانا ەمەس، وسى مەملەكەتكە كەلەتىن تۋريستەر مەن مەيماندارعا دا قاتىستى. ەل بيلىگىنىڭ مۇنداي ءمارت قادامعا بارۋىنا كەپتەلىس ماسەلەسى تۇرتكى بولعان.

ليۋكسەمبۋرگتە بۇل ەڭ وزەكتى تۇيتكىلدىڭ ءبىرى. حالىق سانى 650 مىڭنان ءسال اسقانىمەن، ونىڭ 110 مىڭعا جۋىعى - ەل استاناسىندا تۇرادى. بۇدان بولەك ءجۇز مىڭداعان ازامات ءناپاقا تابۋ ءۇشىن كورشى ەلدەردەن كەلەدى. وسىنشا ادام اتالعان شاعىن ەلدىڭ اۋماعىن كەپتەلىسپەن «سال» قىلىپ تاستايدى دەيدى جەرگىلىكتى بيلىك وكىلدەرى.

ەستونيا استاناسى تاللين قالاسىنىڭ تۇرعىندارى ءۇشىن دە قوعامدىق كولىك تەگىن. ازاماتتار كولىك كارتاسىن تولەسە جەتكىلىكتى. جىلىنا ءبىر رەت شىعارىلاتىن بۇل كارتا نەبارى 2 ەۋرو تۇرادى. بيلىك وكىلدەرىنىڭ ايتۋىنشا، وسىنداي شەشىمنىڭ ارقاسىندا تالليندىكتەر اراسىندا اۆتوبۋس پەن تروللەيبۋسقا دەگەن سۇرانىس ارتقان. دەسە دە تۇپكى ماقساتقا ءالى دە قول جەتكىزە الماي كەلەمىز دەيدى شاھار باسشىلىعى. ياعني كوشەدەگى اۆتوكولىكتەر سانى ازايماعان. كەرىسىنشە، تەمىر تۇلپار قوزعالىسىنىڭ جيىلىگى 42 پايىزدان 48 پروتسەنتكە دەيىن ارتىپ كەتكەن.

ال فرانسيانىڭ مونپەلە قالاسىندا بيلەتسىز جول ءجۇرۋ ەرەجەسى وسىدان جارتى جىل بۇرىن عانا ىسكە قوسىلدى. ءبىراق ول جەرگىلىكتى تۇرعىندارعا عانا ارنالعان. تۋريستەر شامامەن 1,5 ەۋرو تولەۋى ءتيىس. شاھار شەنەۋنىكتەرىنىڭ ايتۋىنشا، قوعامدىق كولىكپەن تەگىن جۇرۋدەگى ماقسات - اۋانىڭ لاستانۋىن ازايتۋ. جالپى فرانسيادا مۇنداي شارانى قابىلداعان جالعىز مونپەلە ەمەس. ديۋنكەركتە بۇل ەرەجە وسىدان 6 جىل بۇرىن ەنگىزىلگەن. سودان بەرى جولاۋشىلار قاتارى 85 پايىزعا ارتقان.

پولشانىڭ 50 قالاسىندا قوعامدىق كولىكپەن تەگىن ءجۇرۋ تولىق جانە ءىشىنارا ۇيىمداستىرىلعان. ءبىرسىپىراسىندا قالا تۇرعىندارى اقى تولەۋدەن تولىعىمەن بوساتىلسا، ەندى بىرىندە بۇل يگىلىكتى تەك جۇمىسى جوقتار عانا پايدالانا الادى. باسقا 100 پايىزدىق جەڭىلدىك تەك مۇگەدەكتەرگە، وقۋشىلارعا جاسالعان.

بەلگيا ءوز كەزەگىندە بەلگيانىڭ حاسسەلت قالاسىندا 1997-2014 -جىلدار ارالىعىندا بارلىق قالالىق كولىكتەردە ءجۇرۋ تەگىن بولدى. ءبىراق قارجى تاپشىلىعىنان بۇل جوبا الىنىپ تاستالعان. بۇگىندە قالالىقتار اۋا قاتتى لاستانعان ۋاقىتتا عانا قوعامدىق كولىكتەرمەن تەگىن جۇرە الادى. ەكولوگيالىق جاعدايدىڭ بۇزىلعانىن ازاماتتار موبيلدى قوسىمشالار ارقىلى بايقاپ وتىرادى.

24.kz