استانادا تاتار- باشقۇرت مادەني ورتالىعى 30 جىلدىق مەرەيتويىن اتاپ ءوتتى
استانا. KAZINFORM - ەلوردادا ءداستۇرلى جاز مەرەكەسى - سابانتوي ءوتىپ جاتىر. بيىلعى مەرەكە استانالىق «تاڭ» تاتار-باشقۇرت مادەني ورتالىعىنىڭ 30 جىلدىعىنا ارنالعان.
ورتالىق 30 جىل بويى ەلوردادا سابانتوي مەيرامىن وتكىزىپ كەلەدى. قالالىق الاڭعا جينالعان ادام قاراسى كوپ. وندا تاتار جانە باشقۇرت اۋەندەرى شىرقالىپ جاتىر. كەلۋشىلەرگە قىزمەت كورسەتەتىن ۇلتتىق تاعامدار مەن حالىق شەبەرلەرىنىڭ ساۋدا پاۆيلوندارى ورنالاسقان. حالىقتىق ويىندار مەن سپورتتىق جارىستاردى وتكىزۋگە ارنالعان ايماقتار ازىرلەنگەن.
اۋقىمدى مەرەكەگە تاتارستان رەسپۋبليكاسى رايسى رۋستام ميننيحانوۆ ارنايى قۇتتىقتاۋ حاتىن جولدادى.
«تاتارستان رەسپۋبليكاسى ۇكىمەتىنىڭ مەملەكەتتىك كەڭەسى اتىنان جانە ءوز اتىمنان سىزدەردى سۇيىكتى سابانتوي مەرەكەسىمەن شىن جۇرەكتەن قۇتتىقتايمىن. تاتارلار قاي جەردە جۇرسە دە، سابانتويدى ەرەكشە تولقىنىسپەن كۇتەدى. وندا حالىقتىڭ وزىندىك بىرەگەيلىگى بەينەلەنەدى، عاسىرلار بويى قالىپتاسقان داستۇرلەر مەن ادەت-عۇرىپتاردىڭ ەرەكشەلىگى كورىنەدى. بۇگىندە بۇل ەجەلگى مەرەكە زاماناۋي بوياۋلارمەن ورگانيكالىق تۇردە تولىقتى. سابانتويعا بەلسەندى قاتىسۋ بارلىق تاتارلارعا حالقىمىزدىڭ بىرلىگىن تاعى دا اتاپ وتۋگە مۇمكىندىك بەرىپ، دوستىق قارىم-قاتىناستىڭ ۇمىتىلماس اسەرىن بەرەتىنىنە سەنىمدىمىن. مەرەكە ءومىرىمىزدى قۋانىش، جاقسىلىق پەن جاسامپازدىق نۇرىمەن تولتىرا بەرسىن»، - دەپ قۇتتىقتادى ر. ميننيحانوۆ.
سونىمەن بىرگە، ق ح ا ءتوراعاسىنىڭ ورىنباسارى مارات ءازىلحانوۆ ءوز قۇتتىقتاۋىندا تاتار جانە باشقۇرت ەتنوستارىنىڭ ءتىلى مەن تاريحىن دامىتۋعا جاعداي جاساۋ جونىندە اتاپ ءوتتى.
«بۇل مەرەكە ەل بىرلىگىنىڭ، كەلىسىمنىڭ، حالىقتىڭ تاتۋلىعى مەن دوستىعىنىڭ ايعاعى، ورتاق قۇندىلىقتاردى ناسيحاتتاۋ مەن دارىپتەۋدەگى تولىمدى ىستەرىمىزدىڭ كورسەتكىشى. اتاپ ايتقاندا، مادەني اعارتۋشىلىق، عىلىمي جانە ەكونوميكالىق سالادا تاتار جانە باشقۇرت ەتنوستارىنىڭ ءتىلى مەن تاريحىن، ادەبيەتى مەن ونەرىن دامىتۋعا قاجەتتى جاعداي جاساۋدا اتقارعان قىزمەتتەرىڭىز قۇرمەتكە لايىق! سىزدەرگە الداعى ۋاقىتتا تولايىم تابىس، بەرەكە- بىرلىك جانە وركەندەۋ تىلەيمىن»، - دەدى م. ءازىلحانوۆ.
