بۇگىن ديماش قۇدايبەرگەن 30 جاسقا تولدى

استانا. KAZINFORM - بۇگىن الەمدىك دەڭگەيدەگى تانىمال ءانشى، كومپوزيتور، مۋلتيينسترۋمەنتاليست ديماش (دىنمۇحاممەد) قانات ۇلى قۇدايبەرگەننىڭ تۋعان كۇنى. ءانشى 30 جاسقا تولدى.

ديماش قۇدايبەرگەن اقتوبە قالاسىندا تۋعان. اتا-اناسى - تانىمال انشىلەر قانات جانە سۆەتا ايتبايەۆتار.

ول العاش رەت سپەكتاكلدە ويناپ، كوپشىلىككە تانىلا باستادى. بەس جاسىندا تۇڭعىش رەت مۋزىكالىق كوللەدج ساحناسىندا ءان سالعان. التى جاسىندا «اينالايىن» رەسپۋبليكالىق بايقاۋىنىڭ «فورتەپيانو» نوميناتسياسىندا جەڭىمپاز اتاندى.

2010 -جىلى «بايقوڭىردىڭ اسەم داۋىستارى» حالىقارالىق فەستيۆالىنىڭ 1-جۇلدە لاۋرەاتى اتاندى.

2012 -جىلى «جاس قانات» رەسپۋبليكالىق جاس ءان ورىنداۋشىلار بايقاۋىنىڭ گران- پري جۇلدەسىنە يە بولىپ، وسى جىلى «ۆوستوچنىي بازار» حالىقارالىق بايقاۋىندا 1-جۇلدە لاۋرەاتى اتاندى.

2013 -جىلى ديماش قۇدايبەرگەن «مەيكين ازيا» 1- حالىقارالىق فەستيۆالىنىڭ جەڭىمپازى بولدى. سونىمەن قاتار ۆيتەبسك قالاسىندا وتكەن XXIV حالىقارالىق ەسترادالىق ءان ورىنداۋشىلار «سلاۆيان بازارى-2015» بايقاۋىندا گران- پري جەڭىپ العان.

2015 -جىلى 28-قازان كۇنى ىستانبۇلدا ديماش قۇدايبەرگەن «Abu TV» حالىقارالىق ازيا- تىنىق مۇحيت فەستيۆالىندا قازاقستان رەسپۋبليكاسىنىڭ اتىنان العاش رەت قاتىستى.

2014 -جىلى ديماش احمەت جۇبانوۆ اتىنداعى مۋزىكالىق كوللەدجدە اكادەميالىق ءان ورىنداۋ سىنىبىن ءتامامداپ، قازاق ۇلتتىق ونەر ۋنيۆەرسيتەتىنىڭ «ەسترادا ونەرى» فاكۋلتەتىنە ءتۇستى.

ديماش قازاق، اعىلشىن، ورىس، قىتاي، سەرب، يتاليان، فرانسۋز، تاعى باسقا تىلدەردە ءان ورىندايدى.

قىتايدىڭ I am a singer (مەن ءانشىمىن) تەلەبايقاۋىنا قاتىسىپ، سايىستىڭ بارلىق كەزەڭىنەن ءوتىپ، ەكىنشى ورىندى جەڭىپ الدى. اتالعان جوبانى قىتايدىڭ ەڭ ءىرى Hunan TV تەلەارناسى كورسەتتى.

2017 -جىلى ديماش ازيانىڭ «گرەمميى» سانالاتىن «Top Chinese Music Award» سىيلىعىنىڭ «ازيانىڭ ەڭ تانىمال ءانشىسى» اتالىمىندا جەڭىسكە جەتتى. مۇنان بولەك كوپتەگەن حالىقارالىق جۇلدەلەردىڭ يەگەرى.

ايتا كەتسەك، ديماش قۇدايبەرگەننىڭ دۇنيە ءجۇزى بويىنشا جانكۇيەرلەرى سۇيىكتى ءانشىسىن 30 جاسقا تولعان مەرەيتويىمەن قۇتتىقتاپ جاتىر. اسىرەسە، ۇلى بريتانياداعى تىڭدارماندارى بەلسەندى.

اۆتور

گۇلنۇر عازيز قىزى