ءبىلىم بەرۋ قىزمەتىنىڭ تاعى ءبىر ءتۇرى eGov پورتالىنا شىعارىلدى

استانا. KAZINFORM - تەحنيكالىق جانە كاسىپتىك ءبىلىم بەرۋ ۇيىمدارىنا قۇجات قابىلداۋ جالعاسۋدا. ەندى ابيتۋريەنتتەر كوللەدجگە ءتۇسۋ ءۇشىن قۇجاتتارىن eGov پورتالى ارقىلى تاپسىرا الادى، دەپ حابارلايدى ق ر وقۋ-اعارتۋ مينيسترلىگىنىڭ باسپا ءسوز قىزمەتى.

قۇجات تاپسىرۋ كەزىندە پورتالدى قولدانۋشى وقۋ ءتىلىن ءجان ءوڭىردى تاڭداي الادى. پورتالدا اۆتوماتتى تۇردە ابيتۋريەنتتىڭ ءبىلىمى، باعالارى جانە ونىڭ سەرتيفيكاتىنىڭ جالپى باعاسى تۋرالى اقپارات شىعارىلادى. ازاماتتاردىڭ جەڭىلدىگى بار جەكەلەگەن ساناتتارى ءۇشىن (I جانە Ⅱ توپتاعى مۇگەدەكتىگى بار ادامدار، جەتىم بالالار، اتا-اناسىنىڭ قاراۋىنسىز قالعان بالالار، ت. ب. ) جۇيە ونىڭ مارتەبەسى تۋرالى قوسىمشا اقپاراتتى كورسەتەدى.

سونىمەن قاتار ءوتىنىمنىڭ مارتەبەسىن باقىلاپ وتىرۋ جانە قاجەت بولعان جاعدايدا ونى كەرى قايتارىپ الۋ مۇمكىندىگى قاراستىرىلعان. اتاپ ءوتۋ كەرەك، ءبىر ابيتۋريەنت 4 كوللەدجدە 4 ءتۇرلى ماماندىقتى تاڭداي وتىرىپ ءبىر عانا ءوتىنىم بەرە الادى.

ابيتۋريەنت ءوتىنىمدى بەرۋ ءۇشىن eGov پورتالىنا كىرىپ، «ءبىلىم» بولىمىندەگى «كوللەدجدەر» ساناتىن تاڭداۋى ءتيىس. مۇنداعى كورسەتىلگەن بارلىق كەستەنى تولتىرىپ، فايلدى جۇكتەيدى جانە ەتسق ارقىلى قول قويادى.

اتاپ ءوتۋ كەرەك، كوللەدجدەرگە قۇجاتتار قابىلداۋ 25-تامىزعا دەيىن جالعاسادى. بۇگىنگى تاڭدا 96 مىڭنان استام ءوتىنىم قابىلداندى. جاڭا وقۋ جىلىندا تەگىن تەحنيكالىق جانە كاسىبي ءبىلىم بەرۋمەن 145 مىڭ ستۋدەنت قامتىلادى دەپ جوسپارلانۋدا.

وقۋ-اعارتۋ مينيسترلىگى تسيفرلىق دامۋ، يننوۆاتسيا جانە اەروعارىش ونەركاسىبى مينيسترلىگىمەن، «ۇ ا ت» ا ق- مەن جانە ا. بايتۇرسىن ۇلى اتىنداعى «تالداۋ» ۇ ز ب ب و بىرلەسىپ اتالعان قىزمەتتى اۆتوماتتاندىرىپ، ىسكە قوستى.

اۆتور
اسحات رايقۇل