«سابانتوي» مەرەكە رەتىندە كوپتەگەن تۇركى حالىقتارىنىڭ كۇنتىزبەسىنە ەنگەن. بۇگىندە ول كوكتەمگى ناۋقاننىڭ اياقتالۋىن عانا ەمەس، حالىقتارىمىزدىڭ مادەني بايلىعىن، انا ءتىلىن ساقتاپ قالۋعا دەگەن ۇمتىلىسىن، قوناكجايلىلىقتى بىلدىرەدى. ءتۇرلى ۇلت جانە ءدىن وكىلدەرىنىڭ بىرىگۋىنە ىقپال ەتەدى.
«ادامدار كوكتەمگى ەگىن ناۋقانى اياقتالعان سوڭ، ۇلكەن مەرەكە جاساعان جانە بىتىك ەگىن كۇتكەن. سوندىقتان بۇل مەرەكە مارتتىكتى، ەڭبەكقورلىقتى، بولاشاققا دەگەن سەنىمدى جانە ارينە بۇكىل حالىقتىڭ اۋىزبىرشىلىگىن بىلدىرەدى. ءبىزدىڭ ورتالىق جىل بويى كوپتەگەن ءىس-شارالارعا، حالىقارالىق بايقاۋلار مەن فەستيۆالدەرگە قاتىسادى. بۇگىن دە «سابانتوي ارۋى-2024» بايقاۋىن وتكىزەمىز، سپورتتىق جارىستار مەن تاتارشا كۇرەستى كورسەتەمىز»، - دەيدى «تاڭ» تاتار-باشقۇرت ورتالىعىنىڭ ءتوراعاسى د. سۇلتانوۆ.
كەلۋشىلەرگە تاتار جانە باشقۇرت حالقىنىڭ قوناقجايلىلىعىنىڭ باستى سيمۆولى چاك-چاك تاراتىلدى. سونداي-اق بۇل تاعام حالىقتار اراسىنداعى دوستىقتى، بىرلىكتى، ۇيلەسىمدىلىكتى تە بىلدىرەدى.
سابانتوي سوڭى كونسەرتكە ۇلاستى جانە وندا الماتى قالاسىنان كەلگەن «يدەل» حورەوگرافيالىق انسامبلى، «دوستىق»، «يالكىن» ۇجىمدارى جانە قازان قالاسىنان ارنايى كەلگەن مارات گاليموۆ پەن چۋلپان احمەتزيانوۆا ونەر كورسەتتى.
ەسكە سالا كەتەيىك، استانا كۇنىن مەرەكەلەۋ اياسىندا 1-ماۋسىم مەن 31-تامىز ارالىعىندا ءار سەنبى-جەكسەنبى سايىن «Creative summer» جازعى جوباسى وتەدى. وندا اپتا سايىن بالالارعا ارنالعان ويىن-ساۋىق باعدارلامالارى، شىعارماشىلىق ۇجىم قويىلىمدارى، فلەشموبتار وتەدى.
ەرتەڭ 21-شىلدەدە ساعات 16.00-دە «جەرۇيىق» ساياباعىندا انيماتورلار ونەر كورسەتەدى. ال 17:00-دەن 18:00-گە دەيىن قۋىرشاق تەاترىنىڭ قويىلىمىن تاماشالاۋعا بولادى. ساعات 18.00-دە «سيرك ديۋ سالەم» قويىلىمى باستالادى. ال ساعات 19.00-دەن 20.30-عا دەيىن الەۋمەتتىك بيلەر جوسپارلانعان.
اۆتور
ايجان سەرىكجان قىزى
