بيىل ساۋد ارابياسىندا 200-گە جۋىق ادام ءولىم جازاسىنا كەسىلگەن

استانا. KAZINFORM - ساۋد ارابياسىندا بيىل سوڭعى ءۇش ونجىلدىقتا ەڭ كوپ ادام ءولىم جازاسىنا كەسىلدى. 28 -قىركۇيەكتە تاعى ءۇش ءولىم جازاسىن قوسا العاندا، 2024 -جىلى كورولدىكتەگى ءولىم جازاسىنا كەسىلگەندەردىڭ جالپى سانى 198-گە جەتتى، دەپ جازادى DW مەدياكومپانياسى AFP- عا سىلتەمە جاساپ.

وتكەن جىلى ساۋد ارابياسىندا 170 ادام ءولىم جازاسىنا كەسىلگەن بولسا، 2022 -جىلى 196 ادامعا وسىنداي جازا بەلگىلەنگەن.

ەل ءولىم جازاسىنا كەسىلگەندەردىڭ كوپتىگى ءۇشىن سىنعا ۇشىرادى. Reprieve، ادام قۇقىعىن قورعاۋ ۇيىمىنىڭ وكىلى قايعىلى رەكورد تۋرالى حابارلاماعا رەاكسيا ءبىلدىرىپ، ساۋد ارابياسى باسشىلىعى جاريالاعان مودەرنيزاتسيا باعىتى بوس ءسوز ەكەنىن، ويتكەنى ۋادەلەر ورىندالماي جاتقانىن ايتقان.

رەسمي ستاتيستيكاعا سايكەس، بيىل ساۋد ارابياسىندا 32 ادام لاڭكەستىككە، تاعى 52 ادام ەسىرتكىگە قاتىستى ايىپپەن ءولىم جازاسىنا كەسىلگەن.

ساۋد ارابياسىنىڭ رەسمي وكىلدەرىنىڭ ايتۋىنشا، ءولىم جازاسى «قوعامدىق ءتارتىپتى ساقتاۋعا» قىزمەت ەتەدى جانە سوتتالۋشى بارلىق زاڭدى مۇمكىندىكتەرىن تاۋسىلعاننان كەيىن عانا جۇزەگە اسىرىلادى.

قازىرگى ۋاقىتتا ساۋد ارابياسىندا ءولىم جازاسىنا كەسىلگەندەردىڭ سانى ەلدىڭ تاق مۇراگەرى مۇحاممەد بەن سالماننىڭ سوزىنە قايشى كەلىپ وتىر. 2022 -جىلى The Atlantic جۋرنالىنا بەرگەن سۇحباتىندا حانزادا ءوز ەلىندە ءولىم جازاسى قازىر تەك كىسى ءولتىرۋ نەمەسە كوپتەگەن ادامداردىڭ ومىرىنە قاۋىپ ءتوندىرۋ ءۇشىن عانا قولدانىلاتىنىن ايتقان.

اۆتور

جاراسقان نۇرىبايەۆ