بيىل اتىراۋ وبلىسىنا شەتەلدەن 272 ەتنيكالىق قازاق كوشىپ كەلدى

اتىراۋ وبلىسىنا 1-جەلتوقسانعا دەيىن شەت ەلدەردەن 212 وتباسى قونىس اۋداردى. قازاقستاندا تۇراقتى تۇرۋ ءۇشىن ورالعان وتباسىلارداعى 272 ەتنيكالىق قازاق قانداس مارتەبەسىن الدى، دەپ حابارلايدى Kazinform.

اتىراۋ وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسپا ءسوز قىزمەتىنەن ءمالىم ەتكەندەي، اتامەكەنىنگە كوشىپ كەلگەن قانداستاردى ۋاقىتشا ورنالاستىرۋ ورتالىعى بار.

«قانداستاردىڭ باسىم بولىگى - 171 وتباسىنداعى 218 قازاق وزبەكستان رەسپۋبليكاسىنان كەلدى. رەسەي فەدەراتسياسىنان 35 وتباسى (44 ادام)، قىتاي حالىق رەسپۋبليكاسىنان 1 وتباسى (1 ادام)، تۇركىمەنستان رەسپۋبليكاسىنان 3 وتباسى (7 ادام) جانە مونعوليا رەسپۋبليكاسىنان 2 وتباسى (2 ادام) اتامەكەنىنە ورالدى.

اتىراۋ قالاسىنا - 180، جىلىوي اۋدانىنا - 27، ماقاتقا - 4، يندەر اۋدانىنا 1 وتباسى قونىستاندى. تۇرعىن ءۇي كەزەگىندە 43 قانداس تىركەۋدە تۇر. جۇمىسپەن قامتۋ ورتالىقتارىندا 22 قانداس جۇمىسسىز رەتىندە تىركەلدى. تۇراقتى جۇمىسقا 1 قانداس ورنالاستى. جۇمىسسىزدار ەسەبىندەگى 4 قانداس «باستاۋ بيزنەس» جوباسىمەن وقىتۋ كۋرسىنان ءوتىپ، ارنايى سەرتيفيكات الدى»، - دەپ حابارلادى باسقارمانىڭ باسپا ءسوز قىزمەتى.

ەسكە سالا كەتەلىك، بۇدان بۇرىن بىلتىر اتىراۋ وبلىسىنا كوشىپ كەلگەن 311 ەتنيكالىق قازاق قانداس مارتەبەسىن العانىن جازعان بولاتىنبىز.

اۆتور

جولداسبەك شوپەعۇل