باتىس قازاقستاندا ءتورت ادامدى ولتىرگەن وزبەكستاندىق ءومىر بويىنا باس بوستاندىعىنان ايىرىلدى

ورال. KAZINFORM - باتىس قازاقستان وبلىسى قىلمىستىق ىستەر جونىندەگى مامانداندىرىلعان اۋدانارالىق سوتىندا ج- عا قاتىستى ق ر ق ك 99-بابى 2-بولىگى 1، 6-تارماقتارىنا سايكەس قىلمىستىق ىسكە نۇكتە قويىلدى.

ب ق و سوتىنىڭ باسپا ءسوز قىزمەتىنەن ءمالىم ەتكەنىندەي، وتكەن جىلدىڭ كوكتەمىندە 15 ادام وزبەكستاننان قازاقستانعا ماۋسىمدىق جۇمىسقا كەلگەن.

ولار باقشا داقىلدارىن وسىرۋمەن اينالىساتىن شارۋا قوجالىعىندا جۇمىسشى بولىپ قىزمەت اتقارعان. وزدەرى اۋىلدان ءۇش شاقىرىمداي جەردە قوجالىق اۋماعىنداعى ۋاقىتشا باسپانادا تۇرعان.

سول جىلى 9 -مامىردا ساعات 20.00 شاماسىندا ج. جەرلەستەرىنىڭ ءبىرىنىڭ تۋعان كۇنىن تويلاپ، الكوگولدىك ىشىمدىك ىشكەن. ساعات 23.00-دە ولاردىڭ اراسىندا كەلىسپەۋشىلىك تۋىنداپ، سونىڭ بارىسىندا سوتتالۋشى بالتامەن باسپاناعا كىرىپ، وتانداستارىنىڭ بىرىنە قاراي لاقتىرىپ جىبەرگەن. سودان كەيىن «ءبارىڭدى ولتىرەمىن!» دەپ ايقايلاپ، 5 ليتر بەنزين قۇيىلعان پلاستيك ىدىستىڭ قاقپاعىن اشىپ، جانىپ تۇرعان گاز پليتاسىنا لاقتىرعاندا، ءورت شىققان.

ءورت سالدارىنان ءتورت ادام وقيعا ورنىندا كوز جۇمىپ، تاعى بىرەۋى تەرميالىق كۇيىك جاراقاتىن العان. مەملەكەتتىك ايىپتاۋشى ج- نى قىلمىستىق قۇقىق بۇزۋشىلىق جاساعانى ءۇشىن كىنالى دەپ تانىپ، ءومىر بويىنا باس بوستاندىعىنان ايىرۋدى سۇرادى.

جابىرلەنۋشىلەر ازاماتتىق تالاپ قويۋدان باس تارتىپ، جازاعا قاتىستى مەملەكەتتىك ايىپتاۋشىنى قولدادى. قورعاۋ تارابى ج- نىڭ ارەكەتىن ق ر ق ك 104-بابىنىڭ 2-بولىگىنە سايكەس ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان دەپ قايتا سارالاۋدى ءوتىندى.

- سوتتالۋشى ق ر ق ك 99-بابى 2-بولىگى 1، 6-تارماقتارىنا سايكەس ايىپتى دەپ تانىلىپ، ءومىر بويىنا باس بوستاندىعىنان ايىرىلدى. ول جازاسىن قاۋىپسىزدىگى توتەنشە قىلمىستىق-اتقارۋ جۇيەسى مەكەمەسىندە وتەيدى. ۇكىم زاڭدى كۇشىنە ەندى، - دەپ حابارلادى ۆەدومستۆودان.

ەسكە سالا كەتەيىك، بۇدان بۇرىن ورالدا ورتەنگەن گاراج ورنىنان ەر ادامنىڭ مۇردەسى تابىلعانىن جازعان ەدىك.

اۆتور

عايساعالي سەيتاق