بۇگىنگىنىڭ «قىز جىبەگى مەن تولەگەنى»: جاس جۇبايلار قىتايدان استاناعا اتپەن كەلە جاتىر
استانا. KAZINFORM - قىتاي حالىق رەسپۋبليكاسىنىڭ تارباعاتاي ايماعىنان جولعا شىعىپ، قازاقستاننىڭ ەلورداسى - استاناعا دەيىن اتپەن جەتۋدى ماقسات ەتكەن قۋاتبەك ءتۇسىپحان ۇلى مەن جاينا ەركىن قىزى ۇزاق ساپارىن جالعاستىرۋدا، دەپ حابارلايدى Kazinform ءتىلشىسى.
تارباعاتاي ايماعىنا قاراستى ساۋان اۋدانىنان 8 -تامىز كۇنى جولعا شىققان جاس جۇبايلار ءبىر ايعا جۋىق ۋاقىتتا مىڭ شاقىرىمنان استام جولدى ارتقا تاستادى.
قوس ساياحاتشى ۇلتتىق كيىمدەرىن كيىپ، تاريحي كوش جولدارىن قايتا جاڭعىرتىپ، بابالاردىڭ ات ۇستىندەگى ءومىر سالتىن بۇگىنگى كۇنمەن ساباقتاستىرۋدى مۇرات ەتكەن. ولاردىڭ ايتۋىنشا، بۇل جوبا - تەك سپورتتىق نەمەسە مادەني ساپار عانا ەمەس، ەكى ەل اراسىنداعى دوستىق بايلانىستاردى نىعايتۋعا باعىتتالعان سيمۆولدىق شارا.
- ءبىزدىڭ باستى ماقساتىمىز - ەل كورىپ، جەر كورىپ، ساياحاتتاۋ ارقىلى ۇلتتىق مادەنيەتىمىزدى، سالت- ءداستۇرىمىزدى ءناسيحاتتاۋ، ات جالىندا وسكەن قازاقتىڭ مىقتىلىعىن، كوشپەندىلەردىڭ ءسان- سالتاناتىن تانىستىرۋ. ۇلان بايتاق دالانى ات تۇياعىمەن دۇبىرلەتكەن باتىر بابالارىمىزدىڭ رۋحىن سەزىنىپ، بۇگىنگى جاستارعا، توزىمدىلىك پەن ەرلىكتىڭ ۇلگىسىن كورسەتكىمىز كەلەدى. سونىمەن بىرگە قازاقستان مەن قىتاي اراسىنداعى مادەني بايلانىستاردى نىعايتۋعا از دا بولسا ۇلەسىمىزدى قوسۋدى ماقسات تۇتتىق، - دەيدى قۋاتبەك ءتۇسىپحان ۇلى.
اتتىلار قورعاس شەكاراسى ارقىلى ءوتىپ، جاركەنت قالاسىن باسىپ، الماتىنى بەتكە الىپ كەلەدى. ازىرگە الماتىعا 100 شاقىرىمداي جول بار. ساياحاتشىلار ودان ءارى سارى ارقانىڭ سايىن دالاسىن باسىپ ءوتىپ، استاناعا جەتۋدى جوسپارلاپ وتىر. ساپاردىڭ جالپى ارالىعى 2500 شاقىرىمىنان اسادى.
- شەكارا تالاپتارىنا ساي، قورعاسقا دەيىن ءمىنىپ كەلگەن اتتارىمىزدى سول جەرگە قالدىرىپ، بەرگى بەتتەن ەكى ات ساتىپ الدىق. جول بويى تۇرعىندار ەرەكشە ىقىلاسپەن قارسى الىپ، اس-سۋلارىن بەرىپ، كومەك قولىن سوزىپ جاتىر. «جول ازابىن جۇرگەن بىلەر» دەمەكشى الىس جولدى اتپەن ءجۇرۋ وڭاي ەمەس، دەسە دە كەزدەسكەن ادامداردىڭ جانە الەۋمەتتىك جەلىدەگى جۇرتتىڭ قولداۋى ءبارىن ۇمىتتىرىپ جىبەرەدى. جولداعى اسەم تابيعاتتى، كورىكتى جەرلەردى، كورگەن- بىلگەنىمىزدى ءتۇسىرىپ، الەۋمەتتىك جەلىگە جاريالاپ كەلەمىز. قازىر كۇنىنە 50 شاقىرىمعا جۋىق جولدى ارتقا تاستايمىز. وسى ەسەپپەن استاناعا جەتۋ ءۇشىن ءالى 1 اي ات ۇستىندە بولامىز، - دەيدى ساياحاتشىلار.
ايتا كەتەيىك، بۇل قۋاتبەك پەن جاينانىڭ ءبىرىنشى الىس ساپارى ەمەس. قول ۇستاسقان قوس عاشىق 2021 -جىلى شىڭجاڭنان جولعا شىعىپ، 4000 شاقىرىمداي جولدى اتپەن 74 كۇندە ءجۇرىپ ءوتىپ، بەيجىڭگە بارعان ەكەن.
اۆتور
ريزابەك نۇسىپبەك ۇلى
