بىرنەشە وڭىردە مال ۇرلايتىن قىلمىستىق توپ قۇرىقتالدى
استانا. KAZINFORM - ەلىمىزدىڭ ءۇش وبلىسىندا توپتاسىپ مال ۇرلاعاندار ۇستالدى. تولىعىراق ىشكى ىستەر مينيسترلىگىنىڭ رەسمي وكىلى شىڭعىس الەكەشيەۆ ايتىپ بەردى.

- اباي وبلىسىندا جايىلىمدا جۇرگەن 50-دەن استام جىلقىنى ۇرلاعان قىلمىستىق توپ ۇستالدى. توپتا 4 ادام ارەكەت ەتكەن. سونىمەن قاتار اقمولا وبلىسىندا 46 جىلقىنى ۇرلاپ كەتكەن 2 ادامنان تۇراتىن توپ قۇرىقتالدى. ودان بولەك، پاۆلودار وبلىسىندا 6 ادامنان تۇراتىن قىلمىستىق توپ 25-تەن استام جىلقىنى ۇرلاعان. قىلمىسكەرلەر جول تالعامايتىن موتوكولىكتەرمەن مالدى الىسقا ايداپ كەتكەن، - دەدى شىڭعىس الەكەشيەۆ ۆەدومستۆودا وتكەن ونلاين باسپا ءسوز ءماسليحاتىندا.
ىشكى ىستەر مينيسترلىگى مال ۇرلىعىنىڭ الدىن الۋ جانە ازايتۋ ماقساتىندا اۋىل شارۋاشىلىعى مينيسترلىگىمەن بىرلەسكەن جۇمىس ىستەپ جاتىر.
- ىشكى ىستەر مينيسترلىگى مەن اۋىل شارۋاشىلىعى مينيسترلىگىنىڭ ۆەتەرينارلىق باقىلاۋ قىزمەتىنىڭ مال ۇرلىعىنا قارسى ءوزارا ءىس-قيمىل تۋرالى بۇيرىق ازىرلەندى. مال ۇرلىعىنىڭ الدىن الۋدىڭ ءتيىمدى ادىستەرىنىڭ ءبىرى - جەدەل-پروفيلاكتيكالىق ءىس-شارالاردى تۇراقتى وتكىزۋ. اتالعان ءىس-شاراعا پوليتسەيلەر، ۆەتەرينارلىق باقىلاۋ قىزمەتكەرلەرى جانە جەرگىلىكتى اتقارۋشى ورگانداردىڭ وكىلدەرى قاتىسادى، - دەيدى ول.
ۆەدومستۆو وكىلىنىڭ ايتۋىنشا، وتكەن جىلى مال ۇرلىعىنا قارسى 2 رەسپۋبليكالىق جانە 76 وڭىرلىك دەڭگەيدە ءىس-شارا ءوتتى.
ايتا كەتەيىك، ەلىمىزدە مال ۇرلىعى 30,5 پايىزعا ازايدى.
- 2024 -جىلى ەلىمىزدە 1026 مال ۇرلىعى بولدى. بۇل - بىلتىر تىركەلگەن جالپى ۇرلىقتىڭ %3- ى. مالدىڭ جارتىسىنان كوبىن جايىلىمدا ۇرلاعان (1026-دان 752- ءسى). سونىمەن قاتار پوليتسيا 89 قىلمىستىق توپتى قۇرىقتادى، ونىڭ ىشىندە 572 ادام مال ۇرلاعان. سول سياقتى 4,5 مىڭنان استام ۇرلانعان مال يەسىنە قايتارىلدى. وسىلايشا وتكەن جىلى مال ۇرلىعىنىڭ سانى %30,5- عا تومەندەدى، - دەدى شىڭعىس الەكەشيەۆ ۆەدومستۆودا وتكەن ونلاين باسپا ءسوز ءماسليحاتىندا.
ىشكى ىستەر مينيسترلىگىنىڭ مالىمەتىنە سۇيەنسەك، ەلىمىزدە كەيىنگى 5 جىلدا مال ۇرلىعى %64- عا ازايدى.
- جىل باسىنان بەرى، ياعني قاڭتاردا ەل اۋماعىندا 69 مال ۇرلاۋ فاكتىسى تىركەلىپ، 53 كۇدىكتى ۇستالدى. سونىمەن قاتار 10 قىلمىستىق توپ اشكەرەلەندى جانە 450 ۇرلانعان مالدىڭ 134- ءى يەلەرىنە قايتارىلدى، - دەيدى ول.
وسى ورايدا ىشكى ىستەر مينيسترلىگى مال ۇرلىعىنان ساقتانۋ ەرەجەلەرىن ۇسىنادى:
- مالدى قاراۋسىز قالدىرماڭىز؛
- GPS- ترەكەرلەرىن ورناتۋ ارقىلى باقىلاۋدىڭ زاماناۋي ادىستەرىن قولداڭىز؛
- مالعا ەن سالىپ، تاڭبالاۋدى جانە چيپتەۋدى ۇمىتپاڭىز.
بۇعان دەيىن حابارلاعانىمىزداي، ەلىمىزدە مال ۇرلىعى جازاسى قاتاڭداتىلدى.
اۆتور
داۋلەت ىزتىلەۋ