ءابيبا وليمپيادا جۇلدەسىنىڭ جولاشارى بولۋى مۇمكىن - بيمىرزا تايجانوۆ
اتىراۋ. KAZINFORM - ەكى كۇننەن كەيىن پاريج تورىندە وليمپيادا ويىندارىنىڭ جالاۋى كوتەرىلەدى. جاھان جۇرتى كوز تىگەتىن، دۇبىرگە تولى بولاتىن دودادا دزيۋدودان العاشقى باسەكەدە ءابيبا ءابۋجاقىنوۆا باق سىنايدى.
قازاق دزيۋدوشىسىنىڭ دايىندىعى قالاي ءوتتى؟ ونىڭ قارسىلاستارى كىمدەر بولۋى مۇمكىن؟
KAZINFORM ءتىلشىسىنىڭ ساۋالدارىنا اتىراۋ وبلىستىق دزيۋدو فەدەراتسياسىنىڭ ۆيتسە- پرەزيدەنتى بيمىرزا تايجانوۆ جاۋاپ بەردى.
- بيمىرزا امانگەلدى ۇلى، قازاق ەلى وليمپيادادا جۇلدە الادى دەپ ءۇمىت ارتىپ وتىرعان سپورتشىنىڭ ءبىرى - ءابيبا ءابۋجاقىنوۆا. دزيۋدوشى ارۋ اتىراۋدا قاشاننان بەرى جاتتىعاتىن ەدى؟
- ەلىمىزدىڭ ءار وڭىرىندە حالىقارالىق سايىستاردا ەل نامىسىن قورعاپ جۇرگەن ساڭلاق دزيۋدوشىلار ەمەس. سونىڭ ءبىرى - ءابيبا ءابۋجاقىنوۆا. قازاق جەرىنەن تىسقارى ەلدە ومىرگە كەلگەنىمەن، جۇرەگى قازاق دەپ سوعاتىن ۇلتجاندىلىعى مەنمۇندالاپ تۇرادى. اتا-اناسىمەن ەلگە قونىس اۋدارعاننان بەرى سپورتتاعى باعى جاندى دەۋگە بولادى. ونى سوڭعى 4-5 جىلدان بەرى اتىراۋلىق باپكەر مەيرامبەك ەسماعامبەتوۆ جاتتىقتىرىپ كەلەدى.
ءار سپورتشىنىڭ ارمانى - وليمپيادا چەمپيونى اتانۋ. ءابيبانىڭ وليمپياداعا دەيىنگى جۇلدەسى از ەمەس. ول - دزيۋدودان ەل چەمپيونى. 2021 -جىلى بىشكەكتە، 2022 -جىلى استانادا وتكەن ازيا چەمپيوناتىندا كۇمىس جۇلدەنى يەلەندى. ەكى جىل بۇرىن تاشكەنتتەگى الەم چەمپيوناتىندا قولا جۇلدەگە يە بولدى. ال، 2023 -جىلى پورتۋگاليادا جالاۋى جەلبىرەگەن گران- پري سەرياسىنداعى تۋرنيردە جەڭىمپاز اتاندى.
ءابيبا پاريج وليمپياداسىنا وسىنداي جەتىستىكتەرىمەن بارىپ وتىر. ونىڭ دايىندىعىنا باسا ءمان بەرىلدى. جوعارىدا ايتقان دودالاردا باق سىناپ، جۇلدە الۋدىڭ ءوزى ءابيبانىڭ دايىندىعى مىقتى ەكەنىن كورسەتەدى.
- ءابيبانىڭ سالماعىندا قاي ەلدىڭ سپورتشىلارى قارسىلاس بولۋى مۇمكىن؟
- وليمپيادادا العاشقىلاردىڭ قاتارىندا باق سىنايتىن ءابيبا 48 سالماقتا كۇرەسەدى. سپورتتىڭ قاي تۇرىندە دە جەڭىل سالماقتا قارسىلاستار از بولمايدى. ءابيبانىڭ سالماعىنداعى قارسىلاستارى وسال ەمەس. ونىڭ ۇستىنە وليمپياداعا كىلەڭ مىقتىلار ىرىكتەلەدى عوي. ءبىراق، ءبىزدىڭ بالۋانىمىز قارسىلاستارىنىڭ ايلا- ءتاسىلىن، دايىندىق دەڭگەيىن بىلەدى. جاتتىقتىرۋشىسى مەيرامبەك ەسماعامبەتوۆپەن بىرگە بۇرىننان كۇرەسىپ جۇرگەن برازيليا، قىتاي، جاپونيا بالۋاندارىنىڭ وسال تۇسىن تابۋ جولىن زەرتتەدى. ماسەلەن، بىشكەكتەگى ازيا چەمپيوناتىنىڭ اقتىق سىنىندا قىتايلىق لي ياناننان ۇتىلعان ەدى. ال، استانادا وتكەن وسىنداي چەمپيوناتتا جاپون بالۋانى ۆاكانا كوگاعا ەسە جىبەرىپ الدى. جاپون سپورتشىسى سولاقاي بالۋانمەن كۇرەسسە، ابدىراپ قالاتىنىن ەسكەرەدى دەپ ويلايمىن. ويتكەنى، ءابيبا دا - سولاقاي.
