ءبىر ادامدى ءومىرباقي سۇيۋگە بولا ما؟
استانا. قازاقپارات - ماحاببات - تەك ادەمى ءومىر عانا ەمەس، ول ۇلكەن ءارى اۋىر جۇمىس. ماحاببات ەكى ادامنان ۇزدىكسىز ەڭبەك ەتۋدى تالاپ ەتەدى. ويتكەنى، سەزىمدى دامىتىپ، جەتىلدىرۋ ەكى ادامعا تىكەلەي بايلانىستى.
ارينە، ءبىر ادامدى ءومىرباقي ءسۇيىپ وتۋگە بولادى. ول سانالى ادامنىڭ قول جەتكىزگەن ۇلكەن جەتىستىكتەرىنىڭ ءبىرى ءارى بىرەگەيى. سەبەبى، مۇنداي سەزىم كوبىنەسە اقىلدى، كورگەنى كوپ، بىلگەنى مول تۇلعالارعا ءتان بولادى. ماسەلەن، تانىمال سۋرەتشى نيكولاي رەريح بۇكىل عۇمىرىن سۋرەت ونەرى مەن ومىرلىك جارىنا ارناپ وتكەن. وزىنەن بەس جاس كىشى بولعان جارى ەلەنا يۆانوۆنا سۋرەتشى ءۇشىن ومىرلىك سەرىگى عانا ەمەس، دوسى جانە شابىت سىيلاۋشىسى بولا بىلگەن. دەسە دە، بۇلاردىڭ اراسىندا ءبىر-بىرىنە دەگەن جاۋاپتى ماحاببات بولعان.
ال، تانىمال جازۋشى يۆان تۋرگەنەۆ بۇكىل عۇمىرىن جاۋاپسىز ماحابباتقا ارناعان. ول پولينا ۆياردو ەسىمدى وپەرا انشىسىنە عاشىق بولىپ وتكەن. ءانشىنىڭ ءوز وتباسى بار ەكەنىن بىلسە دە، 40 جىل عاشىق بولعان جازۋشى عاشىعىن كورۋ ءۇشىن قارتايعان كەزىندە دە، اۋلا سىپىرۋشىسى بولۋعا دا كەلىسەر مە ەدى، كىم ءبىلسىن. مۇنداي ماڭگىلىك ماحاببات يەلەرى ءوزىمىزدىڭ ارامىزدا دا بار.
مۇندا ەڭ باستىسى ەكى ادامدى تەك ماحاببات قانا ەمەس، الدىمەن دوستىق، سوسىن ارىپتەستىك قارىم-قاتىناس جالعاستىرۋى قاجەت. ويتكەنى، ماحابباتتىڭ ءبىرىنشى دەڭگەيى ارى كەتتى دەگەندە 5 جىلعا سوزىلادى. بۇل ۋاقىت ارالىعىندا عاشىقتار ءبىر-ءبىرىنىڭ كەمشىلىگىن كورمەگەنمەن، ودان كەيىن ءدال سول كەمشىلىكتەر كورىنىپ، وسال تۇستار تانىلا باستايدى. وسىندايدا ەكى ادامدى تۇسىنىستىك، سىيلاستىق قانا بايلانىستىرادى.
ومىرشەڭ بولعان سەزىمدەردە بايقاپ قاراساڭىز، ارىپتەستىك الەمى ءومىر سۇرەدى. ماسەلەن، جارى ونەر ادامىنا شابىت سيلاپ، تىڭ تۋىندىنىڭ تۋۋىنا سەبەپ بولادى. ەڭ الدىمەن، وتباسىن ساقتاپ، سەزىمدى سوندىرمەس ءۇشىن ەكى ادام كەز-كەلگەن نارسەنى اقىلداسا شەشىپ، ءبىر- ءبىرىنىڭ كومەگىنە زارۋ بولماسا دا، سوعان جۇگىنۋى قاجەت. ءبىر- ءبىرىنىڭ الەمىن تانىپ، ونى ءوزى ءۇشىن اشىق ەتە ءبىلۋى ءتيىس.
ماسەلەن، شىن عاشىقتار راسىندا دا قارتايمايدى. نەلىكتەن؟ ويتكەنى، ولاردى ۇنەمى جۇرەكتەگى ماحاببات سەزىمى نۇرلاندىرىپ تۇرادى. ءبىر عانا ادامدى ءسۇيىپ، ومىردەن ءوتۋ - ۇلكەن ەرلىك. ول كەز-كەلگەن ادامنىڭ قولىنان كەلە بەرمەيدى. اسىرەسە، اقىلدى ادامدار سونداي سەزىمگە بەيىم كەلەدى. سەبەبى، ول ماسەلەنىڭ ۇستىنەن ءتونىپ قارامايدى، كەرىسىنشە، ەڭكەيىپ، ۇڭىلە قارايدى.
اقىلسىز ادامنىڭ سەزىمىنىڭ اياقاستى بولاتىنى دا - وندا سونداي قاسيەتتەردىڭ بولماۋىنان دەپ بىلەمىن. بايقاساڭىز، تاريحتا بولسىن، اينالامىزدا بولسىن، باقىتتى جۇپتاردىڭ، ۇزاق جۇپتاسقان ماحاببات يەلەرىنىڭ كوپشىلىگى دارىندى، تالانتتى تۇلعالار. ويتكەنى، ءبىر ادامدى ءومىر بويى ءسۇيۋدىڭ ءوزى ۇلكەن تالانتپەن تەڭ.
ال، ءوز باسىما كەلسەم، مەن باس قوسىپ، شاڭىراق كوتەرگەن ومىرلىك جارىمنان 27 جاسىمدا كوز جازىپ قالدىم. بۇگىندە ارادا قانشا جىل وتسە دە، مەن ونى ولدىگە سانامايمىن. ويتكەنى، ول قاشاننان بەرى مەنىڭ الەمىمدە، مەنىڭ جۇرەگىمدە ءومىر ءسۇرىپ كەلەدى. ول مەنەن ەشقاشان جىراقتاماعان دا سەكىلدى. كوڭىلىمدى جايلاندىرىپ، جۇرەگىمدى نۇرلاندىراتىن سول كىسىنىڭ بەينەسى مەن ءۇشىن ەڭ تازا، ەڭ كىرشىكسىز ماحاببات پەن ەستەلىكتىڭ كورىنىسى. مۇنداعى باستى قۇندىلىق - ارامىزدى ماڭگىگە جالعاعان ۇلكەن سەزىم. ول سەزىم ءبىزدىڭ ەكى الەمدە جۇرگەنىمىزگە قاراماستان، ءالى سۋىپ، باسىلعان ەمەس.
فاتيما تاشىموۆا پسيحولوگيا عىلىمدارىنىڭ دوكتورى، پروفەسسور
almaty-akshamy.kz
