بانكتەر تۋرالى جاڭا زاڭ قاجەت - پرەزيدەنت

استانا. KAZINFORM - بىزدە رەسپۋبليكالىق بيۋدجەتتىڭ كىرىس بولىگى ورىندالماي جاتىر. بۇل تۋرالى قازاقستان حالقىنا جولداۋىن جاريالاۋ كەزىندە مەملەكەت باسشىسى قاسىم-جومارت توقايەۆ ايتتى.

«اقشا- نەسيە ساياساتى مەن فيسكالدى ساياساتتىڭ اراسىنداعى ۇيلەسىمسىزدىكتى جويۋ قاجەت. قازىر ناقتى سەكتورعا نەسيە ءالى دە ويداعىداي بەرىلمەي جاتقانىن اشىق ايتۋىمىز كەرەك. شاعىن جانە ورتا بيزنەستى جەتكىلىكتى قارجىلاندىرۋ ماسەلەسى دە شەشىمىن تاپقان جوق. بۇل جاعداي ەلىمىزدەگى ىسكەرلىك ورتانىڭ بەلسەندىلىگىنە، ەكونوميكانىڭ تۇراقتىلىعىنا جانە دايەكتى دامۋىنا كەدەرگى كەلتىرىپ وتىر. ۇكىمەت پەن ۇلتتىق بانك بىرلەسىپ، وسىعان قاتىستى وڭتايلى شەشىمدەر ويلاستىرۋى كەرەك. بانكتەردىڭ ەكونوميكاعا كوبىرەك قارجى قۇيۋىنا جاعداي جاساۋ قاجەت»، - دەدى قاسىم-جومارت توقايەۆ.

مەملەكەت باسشىسىنىڭ ايتۋىنشا، حالىقارالىق ساراپشىلار قازاق بانكتەرىن رەسۋرسقا باي ەلدەر ىشىندەگى ەڭ كوپ پايدا تاباتىن بانكتەر ساناتىنا قوسادى. سوندىقتان وسى سالاداعى سالىق مولشەرى ءادىل بەلگىلەنۋگە ءتيىس. بانكتەردىڭ اكسيونەرلەرى ديۆيدەندىنە سايكەس سالىق تولەۋى كەرەك.

«بانكتەرگە مەملەكەت كورسەتكەن كومەك تۇرعىسىنان قاراساق، بۇل - وتە ورىندى ۇستانىم. سيفرلىق اكتيۆتەردىڭ اينالىمىن قامتاماسىز ەتۋ جانە بانك سالاسىنا يننوۆاتسيالاردى قاۋىپسىزدىك تالابىنا سايكەس ەنگىزۋ ءۇشىن ونى رەتتەيتىن تەتىكتەردىڭ تۇراقتى بولۋى ماڭىزدى. بىزگە بانكتەر تۋرالى جاڭا زاڭ قاجەت. بۇل قۇجاتتا ەكونوميكالىق بەلسەندىلىكتى قولداۋ جانە فينتەح سالاسىن قارقىندى دامىتۋ سياقتى وزەكتى ماسەلەلەر شەشىمىن تابۋى كەرەك. قازىر قولدانىپ جۇرگەن زاڭ شامامەن 30 جىل بۇرىن قابىلدانعان. ول كەزدە زامان دا مۇلدە باسقا بولدى. اشىعىن ايتۋىمىز كەرەك، بىزدە رەسپۋبليكالىق بيۋدجەتتىڭ كىرىس بولىگى ورىندالماي جاتىر. بۇل - بۇرىنعى جانە قازىرگى ۇكىمەت جۇمىسىنداعى ۇلكەن ولقىلىق. مۇنداي جاعداي ءجيى قايتالانسا، تۇپتەپ كەلگەندە، ەلىمىزدىڭ دامۋىن تەجەيدى. سوندىقتان وعان جول بەرمەۋ قاجەت. بيۋدجەت قارجىسىن ءتيىمدى پايدالانىپ، ونىڭ شىعىس بولىگىن شەكتەپ، قاتاڭ باقىلاۋدا ۇستاعان ءجون. ۇكىمەت ۇلتتىق بانكپەن بىرلەسىپ، وسى ماسەلەگە قاتىستى ناقتى شارالار قابىلداۋعا ءتيىس»، - دەدى پرەزيدەنت.

بۇعان دەيىن مەملەكەت باسشىسىنىڭ جولداۋىندا ەلىمىزدىