ءبىر ميلليون ازامات جاساندى ينتەللەكت نەگىزدەرىنە وقىتىلادى

استانا. قازاقپارات - 5 جىل ىشىندە 1 ميلليون ازاماتتى جاساندى ينتەللەكت نەگىزدەرىنە وقىتۋ جوسپارلانۋدا. ەلىمىزدىڭ 20 جوعارى وقۋ ورنىندا ءتيىستى ءبىلىم بەرۋ باعدارلامالارى ەنگىزىلدى. بۇل تۋرالى ۇكىمەتتىڭ باسپا ءسوز قىزمەتى حابارلادى.

پرەزيدەنتى قاسىم-جومارت توقايەۆتىڭ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى سيفرلىق وزگەرىستەر ارقىلى شەشۋ» اتتى قازاقستان حالقىنا جولداۋىنداعى بەرگەن تاپسىرمالارىن جۇزەگە اسىرۋ شەڭبەرىندە ۇكىمەت ەكونوميكانىڭ تۇراقتى دامۋى ءۇشىن نەگىز قالىپتاستىراتىن سيفرلىق تەحنولوگيالاردى ەنگىزۋ بويىنشا قارقىندى جۇمىس ىستەلىپ جاتىر.

ونى پرەمەر-ءمينيستردىڭ باسشىلىعىمەن ارنايى قۇرىلعان سيفرلىق شتاب ۇيلەستىرەدى. بۇگىنگى تاڭدا مەملەكەتتىك قىزمەتتەردى سيفرلاندىرۋ، IT- يندۋستريا، جاساندى ينتەللەكت، وڭىرلەردى ينتەرنەت بايلانىسپەن قامتاماسىز ەتۋ جانە تاعى دا باسقا سالالاردا تۇراقتى پروگرەسس بايقالادى.

جاساندى ينتەللەكت: ستراتەگيادان جۇزەگە اسىرۋعا دەيىن

مەملەكەت باسشىسىنىڭ تاپسىرماسى بويىنشا ۇكىمەت جاساندى ينتەللەكت ەكوجۇيەسىن دامىتۋ بويىنشا اۋقىمدى جۇمىس ىستەپ جاتىر. ءبىرىنشى كەزەكتە ءتيىستى زاڭنامالىق بازانى قۇرۋعا كوڭىل بولىنەدى. سەناتتا تەحنولوگيالاردى ءقاۋىپسىز جانە ءتيىمدى دامىتۋدىڭ قۇقىقتىق نەگىزدەرىن قالىپتاستىرۋعا باعىتتالعان «جاساندى ينتەللەكت تۋرالى» زاڭ جوباسى قارالىپ جاتىر.

بيىلعى قازان ايىندا ماڭىزدى وقيعا - يدەيالار مەن يننوۆاتسيالار فابريكاسى بولۋعا ارنالعان حالىقارالىق Alem.AI ج ي ورتالىعىنىڭ اشىلۋى بولدى. مۇندا ءارتۇرلى حالىقارالىق كومپانيالار ۇسىنىلادى. Alem.AI عىلىمي زەرتتەۋلەر، ستارتاپتار جانە ج ي سالاسىنداعى حالىقارالىق ىنتىماقتاستىق ءۇشىن نەگىزگى پلاتفورما بولۋعا ءتيىس. ورتالىقتىڭ قىزمەتى سيفرلاندىرۋ سالاسىنداعى قازاقستاندىق شەشىمدەردىڭ ەكسپورتىن كەڭەيتۋدى قامتاماسىز ەتەدى، بۇل تەحنولوگيالىق جانە ەكونوميكالىق وسۋگە سەرپىن بەرەدى. كەلەشەكتە قازاقستان ورتالىق ازيانىڭ زياتكەرلىك حابىنا اينالۋى ءتيىس.

سونىمەن قاتار 5 جىل ىشىندە 1 ميلليون ازاماتتى جاساندى ينتەللەكت نەگىزدەرىنە وقىتۋ جوسپارلانىپ وتىر. ەلىمىزدىڭ 20 جوعارى وقۋ ورنىندا ءتيىستى ءبىلىم بەرۋ باعدارلامالارى ەنگىزىلدى.

ۇلتتىق سۋپەركومپيۋتەر جانە ج يپلاتفورماسى

قازاقستاندا بيىل ۇلتتىق سۋپەركومپيۋتەرلىك ورتالىق - Alem.cloud ىسكە قوسىلدى. ونىڭ مۇمكىندىكتەرى مەملەكەتتىك ورگاندار، عىلىمي ينستيتۋتتار، جوعارى وقۋ ورىندارى، بيزنەس جانە ستارتاپتار ءۇشىن قولجەتىمدى.

