برازيليانىڭ جوعارعى سوتى ەلدە يلون ماسكتىڭ X جەلىسىن بۇعاتتاۋدى قولدادى

استانا. KAZINFORM - برازيليا جوعارعى سوتىنىڭ القاسى وتكەن اپتادا يلون ماسكتىڭ X الەۋمەتتىك جەلىسىن (بۇرىنعى Twitter) بۇكىل ەل بويىنشا تولىعىمەن بۇعاتتاۋ تۋرالى شەشىمىن قولدادى، دەپ حابارلايدى ВВС.

القانىڭ بارلىق مۇشەلەرى جەلىنى بۇعاتتاۋدى ماقۇلدادى، الايدا ولاردىڭ ۇشەۋى X بيلىكتىڭ تالاپتارىن ورىنداسا، شەشىم قايتا قارالۋى مۇمكىن ەكەنىن ايتتى.

X پلاتفورماسى سەنبى كۇنى تاڭەرتەڭ بۇكىل برازيليادا بۇعاتتالدى. وسى كەزدە كومپانيانىڭ ۇكىمەتپەن ارداعى داۋدا ونىڭ مۇددەسىن قورعايتىن جاڭا ادۆوكاتتى تاعايىنداۋ مەرزىمى اياقتالدى.

جەلىنى بۇعاتتاۋ جوعارعى سوت سۋدياسى الەكشاندري دي مورايس پەن X يەسى يلون ماسك اراسىنداعى قاقتىعىستىڭ شارىقتاۋ شەگى بولدى. ولاردىڭ داۋى ءساۋىر ايىندا، سوت پلاتفورما اكىمشىلىگىنە جالعان اقپارات تاراتقان ونداعان اككاۋنتتاردى بۇعاتتاۋعا بۇيىرىق بەرىلگەن كەزدە باستالدى.

ايتپەسە، كومپانيانىڭ برازيلياداعى وكىلىن قاماۋعا الامىز دەپ قورقىتتى، دەپ مالىمدەدى X جەلىسى.

كومپانيا ەلدەگى كەڭسەسىن جاۋىپ، سەنزۋرا دەپ اتاعان نارسەگە باعىنبايتىنىن مالىمدەدى. ماسك سۋديانى تيران جانە ديكتاتور دەپ اتاپ، بارلىق توقتاتىلعان اككاۋنتتاردى قايتا ىسكە قوسامىن دەپ قورقىتتى.

30-تامىزدا مورايس جەلىنى بۇعاتتاۋ تۋرالى شەشىم شىعارىپ، سودان كەيىن ماسەلەنى جوعارعى سوتتىڭ بەس ادامنان تۇراتىن القاسىنا قاراۋعا جىبەردى.

وسىعان دەيىن SpaceX كومپانياسىنىڭ بۇرىنعى قىزمەتكەرلەرى يلون ماسكتى سوتقا بەرگەنىن جازعان ەدىك.

اۆتور

زارينا تۋعانبايەۆا