بولاشاق مۇعالىم، دارىگەر، اگرونوم جاساندى ينتەللەكت بويىنشا بازالىق ءبىلىمدى مىندەتتى تۇردە مەڭگەرۋى كەرەك - توقايەۆ

 ۋنيۆەرسيتەتتەردە پاندەردى وقىتۋدىڭ مازمۇنى مەن ءادىسىن ايتارلىقتاي جاڭارتۋ قاجەت. بۇل تۋرالى Digital Bridge 2023 حالىقارالىق تەحنولوگيالىق فورۋمىندا مەملەكەت باسشىسى قاسىم- جومارت توقايەۆ ايتتى، دەپ حابارلايدى Kazinform. 

«ۋنيۆەرسيتەتتەردە پاندەردى وقىتۋدىڭ مازمۇنى مەن ءادىسىن ايتارلىقتاي جاڭارتۋ قاجەت. بولاشاق مۇعالىمدەر، دارىگەرلەر، اگرونومدار، زاڭگەرلەر جانە سالالىق ماماندار جاساندى ينتەللەكت بويىنشا بازالىق ءبىلىمدى مىندەتتى تۇردە مەڭگەرۋى كەرەك. مەن جۋىرداعى جولداۋىمدا كەمىندە ءۇش بەلگىلى جوعارى وقۋ ورنى جاساندى ينتەللەكت باعىتىنا قاجەتتى كادر دايارلاۋمەن جانە زەرتتەۋلەر جۇرگىزۋمەن اينالىسۋى كەرەك دەگەن مىندەت جۇكتەدىم»، - دەدى پرەزيدەنت.

مەملەكەت باسشىسى نازاربايەۆ ۋنيۆەرسيتەتى جانىنداعى اقىلدى جۇيەلەر جانە جاساندى ينتەللەكت ينستيتۋتىن تولىققاندى عىلىمي-زەرتتەۋ ينستيتۋتىنا اينالدىرۋ تاعى ءبىر ماڭىزدى قادام بولاتىندىعىنا نازار اۋدارتتى.

«ول ۇزدىك ماماندار مەن ساراپشىلاردىڭ ورتالىعىنا اينالىپ، ءبىرتۇتاس ەكوجۇيە قالىپتاستىرۋى كەرەك. ينستيتۋت قۇرامىنا IT يندۋسترياسىنىڭ الەمدىك جانە وتاندىق كوشباسشىلارىمەن تىعىز بايلانىستا جۇمىس ىستەيتىن عىلىمي-زەرتتەۋ جانە تاجىريبەلىك-كونسترۋكتورلىق جۇمىستار ورتالىعى كىرەدى. وسى رەتتە ينستيتۋت ازىرلەمەلەرىن كوممەرتسيالاندىرۋ جانە كەڭەيتۋ ماڭىزدى»، - دەدى قاسىم-جومارت توقايەۆ.