بۇقتىرما سۋ قويماسى ارقىلى وتەتىن كوپىر كەلەسى جىلى ىسكە قوسىلادى

پرەزيدەنت قاسىم- جومارت توقايەۆتىڭ تاپسىرماسىمەن شىعىس قازاقستان وبلىسى كۇرشىم مەن سامار اۋداندارىنىڭ اراسىن جالعايتىن « قىزىل تۋ» وتكەلىنە سالىنىپ جاتقان كوپىر كەلەسى جىلى سىناق رەجيمىندە ىسكە قوسىلادى، دەپ حابارلايدى Kazinform.

ش ق و جولاۋشى كولىگى جانە اۆتوموبيل جولدارى باسقارماسىنىڭ مالىمەتىنە سۇيەنسەك، جالپى ۇزىندىعى 1316 مەتر بولاتىن كوپىردى سالۋعا 61,4 ميلليارد تەڭگە جۇمسالماق.

بۇگىنگى تاڭدا 27,4 ميلليارد تەڭگە يگەرىلدى.

جىل سوڭىنا دەيىن رەسپۋبليكالىق بيۋدجەتتەن قۇرىلىسقا بەس ميلليارد تەڭگە بولىنبەك. سونداي- اق وبلىستىق بيۋدجەتتەن 3 ميلليارد تەڭگە قاراستىرىلعان.

«قازىردىڭ وزىندە ءۇش ميلليارد تەڭگەنىڭ جۇمىسى اياقتالدى. اقشا بولىنبەي قالعان كەزدە دە مەردىگەرلەر توقتاماي، نەسيە الىپ، جۇمىستى جالعاستىرعان. ەندى اقشا تۇسكەن سوڭ تاعى دا كوپىر ارالىقتارى ساتىپ الىنادى. ولار رەسەيدىڭ قورعان قالاسىنان جەتكىزىلەدى»، - دەيدى باسقارما باسشىسى نۇرجان ءجۇمادىلوۆ.

ونىڭ ايتۋىنشا، ەگەر 2024 -جىلى قارجىلاندىرۋ جوسپارعا سايكەس جۇرگىزىلسە جىل سوڭىنا دەيىن كوپىر سىناق رەجيمىندە ىسكە قوسىلادى.

ال كەلىسىمشارت بويىنشا قۇرىلىس 2025 -جىلدىڭ ءبىرىنشى جارتىسىندا تۇپكىلىكتى اياقتالۋى كەرەك.

اۆتور

تالعاتجان مۇحامەتبەك ۇلى