بۇدان بىلاي ەلگە كەلگەن شەتەلدىكتەر تۋريستىك جارنا تولەمەيدى

2022 -جىلى ەلىمىزدىڭ اۋماعىندا ەنگىزىلگەن شەتەلدىكتەرگە ارنالعان تۋريستىك جارنا جويىلادى. بۇل اقپاراتتى تۋريزم جانە سپورت مينيسترلىگى راستادى، دەپ حابارلايدى Kazinform.

«ق ر تۋريزم جانە سپورت ءمينيسترىنىڭ 2023 -جىلدىڭ 27-جەلتوقسانىنداعى № 347-بۇيرىعىمەن شەتەلدىكتەردىڭ تۋريستىك جارنا تولەۋ ەرەجەسىنە وزگەرتۋلەر ەنگىزىلدى. وعان سايكەس، قازاقستاننىڭ بۇكىل اۋماعىندا نولدىك ستاۆكا قولدانىلادى. اتالعان بۇيرىق وتكەن جىلدىڭ 28-جەلتوقسانىندا ادىلەت مينيسترلىگىندە مەملەكەتتىك تىركەۋدەن ءوتتى جانە ول رەسمي جاريالانعان كۇننەن كەيىن 10 كۇنتىزبەلىك كۇن وتكەننەن كەيىن قولدانىسقا ەنگىزىلەدى»، - دەپ اتاپ ءوتتى مينيسترلىكتەن.

دەمەك، 7-قاڭتاردان باستاپ شەتەلدىك تۋريستەر جارنا تولەۋدەن بوساتىلادى.

ەستەرىڭىزگە سالا كەتسەك، 2022 -جىلى ەنگىزىلگەن تۋريستىك جارنا - تۋريستەرگە جاتاقحانالاردى، قوناق ۇيلەردى، قالالار مەن اۋداندارداعى جالعا بەرىلەتىن تۇرعىن ۇيلەردى قوسپاعاندا، تۋريستەردى ورنالاستىرۋ ورىندارىندا بولعان ءاربىر تاۋلىك ءۇشىن الىناتىن تولەم.

تۋريستىك وپەراتورلار شەتەلدىكتەر ءۇشىن الىنعان قاراجاتتى جەرگىلىكتى بيۋدجەتكە اۋداردى.

جارنا مولشەرىن اكىمدىكتەر 1 دەن 3 پايىزعا دەيىنگى مولشەردە انىقتايتىن.