ءابىش كەكىلباي ۇلى ماجار حالقىنىڭ وتكەنىن قايتا جاڭعىرتتى - وڭايشا ماندوكي
اقتاۋ. KAZINFORM - اقتاۋدا ءابىش كەكىلباي ۇلىنىڭ 85 جىلدىعىنا ارنالعان حالىقارالىق عىلىمي-تاجىريبەلىك كونفەرەنسيادا ماجارستاننان كەلگەن قازاق وڭايشا ماندوكي ءسوز سويلەپ، زاڭعار جازۋشىنىڭ شىعارماشىلىعى جايىندا پىكىر ءبىلدىردى.
- ورىس تىلىنەن ماجار تىلىنە اۋدارىلعان قازاق جازۋشىلارى شىعارمالارىنىڭ اراسىندا ءابىشتىڭ «بايگەتورى» پوۆەسىنىڭ ورنى بولەك. ويتكەنى ول كىتاپتى وقىعان ماجار حالقى جازۋشىنىڭ شىعارماسىن وقۋ ارقىلى وزدەرىنىڭ ۇمىتىلا باستاعان، كونە سالت- داستۇرلەرىن كوز الدارىنا ەلەستەتە الدى. ءابىش اعانىڭ ەۋروپاداعى قازاقتارعا، سونىڭ ىشىندە قىپشاق، ماجار حالىقتارىنا جاساعان جاقسىلىعى - ولاردىڭ وتكەنىن قايتا جاڭارتتى، - دەدى وڭايشا ماندوكي.
ايتا كەتەيىك، كونفەرەنسيا جازۋشىنىڭ قازاق رۋحىنىڭ اسقاق كورىنىسى بولا بىلگەن مۇرالارىن الەمدىك دەڭگەيدە ناسيحاتتاۋ ماقساتىندا ۇيىمداستىرىلدى. اتالمىش شاراعا ءابىش كەكىلباي ۇلىنىڭ ۇزەڭگىلەس دوستارى، ارىپتەستەرى، وتباسى مۇشەلەرى، اقىن-جازۋشىلار مەن زيالى قاۋىم وكىلدەرى، سونداي-اق تۇركيا، ماجارستان، ازەربايجان، قىرعىز رەسپۋبليكاسى، قاراقالپاقستان ەلدەرىنەن كەلگەن عالىمدار قاتىستى.
سونداي-اق مەرەيتوي اياسىندا Ⅲ حالىقارالىق «ءابىش الەمى» تەاتر فەستيۆالى وتەدى. وعان يران، موڭعوليا، گرۋزيا، رەسەي (تاتارستان)، قىرعىز رەسپۋبليكاسىنان، استانا مەن الماتى قالالارىنان، باتىس قازاقستان، اقمولا وبلىسىنان 8 تەاتر قاتىسىپ جاتىر. فەستيۆالگە ۇلتتىق تەاتر جانە كينو ونەرىنىڭ ابىزى، قازاقستاننىڭ ەڭبەك ەرى اسانالى ءاشىموۆ باستاعان ەلىمىز بەن شەت ەلدەردىڭ بەلگىلى اكتەرلەرى مەن تەاتر قايراتكەرلەرىنەن، سىنشىلارىنان قۇرالعان قازىلار قۇرامى تورەلىك ەتەدى. سونىمەن قاتار كورەرمەندەرگە ءابىش كەكىلبايەۆ شىعارمالارى جەلىسىمەن قويىلعان قويىلىمدارمەن قاتار جازۋشىنىڭ قازاق تىلىنە اۋدارعان شەتەل كلاسسيكتەرىنىڭ درامالىق تۋىندىلارى جانە زاماناۋي قويىلىمدار ۇسىنىلادى.
ەسكە سالا كەتسەك، بۇعان دەيىن ءابىش كەكىلباي ۇلىنىڭ 85 جىلدىق مەرەيتويىنا ارنالعان حالىقارالىق عىلىمي- تاجىريبەلىك كونفەرەنسيادا ءماجىلىس سپيكەرى ەرلان قوشانوۆتىڭ پرەزيدەنت قۇتتىقتاۋىن جەتكىزگەنىن جازعان ەدىك.
اۆتور
اياگوز ءىزباساروۆا
