بىلتىر ديقاندار 300 ميلليارد تەڭگە شىعىنعا ۇشىرادى، جاڭا ۇكىمەت وسى ماسەلەنى شەشەدى دەپ ۇمىتتەنەمىز - «اۋىل» پارتياسى
استانا. KAZINORM - جاڭا ۇكىمەت اگروونەركاسىپ كەشەنىنىڭ پروبلەمالىق ماسەلەلەرىن شەشەدى دەپ ۇمىتتەنەمىز. بۇل تۋرالى ءماجىلىستىڭ جالپى وتىرىسىندا «اۋىل» پارتياسىنىڭ ءتوراعاسى سەرىك ەگىزبايەۆ ايتتى.
«نەگىزگى باسىمدىقتىڭ ءبىرى - اگروونەركاسىپ كەشەنى مەن ساۋدانى دامىتۋ دەپ اتاپ وتكەن تاپسىرماڭىزعا سايكەس اۋىل پارتياسى ۇكىمەتتىڭ الدىنا ءبىرىنشى كەزەكتە اۋىل تۇرعىندارىن، سونىڭ ىشىندە اگروونەركاسىپ كەشەنىن تولعاندىراتىن ماسەلەلەردى قويعان ەدى. ءبىز پارتيانىڭ ۇستانىمى ءارقاشان پرەزيدەنت تاپسىرمالارىمەن سايكەس كەلەتىنىنە ريزامىز. ديقاندارىمىز بىلتىر ەرەكشە قيىن جاعدايعا تاپ بولىپ، كەم دەگەندە 300 ميلليارد تەڭگەگە جۋىق شىعىنعا ۇشىرادى. سول كەزدە اۋىل پارتياسى ۇكىمەتكە ساۋال جاسادى. وكىنىشكە قاراي، قۇلاق اسپادى»، - دەدى «اۋىل» پارتياسىنىڭ ءتوراعاسى سەرىك ەگىزبايەۆ.
ونىڭ اتاپ وتۋىنشە، وتكەن جىلى شارۋالارعا كوپ قيىندىق تۋعىزعان ماسەلەلەر ەندى جاڭا ۇكىمەتكە وتەدى.
«جاڭا ۇكىمەت اگروونەركاسىپ كەشەنىنىڭ پروبلەمالىق ماسەلەلەرىن شەشەدى دەپ ۇلكەن ءۇمىت ارتامىز. «اۋىل» پارتياسى ءارقاشان سىندارلى، كونسترۋكتيۆتى پوزيتسيا ۇستانعان، سوندىقتان دا بۇگىن قاسىم-جومارت كەمەل ۇلى ۇسىنىپ وتىرعان پرەمەر-مينيستر كانديداتۋراسىن ءبىزدىڭ پارتيا ءبىراۋىزدان ۇلكەن سەنىممەن قولدايدى. «اۋىل» پارتياسى جاڭا پرەمەر-مينيستر مەن جاڭا ۇكىمەت مۇشەلەرى پرەزيدەنتىمىزدىڭ تاپسىرمالارىن دەرەۋ ورىندايتىن جانە پارلامەنت دەپۋتاتتارىنىڭ، ونىڭ ىشىندە 8 ميلليونعا جۋىق اۋىل تۇرعىندارىنىڭ مۇددەسىن قورعايتىن پارتيا دەپۋتاتتارىنىڭ ۇسىنىستارىن ەسكەرەتىن، قۇلاق اساتىن، قاجەت شەشىمدەردى تەز قابىلدايتىن، ىقپالدى پارلامەنتكە ەسەپ بەرەتىن مىقتى ۇكىمەت بولادى دەپ ءۇمىت ارتامىز»، - دەدى ول.
