ءاليحان سمايىلوۆ گاز-تەحنيكالىق ينسپەكسيالاردىڭ ساپاسىز جۇمىسىن سىنعا الدى

 ۇكىمەت وتىرىسىندا پرەمەر-مينيستر ءاليحان سمايىلوۆ گاز-تەحنيكالىق ينسپەكسيالارىنىڭ جۇيەسىز جۇمىسىنا قاتىستى سىن ايتتى، دەپ حابارلايدى Kazinform اگەنتتىگى. 

Смайылов
Фото: Фото: Kazinform

«جىل باسىنان بەرى تۇرعىن ءۇي سەكتورىنداعى ءورت سانى %14 عا، ال قازا تاپقاندار سانى %10 عا وسكەن. اباي، الماتى، جامبىل جانە ۇلىتاۋ وبلىستارىندا ءورت وقيعالارى ءوسىپ وتىر. سونىمەن قاتار، گاز باللوندارىنىڭ جارىلۋى دا جيىلەپ كەتتى. بيىل وسىنداي 72 وقىس جاعداي ورىن الدى. ودان 119 ادام زارداپ شەگىپ، 17 ادام قازا تاپتى. جارىلىستاردىڭ نەگىزگى سەبەبى - گاز باللوندارىن پايدالانۋ كەزىندە قاۋىپسىزدىك تالاپتارىن ساقتاماۋ. وسىعان بايلانىستى مىنا ماسەلەلەردى اتاپ وتكىم كەلەدى: قازىرگى ۋاقىتتا گاز قۇرىلعىلارىن پايدالانۋ كەزىندە قاۋىپسىزدىك تالاپتارىنىڭ ساقتالۋىن باقىلاۋ فۋنكسياسى اكىمدىكتەرگە جۇكتەلگەن. وڭىرلەردە گاز-تەحنيكالىق ينسپەكسيالار قۇرىلعان. الايدا، ولار ءالى كۇنگە دەيىن جۇمىستى ءتيىستى دەڭگەيدە ۇيىمداستىرا الماي وتىر»، - دەپ ۆەدومستۆونىڭ جۇمىسىن سىنعا الدى ءاليحان سمايىلوۆ.

پرەمەر-ءمينيستردىڭ سوزىنشە، ينسپەكسيالاردا بىلىكتى ماماندار مەن قاجەتتى جابدىقتار جەتىسپەيدى.

«وسىعان بايلانىستى ءوڭىر اكىمدىكتەرى گاز-تەحنيكالىق ينسپەكسيالاردىڭ وكىلەتتىكتەرىن كەڭەيتۋ جانە ولاردى قامتاماسىز ەتۋ بويىنشا جۇمىس جۇرگىزۋى قاجەت. توتەنشە جاعدايلار مينيسترلىگى ازاماتتىق قورعاۋ اكادەمياسىنىڭ بازاسىندا وسى سالاعا ارنالعان كادرلاردى دايارلاۋ دەڭگەيىن ارتتىرۋ جونىندە شارالار قابىلداۋى كەرەك. سونداي- اق، جارامسىز گاز باللوندارىن الىپ قويۋ جانە ۋتيليزاسيالاۋ ءتارتىبى رەتتەلمەگەن. ولاردى وزىمىزدە ءوندىرۋ ماسەلەسى دە ءالى كۇنگە دەيىن شەشىمىن تاپپاي وتىر. وسىعان بايلانىستى، ونەركاسىپ جانە ەنەرگەتيكا مينيسترلىكتەرى اتالعان پروبلەمالاردى شەشۋ بويىنشا ءتيىستى شارالار قابىلداۋى قاجەت»، - دەپ تاپسىرما جۇكتەدى ۇكىمەت باسشىسى.

بۇعان قوسا ءاليحان سمايىلوۆ گاز تولتىرۋ ورىندارىندا باللونداردىڭ ساپاسىن باقىلاۋ، جارامدىلىق مەرزىمىن تەكسەرۋ بويىنشا ءتۇسىندىرۋ جۇمىسىن جۇرگىزۋدى تاپسىردى.

«جۇرگىزىلگەن تالداۋ ناتيجەسى ءورت وقيعالارىنىڭ كوبىنە جەكە تۇرعىن ۇيلەر مەن قورا- جايلاردا بولاتىنىن كورسەتىپ وتىر. وندا نەگىزىنەن ەگدە جاستاعى ادامدار مەن بالالار قازا تابادى. اباي، شىعىس قازاقستان جانە ۇلىتاۋ وبلىستارىنىڭ اكىمدىكتەرى ۇيلەردە گاز داتچيكتەرىن ورناتۋ جۇمىستارىن ءتيىستى دەڭگەيدە جۇرگىزبەي وتىر. وسىعان بايلانىستى توتەنشە جاعدايلار مينيسترلىگى ءوڭىر اكىمدىكتەرىمەن بىرگە ۇيلەردى ەسەپكە الۋ، ءبىرىنشى كەزەكتە حالىقتىڭ الەۋمەتتىك وسال توپتارىنىڭ ۇيلەرىن ەسەپكە الىپ، ارنايى داتچيكتەر ورناتۋى قاجەت»، - دەدى پرەمەر-مينيستر.

قوسا كەتسەك، جىل باسىنان بەرى تۇرعىن ءۇي سەكتورىندا بولعان ورتتەردەن 203 ادام قازا تاپقان.

بۇعان دەيىن حابارلاعانىمىزداي، اقتوبە قالاسى بەرەكە تۇرعىن الابى، باتىس-2 شاعىن اۋدانى ماڭىندا گاز تاراتۋ ستانساسىنان اقاۋ شىعىپ، ەكى شاعىن اۋداندى ءيىس جايلاپ كەتتى.

سوڭعى جاڭالىقتار