بۇگىن - پراۆوسلاۆ حريستياندارىنىڭ روجدەستۆو مەرەكەسى
استانا. KAZINFORM - بۇگىن 7-قاڭتار كۇنى الەمنىڭ بارلىق پراۆوسلاۆ حريستياندارى باستى ءدىني مەرەكەلەرىنىڭ ءبىرى - يسا پايعامباردىڭ تۋعان كۇنى سانالاتىن روجدەستۆونى اتاپ وتەدى.
پراۆوسلاۆ روجدەستۆوسىنىڭ ەرەكشەلىكتەرى
كاتوليكتەر مەرەكەلەيتىن 25-جەلتوقسانداعى روجدەستۆودان ايىرماشىلىعى - پراۆوسلاۆتىق روجدەستۆو 7-قاڭتاردا اتالىپ وتەدى. بۇل ايىرماشىلىق پراۆوسلاۆ داستۇرىندە يۋليان كۇنتىزبەسىنىڭ قولدانىلۋىمەن تۇسىندىرىلەدى، ال كاتوليك شىركەۋى گريگوريان كۇنتىزبەسىن قولدانادى.
مەرەكەنىڭ ماعىناسى
يسا ءماسىح روجدەستۆوسى - الەمنىڭ جۇزدەن استام ەلىندەگى حريستياندار ءۇشىن ەڭ ماڭىزدى مەرەكەلەردىڭ ءبىرى. بۇل كۇن يسا پايعامباردىڭ دۇنيەگە كەلۋ قۇرمەتىنە بەلگىلەنگەن جانە ادامنىڭ قۇدايمەن ءتىل تابىسۋىن بەينەلەيدى.
شىركەۋ ءىلىمى بويىنشا، روجدەستۆو - يسانىڭ كەشىرىم ءۇشىن جاساعان ەرلىگىن جانە كۇناعا باتقان العاشقى ادامدار تابيعاتىنىڭ جاڭارۋىن بىلدىرەدى.
مەرەكە داستۇرلەرى
يسا ءماسىح روجدەستۆوسى 40 كۇندىك روجدەستۆو ورازاسىنىڭ اياقتالۋىمەن تۇسپا- تۇس كەلەدى. ورازا 6- قاڭتاردا، سوچەلنيك دەپ اتالاتىن كۇنى ورازانى قاتاڭ ساقتاۋمەن اياقتالادى.
قاڭتاردىڭ 6-سىنان 7-سىنە قاراعان ءتۇنى پراۆوسلاۆ شىركەۋلەرىندە سالتاناتتى روجدەستۆولىق عيباداتتار وتكىزىلەدى، وندا ءىنجىل وقىلىپ، دۇعالار مەن سالتاناتتى اندەر ايتىلادى.
روجدەستۆودان كەيىن قۇتقارۋشىنىڭ دۇنيەگە كەلۋىنە ارنالعان 12 كۇندىك مەرەكە - سۆياتكي باستالادى. سۆياتكي 19- قاڭتاردا شوقىنۋ مەرەكەسىمەن اياقتالادى، بۇل يسا ءماسىحتىڭ جەردەگى قىزمەتىنىڭ باستالۋىن بىلدىرەدى.
قازاقستاندا قانشا پراۆوسلاۆ بار؟
2021 -جىلى جۇرگىزىلگەن سوڭعى ساناق مالىمەتىنشە، قازاقستان حالقىنىڭ %17,19- ى حريستياندىقتى ۇستانادى. ونىڭ ىشىندە %17,04- ى پراۆوسلاۆ باعىتىندا، بۇل - قازاقستانداعى حريستيانداردىڭ ەڭ كوپ بولىگى. كورسەتكىش سلاۆيان حالقىنىڭ ءداستۇرلى تۇردە وسى حريستياندىق باعىتتى ۇستانۋىمەن بايلانىستى.
قازاقستاندا شامامەن 345 پراۆوسلاۆتىق ءدىني بىرلەستىك بار، ونىڭ ىشىندە 335 پريحود ورىس پراۆوسلاۆ شىركەۋىنە قارايدى. بۇل پريحودتار قازاقستانداعى پراۆوسلاۆ شىركەۋىنىڭ ميتروپوليتتىك وكرۋگىن قۇرايدى، ونىڭ ورتالىعى استانا قالاسىندا ورنالاسقان.
