بەكتەنوۆ: جاساندى ينتەللەكت تەحنولوگيالارىن دامىتۋ - ۇكىمەتتىڭ باستى مىندەتى
استانا. KAZINFORM - پرەمەر-مينيسترگە AI Kitap جانە OlympIQ جوبالارىن پيلوتتىق رەجيمدە ەنگىزۋ قاراستىرىلاتىن مەكتەپتەر مەن سپورت فەدەراتسيالارىنىڭ تىزبەسى جاسالعانى تۋرالى ايتىلدى. بۇل تۋرالى ۇكىمەتتىڭ باسپا ءسوز قىزمەتى حابارلادى.
ولجاس بەكتەنوۆ قازاقستاندىق IT- ماماندارمەن الەۋمەتتىك سالاداعى جانە ونەركاسىپتەگى ستارتاپتاردى تالقىلادى
پرەمەر-مينيستر ولجاس بەكتەنوۆ قازاقستاندىق IT- كومپانيالاردىڭ وكىلدەرىمەن مەملەكەت باسشىسىنىڭ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى قازاقستان حالقىنا جولداۋىندا قويىلعان مىندەتتەر شەڭبەرىندە ءبىلىم بەرۋ، سپورت جانە ونەركاسىپ سالالارىنداعى ج ي-ستارتاپتاردى قولداۋ ماسەلەلەرىن تالقىلادى.
وتاندىق Paradigm Shift (CodiPlay) كومپانياسىنىڭ وكىلدەرى جاڭا جوبالاردىڭ جۇزەگە اسىرىلۋ بارىسى تۋرالى ايتىپ بەردى:
AI Kitap - بۇل مەكتەپ پاندەرى بويىنشا ءار وقۋشىنىڭ دەڭگەيىنە قاراي وقۋ ماتەريالىن لايىقتاۋعا ارنالعان، پروگرەسكە تالداۋ جاسايتىن جانە بىلىمدەگى ولقىلىقتاردى انىقتايتىن سيفرلىق وقۋلىق. ونىڭ جۇمىس نۇسقاسى ازىرلەندى، AI Kitap AITU- مەن ينتەگراتسيالانىپ جاتىر.
OlympIQ - سپورتتى دامىتۋعا ارنالعان تەحنولوگيالىق پلاتفورما. جۇيە اناليتيكالىق، وپەراتسيالىق، مەديتسينالىق جانە ۇيىمداستىرۋشىلىق دەرەكتەردى جاساندى ينتەللەكت ارقىلى وڭدەۋگە مۇمكىندىك بەرەدى. ونىڭ جول كارتاسى ازىرلەندى، پروتوتيپتەردىڭ العاشقى نۇسقالارى دايىندالدى.
پرەمەر-مينيسترگە AI Kitap جانە OlympIQ جوبالارىن پيلوتتىق رەجيمدە ەنگىزۋ قاراستىرىلاتىن مەكتەپتەر مەن سپورت فەدەراتسيالارىنىڭ تىزبەسى جاسالعانى تۋرالى حابارلاندى.
- جاساندى ينتەللەكت تەحنولوگيالارىن دامىتۋ - ۇكىمەتتىڭ باستى مىندەتى. ءبىز وتاندىق كومپانيالاردىڭ ونىمدەرىن جان-جاقتى قولداۋعا دايىنبىز، - دەپ اتاپ ءوتتى ولجاس بەكتەنوۆ.
سونداي-اق كەزدەسۋدە كومپانيانىڭ وندىرىستىك ۇدەرىستەردى وڭتايلاندىرۋعا، ەنەرگەتيكا جانە كولىك سالالارىنىڭ تيىمدىلىگىن ارتتىرۋعا، وپەراتسيالىق شىعىنداردى ازايتۋعا جانە تاۋەكەلدەردى باسقارۋعا كومەكتەسەتىن تەحنولوگيالاردى جاساپ شىعارۋ باستامالارى قارالدى. ونىڭ ونىمدەرىنە ماڭىزدى سالالارعا ەنگىزىلگەن دەرەكتەردى تالداۋ، بولجاۋ جانە اۆتوماتتاندىرۋدىڭ ينتەللەكتۋالدى جۇيەلەرى كىرەدى.
كەزدەسۋ قورىتىندىسى بويىنشا ۋاكىلەتتى ورگاندارعا IT- مامانداردىڭ ايتقان ۇسىنىستارىن قاراستىرۋ تاپسىرىلدى.