ەندى ازيا، الەم چەمپيوناتتارىندا كەتكەن ەسەسىن وليمپيادا دوداسىندا قايتارىپ، ەلگە جۇلدەمەن ورالاتىنىنا سەنەمىن. جالپى ءابيبا ءابۋجاقىنوۆا - قاتەلىك جىبەرمەيتىن، تاجىريبەسى ابدەن تولىسىپ، ىسىلعان دزيۋدوشى. سپورتتىڭ وسى تۇرىمەن 11 جاسىنان بەرى اينالىساتىن دزيۋدوشى قىزىمىزدىڭ التىن مەدال الاتىن ءجونى بار. بۇل - ونىڭ باستى ماقساتى. سوندىقتان، ءابيبانى وليمپيادا جۇلدەسىنىڭ جولاشارى بولسىن دەپ تىلەيىك.
- وليمپيادادا باق سىنايتىن تاعى ءبىر بالۋان - ەسميگۋل كۋيۋلوۆا. ونىڭ دايىندىعى تۋرالى نە ايتاسىز؟
- ەسميگۋل دا - ەلگە ورالعان قانداسىمىز. تالابى تاۋداي، ىزدەنەتىن دزيۋدوشىمىز تەك ەلىمىزگە عانا ەمەس، الىس- جاقىن ەلدەرگە دە تانىلىپ ءجۇر. بيىل 63 كەلى سالماقتا ازيا چەمپيوناتىنىڭ قول جۇلدەگەرى اتاندى. ءابيباعا قاراعاندا، حالىقارالىق دودادان العان جۇلدەسى از بولۋى مۇمكىن. الايدا، شەبەرلىگى شىڭدالىپ كەلەدى. ونىڭ دا وليمپيادان جۇلدە الاتىن مۇمكىندىگى بار. تەك اپتىقپاي، اسىقپاي، سابىرمەن كۇرەسسە عانا ناتيجەگە قول جەتكىزەدى دەپ ويلايمىن.
- ەل ءۇمىت ارتىپ وتىرعان دزيۋدوشىلارعا جەرگىلىكتى جەردە قانداي قولداۋ كورسەتىلدى؟
- قاي جارىسقا قاتىسسا دا الدىمەن سپورتشىلاردىڭ دايىندىعىنا كوڭىل بولىنەدى عوي. ال، ءتورت جىلدا ءبىر وتەتىن وليمپيادانىڭ ءجونى بولەك. سول سەبەپتەن، ءابيبا مەن ەسميگۋلدىڭ حالىقارالىق رەيتينگتە ۇپاي بەرىلەتىن جارىستارعا بارۋىنا بارىنشا قولداۋ كورسەتىلدى. قازىر ءابيبا رەيتينگتە الدىڭعى ورىندا تۇر. ەسيمگۋلدىڭ دە رەيتينگى كوتەرىلدى. وليمپياداعا اتتانار الدىندا ەكى سپورتشىنى اتىراۋ وبلىسىنىڭ اكىمى سەرىك شاپكەنوۆ ارنايى قابىلداپ، ءساتتى ساپار تىلەدى. وبلىستىق دزيۋدو فەدەراتسياسىنىڭ تاراپىنان ۇدايى قارجىلاي قولداۋ كورسەتىپ كەلەمىز.
قازاق ەلى وليمپياداعا قاتىسۋعا اتتانعان سپورتشىلاردىڭ جەڭىسپەن ورالۋىنا ءۇمىت ارتىپ، ەڭ جاقسى تىلەگىن ارناپ وتىر. «جاقسى ءسوز - جارىم ىرىس» دەگەندەي، ەلدىڭ ءۇمىتى اقتالىپ، سپورتشىلارىمىزدىڭ جۇلدەسى كوبەيگەنىن قالايمىن.
ەسكە سالا كەتەلىك، بۇدان بۇرىن ءابيبا ءابۋجاقىنوۆا باستى ماقساتى - وليمپيادانىڭ فينالىنا جەتىپ، التىنعا تالاسۋ ەكەنىن ايتقان ەدى.
اۆتور
جولداسبەك شوپەعۇل
