«بريكس پليۋس» مەملەكەتتەرى جوعارى وكىلدەرىنىڭ كەزدەسۋى ءوتتى
سانكت-پەتەربۋرگ. قازاقپارات- سانكت- پەتەربۋرگ قالاسىندا «بريكس پليۋس» مەملەكەتتەرىنىڭ قاۋىپسىزدىك ماسەلەلەرىنە جاۋاپتى جوعارى وكىلدەرىنىڭ كەزدەسۋى ءوتتى. جيىنعا قازاقستان رەسپۋبليكاسى قاۋىپسىزدىك كەڭەسىنىڭ حاتشىسى عيزات نۇرداۋلەتوۆ قاتىستى. بۇل تۋرالى اقوردانىڭ باسپا ءسوز قىزمەتى ءمالىم ەتتى.
ءىس-شاراعا قاتىسۋشىلار حالىقارالىق قاۋىپسىزدىككە تونەتىن ەڭ وزەكتى سىن-قاتەرلەر مەن قاۋىپتەر جونىندە پىكىر الماستى. سونداي-اق بەيبىتشىلىك پەن تۇراقتىلىقتى قامتاماسىز ەتۋ ماقساتىندا «بريكس پليۋس» ەلدەرىنىڭ ءوزارا ىقپالداستىعىن تەرەڭدەتۋ ماسەلەلەرى تالقىلاندى.
قازاقستان رەسپۋبليكاسى قاۋىپسىزدىك كەڭەسىنىڭ حاتشىسى ارىپتەستەرىن ەلىمىزدىڭ وڭىرلىك قاۋىپسىزدىك سالاسىنداعى نەگىزگى باعىتتارى بويىنشا ۇستانىمىنان حاباردار ەتتى. سونىمەن قاتار ازىق-تۇلىك جانە سۋ-ەنەرگەتيكالىق قاۋىپسىزدىكتى قامتاماسىز ەتۋ، حالىقارالىق تەرروريزم مەن كيبەرقاۋىپسىزدىك قاتەرلەرىنە قارسى تۇرۋعا قاتىستى بىرلەسكەن شارالاردى ۇيلەستىرۋدىڭ ماڭىزدى ەكەنىن اتاپ ءوتتى.
