بيلىك قۇرىلىمدارىنا اعا بۋىننىڭ تاجىريبەسى دە، جاس ۇرپاقتىڭ جاڭا يدەيالارى دا كەرەك - پرەزيدەنت

ەلىمىزدە جاڭا بۋىنداعى كاسىبي ماماندارعا مۇمكىندىك بەرۋ ساياساتى الداعى ۋاقىتتا دا جالعاسىن تابادى.

بۇل تۋرالى مەملەكەت باسشىسى قاسىم-جومارت توقايەۆ Egemen Qazaqstan گازەتىنە بەرگەن سۇحباتىندا ايتتى، دەپ حابارلايدى Kazinform.

«رەفورمالار ناتيجەسىندە كوپتەگەن دارىندى جاس مەملەكەتتىك قىزمەتتە وزدەرىنىڭ قارىم-قابىلەتىن كورسەتۋگە مۇمكىندىك الدى. قازىر ولار پارلامەنتتە، ءماسليحاتتاردا، مينيسترلىكتەردە جانە باسقا دا مەكەمەلەردە جۇمىس ىستەپ ءجۇر. ءسىز جاڭا بۋىن وكىلدەرىن ۇدايى قولداپ كەلەسىز. الايدا جاس باسشىلارعا تاجىريبە مەن پايىم- پاراسات جەتىسپەيدى دەگەن پىكىر ايتىلادى. ءسىز قالاي ويلايسىز؟»، - دەپ سۇراق قويدى «قازاق گازەتتەرى» ج ش س باس ديرەكتورى ديحان قامزابەك ۇلى.

پرەزيدەنت قازاق جاستارىنا سەنەتىنىن، سوندىقتان ولاردىڭ اتقارۋشى جانە زاڭ شىعارۋشى بيلىك تارماقتارىندا قىزمەت ەتۋىنە جول اشاتىن كەشەندى شارالار قابىلدانعانىن جەتكىزدى.

«پرەزيدەنتتىك جاستار كادر رەزەرۆى جاساقتالدى. ىرىكتەۋدىڭ بىرنەشە ساتىسىنان وتكەن كاسىبي جاس ماماندار مەملەكەتتىك قىزمەتتە باسشىلىق لاۋازىمدارعا تاعايىندالا باستادى. ساياسي رەفورمالار اياسىندا پارتيالاردىڭ سايلاۋ ءتىزىمىن جاساقتاعاندا جانە دەپۋتات مانداتىن بولگەندە ايەلدەر، جاستار جانە مۇمكىندىگى شەكتەۋلى جاندار ءۇشىن كۆوتا ەنگىزىلدى. سونىڭ ناتيجەسىندە كوپتەگەن وتانشىل جاس ءماجىلىس جانە ءماسليحات دەپۋتاتى اتاندى. وكىلەتتى بيلىكتە جاستاردىڭ ءۇنى جارقىن ەستىلە باستادى. وسىنداي ناقتى قادامدار بيلىك ورگاندارىنىڭ قۇرامىن جاڭارتۋعا تىڭ سەرپىن بەردى»، - دەدى قاسىم-جومارت توقايەۆ ءوز جاۋابىندا.

مەملەكەت باسشىسىنىڭ ايتۋىنشا، قازىر الەم جىل سايىن ەمەس، كۇن سايىن وزگەرىپ كەلەدى. جاڭا تەحنولوگيالار، ماماندىقتار جانە سالالار پايدا بولۋدا. جۇمىستى ۇيىمداستىرۋدىڭ جانە باسقارۋدىڭ ءادىس-تاسىلدەرى قايتا قارالۋدا. وسىنداي جاعدايدا جاڭا كاسىبي داعدىلاردى مەڭگەرۋگە جانە وزىق ءبىلىمىن ءتيىمدى پايدالانۋعا قابىلەتتى جاستاردىڭ ءرولى ارتا تۇسەدى.

«ويى ۇشقىر جاستارىمىز بولاشاقتى باعامداي الادى ءارى دايەكتى دامۋعا ۇمتىلادى. سوندىقتان ولارعا پاراسات-پايىم جەتىسپەيدى دەگەن پىكىرمەن كەلىسە المايمىن. ءبىراق بيلىك قۇرىلىمدارىنا اعا بۋىننىڭ تاجىريبەسى دە، جاس ۇرپاقتىڭ جاڭا يدەيالارى دا كەرەك. بۇل جەردە ەكسپەريمەنت جاساۋدىڭ قاجەتى جوق. كەيبىر ساراپشىسىماقتار «پرەزيدەنت توقايەۆ جۇيەنى تۇرالاتىپ تاستادى، ەشقانداي وزگەرىس بولعان جوق، ەسكى كادرلار ورنىندا قالدى» دەگەن سىڭارجاق پىكىرىن تىقپالاۋدان تانباي ءجۇر. مۇنىڭ استارىندا قوعامنىڭ شىرقىن بۇزىپ، مەملەكەتتىلىگىمىزدىڭ ىرگەسىن شايقايتىن پاسىق نيەت جاتىر. اسىعىستىقتىڭ سالدارى اۋىر بولۋى مۇمكىن.

جاس باسشىلارعا كوبىنە تاجىريبە جەتىسپەيدى. مەنمەندىگى جانە وزىنە دەگەن سىني كوزقاراستىڭ السىزدىگى كەيدە ولاردىڭ ءوز قارىم-قابىلەتىن جوعارى دەڭگەيدە كورسەتۋىنە كەدەرگى كەلتىرەدى. سوعان قاراماستان، ءبىز جاڭا بۋىننان شىققان كاسىبي ماماندارعا مۇمكىندىك بەرىپ كەلەمىز. بۇل ساياسات الداعى ۋاقىتتا دا جالعاسىن تابادى»، - دەدى پرەزيدەنت.