سۋپەركومپيۋتەر مەملەكەتتىك قىزمەتتەردە قولدانىلاتىن قولدانبالى ج ي-مودەلدەرىن، سونىڭ ىشىندە ۇلكەن تىلدىك مودەلدەردى وقىتۋ، ج ي اگەنتتەرىن ازىرلەۋ، دەرەكتەردى تالداۋ، مازمۇندى قۇرۋ جانە مودەلدەۋ مىندەتتەرىن تەستىلەۋ ءۇشىن قولدانىلادى.

سونداي-اق مەملەكەت باسشىسىنىڭ تاپسىرماسى بويىنشا پرەمەر-مينيستر جەتەكشىلىك ەتەتىن سيفرلىق شتاب قۇرىلدى. 200 دەن استام كومپونەنتتەر بويىنشا اقپاراتتىق جۇيەلەردى ينتەگراتسيالاۋدىڭ كەشەندى جوسپارى بەكىتىلدى، بۇل ەڭبەك شىعىندارىن قىسقارتۋعا، قايتالانۋدى جويۋعا جانە مەملەكەتتىك ورگاندار جۇمىسىنىڭ تيىمدىلىگىن ارتتىرۋعا مۇمكىندىك بەرەدى.

دەرەكتەردى قورعاۋ ءۇشىن بارلىق مەملەكەتتىك ورگاننىڭ Aitu قازاقستاندىق مەسسەندجەرىنە كوشۋى جۇزەگە اسىرىلىپ جاتىر. ازاماتتارعا eGov ،eOtinish ،Aitu جانە تاعى دا باسقا قىزمەتتەرگە ءتىپتى ۇيالى بايلانىستىڭ نولدىك تەڭگەرىمىندە دە تەگىن قول جەتكىزۋ قامتاماسىز ەتىلگەن.

IT سەكتورىنىڭ ءوسۋى جانە ستارتاپتاردى قولداۋ

وتاندىق كومپانيالار ۇسىنعان IT قىزمەتتەردىڭ كولەمى 2021 -جىلى 646 ميلليارد تەڭگەدەن 2024 -جىلى 1,74 تريلليون تەڭگەگە دەيىن ءوستى. IT قىزمەتتەرىنىڭ ەكسپورتى 2021 -جىلى $60,07 ميلليوننان 2024 -جىلى $690,7 ميلليونعا دەيىن ءوستى. 2025 -جىلدىڭ ءبىرىنشى جارتىجىلدىعىندا بۇل كورسەتكىش $515,5 ميلليون بولدى.

Astana Hub الاڭىندا ستارتاپتار مەن IT- كومپانيالاردى قولداۋ باعدارلامالارىن جۇزەگە اسىرۋ جالعاسۋدا. بۇگىنگى تاڭدا Astana Hub ەكوجۇيەسى 1832 كومپانيانى بىرىكتىردى، ونىڭ ىشىندە 465 ى شەتەلدىك كومپانيا. قاتىسۋشىلاردىڭ تابىسى 2025 -جىلدىڭ ءبىرىنشى جارتىجىلدىعىندا 368,3 ميلليارد تەڭگە بولدى.

قازاقستان InDrive ،Netcracker ،Playrix ،Telegram جانە تاعى دا باسقا تەحنولوگيالىق الپاۋىتتارمەن بەلسەندى ىنتىماقتاستىق ورناتىپ كەلەدى.

مەملەكەتتىك قىزمەتتەردىڭ ونلاين-فورماتى

مەملەكەتتىك قىزمەتتەردى ەلەكتروندىق فورماتقا كوشىرۋ جۇمىستارى جالعاسۋدا. بۇگىنگى تاڭدا مەملەكەتتىك قىزمەتتەردىڭ %90,4 ى ونلاين رەجيمىندە قول جەتىمدى، ال 1448 قىزمەتتىڭ باسىم كوپشىلىگىن ينتەرنەت ارقىلى الۋعا بولادى.

قىزمەتتەردىڭ %90,6 ى سمارتفوننان قول جەتىمدى، بۇل ۇدەرىستى ازاماتتار ءۇشىن مۇمكىندىگىنشە ىڭعايلى ەتەدى. قاعاز انالوگتارىن تولىعىمەن الماستىراتىن سيفرلىق قۇجاتتاردىڭ 39 ءتۇرى ەنگىزىلدى.

ايتا كەتەلىك مەمورگاندارعا جەكە موبيلدى قوسىمشالار ازىرلەۋگە تىيىم سالىناتىنى تۋرالى جازعان ەدىك.