باتىس قازاقستان قىتايمەن ىنتىماقتاستىقتى كەڭەيتىپ جاتىر
ورال. KAZINFORM - بەيجىڭدە ءبىرقاتار ستراتەگيالىق مەموراندۋمعا قول قويىلدى.
قىتاي حالىق رەسپۋبليكاسىنا جۇمىس ساپارى اياسىندا باتىس قازاقستان وبلىسىنىڭ اكىمى ناريمان تورەعاليەۆ قىتايلىق بيزنەس وكىلدەرىمەن بىرنەشە كەزدەسۋ وتكىزىپ، ىنتىماقتاستىق تۋرالى بەس ەكىجاقتى مەموراندۋمعا قول قويدى.
قۇجاتتارعا قول قويۋ ءراسىمى قىتايدىڭ جەتەكشى كومپانيالارى باسشىلارىنىڭ قاتىسۋىمەن قازاقستان رەسپۋبليكاسىنىڭ قىتاي حالىق رەسپۋبليكاسىنداعى ەلشىلىگىندە ءوتتى.
بۇل شارالار قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ ينۆەستيتسيا تارتۋ جانە وڭىرلەردىڭ ونەركاسىپتىك الەۋەتىن دامىتۋ جونىندەگى تاپسىرماسىن ورىنداۋ ماقساتىندا جۇرگىزىلىپ جاتىر.
ق ح ر استاناسىندا مەديتسينا، ونەركاسىپ، ەنەرگەتيكا، قۇرىلىس جانە گاز-حيميا سالالارىن قامتيتىن بەس مەموراندۋمعا قول قويىلدى:
«Cheng Tian Run Kang Medical Limited» كومپانياسىمەن ءوزارا ىنتىماقتاستىق تۋرالى مەموراندۋم - مەديتسينالىق ينفراقۇرىلىمدى دامىتۋعا جانە دەنساۋلىق ساقتاۋ سالاسىندا تەحنولوگيالاردى بەيىمدەۋگە باعىتتالعان.
«Yino» حالىقارالىق كومپانياسىمەن (گونكونگ) مەموراندۋم - ونەركاسىپ سەكتورىندا جانە اۋىل شارۋاشىلىعى تەحنيكاسىن ءوندىرۋ بويىنشا بىرلەسكەن جوبالاردى جۇزەگە اسىرۋدى كوزدەيدى.
Vega Power كومپانياسىمەن مەموراندۋم - ەنەرگەتيكالىق سەرىكتەستىك جانە بالامالى ەنەرگيا كوزدەرىن ەنگىزۋ ماسەلەلەرىن قامتيدى.
Sunway Concept Limited- پەن ءوزارا تۇسىنىستىك تۋرالى مەموراندۋم تۇرعىن ءۇي قۇرىلىسىن دامىتۋعا جانە قالالىق ينفراقۇرىلىمدى جاڭعىرتۋعا باعىتتالعان.
Foshan City Construction Engineering Co.، Ltd. جانە «Zhaik Petroleum LTD» كومپانيالارىمەن ءۇشجاقتى مەموراندۋم – ب ق و اۋماعىندا مەتانول وندىرەتىن زاۋىت سالۋ تۋرالى.
قازاقستان رەسپۋبليكاسى باتىس قازاقستان وبلىسى اكىمدىگى، CHN Energy International Development Co.، Limited جانە «باتىس پاۋەر» جشس اراسىنداعى گتەس-200 «ورال» ستانتسياسىن كەڭەيتۋ جوباسىن ىسكە اسىرۋ بويىنشا جول كارتاسى.
ناريمان تورەعاليەۆ ق ح ر ءوڭىردىڭ نەگىزگى سىرتقى ەكونوميكالىق سەرىكتەستەرىنىڭ ءبىرى بولىپ قالا بەرەتىنىن اتاپ ءوتتى. قول قويىلعان قۇجاتتار ينۆەستيتسيالاردىڭ وسۋىنە، جۇمىس ورىندارىنىڭ اشىلۋىنا جانە باتىس قازاقستاننىڭ وندىرىستىك الەۋەتىن دامىتۋعا ىقپال ەتەتىن جاڭا جوبالارعا باستاما بەرەدى.
- پرەزيدەنتتىڭ قولداۋى، ۇكىمەتتىڭ جۇيەلى جۇمىسى جانە ءوڭىردىڭ اشىقتىعى بىزگە جاڭا وندىرىستەر مەن جۇمىس ورىندارىن قۇرا وتىرىپ، ينۆەستيتسيالىق جوبالاردى سەنىمدى تۇردە ىلگەرىلەتۋگە مۇمكىندىك بەرەدى. قول قويىلعان مەموراندۋمدار - بۇل ءوزارا ءىس -قيمىلدىڭ ناقتى ناتيجەسى، - دەپ اتاپ ءوتتى ناريمان تورەعاليەۆ.
ءار باعىت بويىنشا سالالىق ۆەدومستۆولار مەن ينۆەستورلاردىڭ قاتىسۋىمەن جەكە ءىس-قيمىل جوسپارى ازىرلەنەتىن بولادى.
بۇل كەزدەسۋ قازاقستان رەسپۋبليكاسىنىڭ قىتاي حالىق رەسپۋبليكاسىنداعى ەلشىلىگىنىڭ قولداۋىمەن ۇيىمداستىرىلدى.
