عارىش جانە ۇشقىشسىز جۇيەلەر سالاسىنداعى ىنتىماقتاستىق ماسەلەلەرى تالقىلاندى

استانا. KAZINFORM - ۆەنگريالىق 4iG كومپانياسى دەلەگاتسياسىنىڭ قازاقستانعا ساپارى اياسىندا قازاقستان پرەمەر-ءمينيسترىنىڭ ءبىرىنشى ورىنباسارى رومان سكليار مەن 4iG كومپانياسىنىڭ ديرەكتورلار كەڭەسىنىڭ ءتوراعاسى، ماجارستاننىڭ حالىقارالىق ىسكەرلىك بايلانىستاردى دامىتۋ ماسەلەلەرى جونىندەگى توتەنشە جانە وكىلەتتى ەلشىسى گيللەرت ياسايدىڭ جۇمىس كەزدەسۋى ءوتتى.

كەزدەسۋ بارىسىندا عارىش قىزمەتى مەن ۇشقىشسىز جۇيەلەر سالاسىنداعى ەكىجاقتى ىنتىماقتاستىقتى كەڭەيتۋ ماسەلەلەرى تالقىلاندى.

اتاپ ايتقاندا، ماجارستان تاراپىنىڭ ۇشىرۋ قىزمەتتەرىن ۇسىنۋ جونىندەگى جوبالاردى ىسكە اسىرۋعا قاتىسۋ، جەردى قاشىقتىقتان زوندتاۋدىڭ حالىقارالىق سپۋتنيكتىك توبى شەڭبەرىندەگى ىنتىماقتاستىق، سونداي-اق عارىش اپپاراتتارى ءۇشىن قۇراستىرۋ-سىناۋ كەشەندەرىن قۇرۋ مەن پايدالانۋدا تاجىريبە الماسۋ پەرسپەكتيۆالارى قارالدى.

قازاقستاندىق تاراپ ماجارستاننىڭ ۇشقىشسىز جۇيەلەر سالاسىنداعى قۇزىرەتتەرىنە تەحنولوگيالىق تا، وندىرىستىك تە تۇرعىدا قىزىعۋشىلىق تانىتتى.

تاراپتار بىرلەسكەن ازىرلەمەلەردىڭ، پيلوتتىق جوبالاردىڭ جانە تەحنولوگيالارمەن ءوزارا الماسۋدىڭ جوعارى الەۋەتىن اتاپ ءوتىپ، ەكى ەلدىڭ جەكە كومپانيالارى مەن مەملەكەتتىك قۇرىلىمدارى اراسىنداعى پراكتيكالىق ءوزارا ءىس-قيمىلدىڭ ماڭىزدىلىعىنا توقتالدى.

كەزدەسۋگە قاتىسۋشىلار وزىق شەشىمدەردى ەنگىزۋگە جانە ەكونوميكانىڭ جوعارى تەحنولوگيالىق سالالارىن دامىتۋعا باعىتتالعان تۇراقتى دا، ۇزاقمەرزىمدى ارىپتەستىك قۇرۋعا ءوزارا مۇددەلى ەكەندىكتەرىن جەتكىزدى.

ا ق ش عارىشقا كوممەرتسيالىق كەمە ۇشىرۋ بويىنشا جاڭا رەكورد ورناتتى.