عابيت سىزدىقبەكوۆ پرەزيدەنتكە شىمكەنت قالاسىنىڭ دامۋى جونىندە ەسەپ بەردى

استانا. KAZINFORM - مەملەكەت باسشىسىنا شىمكەنت قالاسىنىڭ 2023 -جىلعى الەۋمەتتىك- ەكونوميكالىق دامۋى جونىندە ەسەپ بەرىلدى، دەپ حابارلايدى اقوردانىڭ باسپا ءسوز قىزمەتى.

عابيت سىزدىقبەكوۆتىڭ بايانداماسىنان:

- بىلتىرعى قورىتىندى بويىنشا نەگىزگى كاپيتالعا سالىنعان ينۆەستيتسيا كولەمى %26 ارتىپ، 724,3 ميلليارد تەڭگەنى قۇرادى. بىلتىر 1 ميلليارد 51 ميلليون تەڭگەنىڭ ونەركاسىپتىك ءونىمى ءوندىرىلدى. قۇرىلىس سالاسى ايتارلىقتاي جاندانىپ، 1 ميلليون شارشى مەتردەن استام تۇرعىن ءۇي پايدالانۋعا بەرىلدى؛

- وڭىردە ونەركاسىپ سالاسىن دامىتۋ ءۇشىن جالپى اۋماعى 867 گەكتار بولاتىن 5 وندىرىستىك ايماققا ينفراقۇرىلىم تارتۋ جۇمىستارى قولعا الىنىپ، ينۆەستيتسيالىق جوبالاردىڭ پۋلى جاساقتالعان؛

- قازىر 128 مىڭنان استام شاعىن جانە ورتا بيزنەس سۋبەكتىسى جۇمىس ىستەيدى. بۇل 2022 -جىلمەن سالىستىرعاندا %16,4 كوپ. كاسىپكەرلىكتى دامىتۋ ءۇشىن 3498 جوباعا جالپى سوماسى 19,8 ميلليارد تەڭگە كولەمىندە قولداۋ كورسەتىلگەن؛

- قالادا جاڭا اۋەجاي تەرمينالىنىڭ قۇرىلىسى جانە تەمىرجول ۆوكزالىن رەكونسترۋكتسيالاۋ جۇمىستارى جۇرگىزىلۋدە؛

- شاھاردا «ىزەتتى زەينەتكەر» ساۋىقتىرۋ ورتالىعى، كونگرەسس حولل، ۇستەل تەننيسى كەشەنى جانە جاڭا يپپودروم سياقتى نىساندار سالىنعان؛

- بىلتىر ءۇش مەكتەپكە قوسىمشا عيمارات، وقۋشىلار سارايى جانە بالالارعا ارنالعان شىعارماشىلىق ورتالىق اشىلعان؛

- «جايلى مەكتەپ» ۇلتتىق جوباسى اياسىندا 28 مىڭ وقۋشىعا ارنالعان 18 ءبىلىم بەرۋ مەكەمەسىنىڭ قۇرىلىسى باستالعان؛

- 233 شاقىرىم جولعا جوندەۋ جۇمىستارى جۇرگىزىلىپ، ۇلكەن جولايىرىق پايدالانۋعا بەرىلگەن؛

قوعامدىق قاۋىپسىزدىكتى قامتاماسىز ەتۋ ماقساتىندا بيىل قالا كوشەلەرىنە 3000 بەينەباقىلاۋ كامەراسىن ورناتۋ، 1000 عا جۋىق كوشەنى جارىقتاندىرۋ جوسپارلانعان. سوڭعى جىلدارى مۇنداي جۇيەلى شارانىڭ ناتيجەسىندە قىلمىس سانى %33 ازايعان؛

- جىلدار بويى قاراۋسىز قالعان بۇرىنعى فوسفورشىلار سارايى قالا بالانسىنا قايتارىلدى.

ورتالىقتاعى «سپۋتنيك» گۇلزارى مەملەكەت مەنشىگىنە ءوتىپ، دەمەۋشىلەر ەسەبىنەن قايتا اباتتاندىرىلدى.

قاسىم-جومارت توقايەۆ عابيت سىزدىقبەكوۆكە قالا ەكونوميكاسىن ودان ءارى ءارتاراپتاندىرۋ، قوسىمشا ينۆەستيتسيا تارتۋ، سونداي-اق شاعىن جانە ورتا بيزنەستى قولداۋ شارالارىن كۇشەيتۋ جونىندە ناقتى تاپسىرمالار بەردى.