بيىل استانادا 58 مىڭعا جۋىق جۇمىس ورنىن اشۋ كوزدەلىپ وتىر: ەلوردا اكىمى پرەزيدەنتكە ەسەپ بەردى
استانا. KAZINFORM - مەملەكەت باسشىسى استانا قالاسىنىڭ اكىمى جەڭىس قاسىمبەكتى قابىلدادى، دەپ حابارلايدى اقوردانىڭ باسپا ءسوز قىزمەتى.
قاسىم-جومارت توقايەۆقا ەلوردانىڭ الەۋمەتتىك-ەكونوميكالىق جانە ينفراقۇرىلىمدىق دامۋى جونىندە مالىمەت بەرىلدى.
استانا قالاسىنىڭ اكىمى بارلىق نەگىزگى ەكونوميكالىق كورسەتكىشتەر بويىنشا وڭ ديناميكا بايقالاتىنىن ايتتى.
بىلتىر تارتىلعان ينۆەستيتسيا كولەمى 1,6 تريلليون تەڭگەنى قۇرادى. وڭدەۋ ونەركاسىبى، ءبىلىم، مەديتسينا، لوگيستيكا، كولىك جانە باسقا دا سالالاردا ىسكە اسىرىلعان جوبالاردىڭ ناتيجەسىندە 1,8 مىڭ جۇمىس ورنى اشىلدى.
وتكەن جىلى JOLTAP جوباسى اياسىندا 6 مىڭعا جۋىق ازامات جۇمىسقا ورنالاستى. ال بيىل جۇمىسپەن قامتىلاتىن ازاماتتاردىڭ سانىن 2 ەسە ۇلعايتۋ، ياعني 12 مىڭ ادامنان اسىرۋ جوسپارلانىپ وتىر. جالپى 2024 -جىلى 58 مىڭعا جۋىق جۇمىس ورنىن اشۋ كوزدەلگەن.
سونىمەن قاتار پرەزيدەنتكە جىلىتۋ ماۋسىمىنىڭ بارىسى تۋرالى دا باياندالدى. بىلتىر كۇزدە «وڭتۇستىك- شىعىس» گاز جىلۋ ستانتسياسىن، «تۇران» گاز جىلۋ ستانتسياسىنىڭ ءبىرىنشى كەزەگىن جانە ءۇشىنشى ج ە و-نى ىسكە قوسۋ ناتيجەسىندە جىلۋ قالا بويىنشا ۇزاق ۋاقىتتان بەرى العاش رەت ارتىعىمەن بەرىلىپ جاتىر. ەلوردانىڭ تىنىس-تىرشىلىگىن قامتاماسىز ەتەتىن بۇل نىسانداردىڭ قۋاتى - ساعاتىنا 1140 گيگاكالوريا.
مەملەكەت باسشىسىنا بيىل «تەلمان» گاز جىلۋ ستانتسياسىنىڭ ءبىرىنشى كەزەگى جانە «تۇران» گاز جىلۋ ستانتسياسىنىڭ ەكىنشى كەزەگى، ءۇشىنشى ج ە و-نىڭ كومىرمەن جىلىتىلاتىن بولىگىنىڭ ىسكە قوسىلاتىنى تۋرالى مالىمەت بەرىلدى. بۇل نىساندار قالانى قوسىمشا 600 گ كال/ساعات جىلۋ قۋاتىمەن قامتاماسىز ەتەدى.
بۇدان بولەك، جەڭىس قاسىمبەك الەۋمەتتىك نىسانداردىڭ (مەكتەپتەر، وقۋشىلار سارايلارى، بالاباقشالار، مەديتسينالىق ورتالىقتار، جەڭىلدىكپەن بەرىلەتىن تۇرعىن ۇيلەر) قۇرىلىسى، اپاتتى جاعدايداعى ەسكى ۇيلەردى ءسۇرۋ، قۇرىلىسى ۇزاققا سوزىلعان نىسانداردى سالىپ ءبىتىرۋ، تۇرعىن ءۇي الاپتارىن دامىتۋ، قالانى اباتتاندىرۋ جانە كوگالداندىرۋ جۇمىستارى تۋرالى ايتتى.
پرەزيدەنت قاسىم-جومارت توقايەۆ ەلوردانى ودان ءارى دامىتۋ جونىندە ءبىرقاتار تاپسىرما بەردى.
