بولاشاقتا وليمپيادا التىنىن العىم كەلەدى - 51 جاستاعى تۇرىك مەرگەنى

استانا. قازاقپارات - 51 جاستاعى تۇرىك مەرگەنى وليمپيادادا كۇمىس جۇلدەگە قول جەتكىزگەننەن كەيىن الەمدىك ينتەرنەتتە جۇلدىزعا اينالدى.

بەلگىلى بولعانداي، بۇل - يۋسۋف ديكەچتىڭ بەسىنشى وليمپياداسى، ءبىراق العاشقى مەدالى، سونداي-اق ونىڭ ءمىنسىز ستيلى مەن جابدىقتى كيۋدەن باس تارتۋىنىڭ ارقاسىندا تانىمال بولدى.

بۇل تۋرالى ول ZOOM ارقىلى Jibek Joly جۋرناليسى كۇنسايا قۇرمەتپەن سۇحباتىندا ايتتى.

وليمپيادادا 10 مەتر قاشىقتىقتان پنيەۆماتيكالىق تاپانشامەن وقۋ اتۋدان ونىڭ بارلىق قارسىلاستارى ارەناعا تولىق كيىممەن (ەكيپيروۆكا) شىقتى. قاراپايىم كيىم مەن ادەتتەگى كوزىلدىرىك كيگەن يۋسۋف ديكەچ قانا بولدى. ونىڭ ءبىر قولىن قالتاسىنا سالىپ تۇرعانى دا كورەرمەندەردى تاڭعالدىردى.

انىقتالعانىنداي، يۋسۋف ديكەچ ۇزاق ۋاقىت بويى تۇركيا قارۋلى كۇشتەرى جاندارمەرياسىندا قىزمەت ەتىپ، اعا سەرجانت شەنىمەن بوساعان. ول العاش رەت 2008 -جىلعى بەيجىڭ وليمپياداسىندا ونەر كورسەتتى. ءبىراق سودان بەرى جەڭىس تۇعىرىنا كوتەرىلە قويعان جوق ەدى.

تۇركيا قۇراماسى تاريحىندا العاش رەت وليمپيادا جۇلدەگەرى اتانعان يۋسۋف ديكەچ الداعى ۋاقىتتا التىنعا قول سوزاتىنىن دا جاسىرمادى.

«جارىس بىتكەننەن كەيىن مەن بىردەن تۇركياعا ورالدىم. ءبارى مەنىڭ ارنايى كيىمسىز شىققانىما تاڭعالدى. تۇسىندىرەيىن. مۇنىڭ سەبەبى مىنادا. مەن ارنايى لينزا مەن قۇلاققاپ كيسەم، ءوزىمدى وتە ىڭعايسىز سەزىنەمىن. نىسانا كوزدەۋ - بۇل سپورت، وندا سەن ءوزىڭدى جايلى سەزىنىپ، بار زەيىنىڭدى سوعان سالۋىڭ كەرەك. سوندىقتان مەن ارنايى كيىم كيمەيمىن»، دەيدى 51 جاستاعى مەرگەن.

يۋسۋف ديكەچتىڭ ايتۋىنشا، وق اتۋمەن اينالىسقانىنا 24 جىل بولعان. اسكەر قاتارىندا ءجۇرىپ، نىسانا كوزدەۋدى ۇيرەنگەن. سودان كەيىن كاسىبي تۇردە اينالىسا باستاعان.

ءوزىنىڭ سوزىنە قاراعاندا، بۇرىن ونى كوپ ەشكىم بىلمەسە، وليمپيادادان كەيىن كوشەمەن جاي ءجۇرۋ مۇمكىن ەمەس. كورگەن ادام توقتاپ، قۇتتىقتاپ، سۋرەتكە ءتۇسۋدى سۇرايدى. تەك تۇركيادا عانا ەمەس، يۋسۋفتى سپورتقا جاقىن بۇكىل الەم بىلەدى دەسە، ارتىق ايتقاندىق بولماس. الەۋمەتتىك جەلى ارقىلى جازىپ، تانىسقىسى كەلەتىندەر از ەمەس.

«مەن قازاقستاندىق سپورتشىلاردى جاقسى بىلەمىن. ولارمەن مەن ىرىكتەۋ ساتىسىندا، سوسىن فينالدا سىنعا ءتۇستىم. قازاقستاندىق مەرگەندەرمەن بايلانىستامىن. وليمپيادادا ناتيجەگە قول جەتكىزۋ ءۇشىن تىنباي جۇمىس ىستەپ، ەڭبەكتەنۋ كەرەك. بولاشاقتا قازاقستاندىق مەرگەندەردىڭ جاقسى تابىستارعا جەتەتىنىنە سەنەمىن. ويتكەنى ەڭبەك ناتيجە بەرمەي قويمايدى. 24 جىل بويى جاتتىعىپ، بەسىنشى وليمپيادامدا عانا مەدال الىپ وتىرمىن. مەن كەلەسى وليمپياداعا قاتىسقىم كەلەدى. باپكەرىمە لوس اندجەلەستە 2028 -جىلى التىن مەدال الاتىنىمدى ايتتىم، ول، ارينە، كۇلدى. ءبىز ونىمەن 20 جىل بويى دوسپىز. ەندى التىن جۇلدە ءۇشىن ەڭبەكتەنەمىن. بارلىعىڭىزعا مىڭ العىس، تۇركيادان بارشا قازاقستان حالقىنا سالەم جولدايمىن»، دەدى يۋسۋف ديكەچ.

ەسكە سالا كەتەيىك، بۇدان بۇرىن نوۆاك دجوكوۆيچتىڭ وليمپيادا ويىندارىنىڭ چەمپيونى اتانعانىن جازعان بولاتىنبىز.

اۆتور

عايساعالي سەيتاق