ورىس پراۆوسلاۆ شىركەۋىنە جاتاتىن بىرلەستىكتەردەن بولەك، قازاقستاندا ارميان اپوستولدىق شىركەۋى، 7 ەسكى ءداستۇرلى شىركەۋ جانە رەسەي پراۆوسلاۆ شىركەۋىنىڭ شەتەلدىك بولىمىنە تيەسىلى 2 شىركەۋ جۇمىس ىستەيدى.
استاناعا جەتكىزىلگەن قاسيەتتى بۇيىمدار
پراۆوسلاۆ روجدەستۆوسى قارساڭىندا جانە باسقا دا ماڭىزدى كۇندەردە قازاقستانعا رەسەي پراۆوسلاۆ شىركەۋى ءۇشىن قاسيەتتى دۇنيەلەر اكەلىنەتىن. بۇل سەنۋشىلەردىڭ رۋحاني بىرىگۋىنە جانە پراۆوسلاۆ داستۇرلەرىنىڭ نىعايۋىنا ىقپال ەتەدى دەپ سانالادى.
استاناعا اكەلىنگەن قاسيەتتى جادىگەرلەر:
• 2012 -جىل - استانانىڭ ۋسپەن كافەدرالدىق سوبورىندا ۆاتيكاننىڭ مەملەكەتتىك حاتشىسى كاردينال تارچيزيو بەرتونە باستاعان دەلەگاتسيا اپوستول اندرەي پەرۆوزۆاننىيدىڭ سۇيەگىنىڭ ءبىر بولشەگىن تاپسىردى.
• 2017 -جىل - 17- مامىردا تۇركىستان ەپارحياسىنىڭ 145 جىلدىعىنا ارنالعان سالتاناتتى شارالار اياسىندا استانانىڭ ۋسپەن سوبورىنا «زۇلىم جۇرەكتەردى جۇمسارتۋشى» ءاز انانىڭ يكوناسى جەتكىزىلدى.
• 2019 -جىل - قاسيتەتتى ءاز انانىڭ عاجايىپ فەودوروۆتىق يكوناسى استانا، الماتى جانە قاراعاندى قالالارىنا اكەلىندى. بۇل ماسكەۋ جانە بۇكىل رەسەي پاتريارحى كيريللدىڭ باتاسىمەن جۇزەگە اسىرىلدى.
• 2022 -جىل - ترويتسك- سەرگييەۆ لاۆر حرامىنان استاناعا سەرگيي رادونەجسكييدىڭ مۇردەسى جەتكىزىلدى، بۇل ونىڭ مۇردەسىنىڭ تابىلۋىنىڭ 600 جىلدىعىنا ارنالدى.
• 2024 -جىل - ماسكەۋلىك ماترونا اۋليەسىنىڭ مۇردەسى قازاقستان استاناسىنا جەتكىزىلدى.
• 2024 -جىل - جەلتوقساندا ازاپتالۋشى اۋليە ەكاتەرينانىڭ مۇردەسى استانانىڭ ۋسپەن كافەدرالدىق سوبورىنا اكەلىندى.
قازاقستاندىق پراۆوسلاۆتار روجدەستۆونى قالاي تويلايدى
6 -قاڭتاردان 7 -قاڭتارعا قاراعان ءتۇنى ەلدەگى بارلىق شىركەۋلەردە روجدەستۆولىق قۇلشىلىق ءراسىمى ءوتتى.استانا جانە قازاقستان ميتروپوليتى الەكساندر الماتىداعى ۆوزنەسەنسك كافەدرالىق سوبورىندا مەرەكەلىك ليتۋرگيانى جۇرگىزدى. ليتۋرگيا 6 -قاڭتاردا ساعات 23:00-دە باستالدى جانە ونى ونلاين كورۋگە مۇمكىندىك بولدى.
استاناداعى ۋسپەن كافەدرالدىق سوبورىندا مەرەكەلىك قىزمەتتى قازاقستان پراۆوسلاۆ شىركەۋىنىڭ ءىس باسقارۋشىسى، قاسكەلەڭ ەپيسكوپى گەننادي وتكىزدى.
استانا جانە قازاقستان ميتروپوليتى الەكساندردىڭ ايتۋىنشا، روجدەستۆو ءتۇنى مەن سۆياتكيدىڭ بارلىق كۇندەرىندە قازاقستان حرامدارىندا بەيبىتشىلىكتى قالپىنا كەلتىرۋ، وشپەندىلىكتى جويۋ جانە ماحابباتتى كوبەيتۋ ءۇشىن دۇعالار جاسالادى.
ايجان سەرىكجان قىزى
اۆتور
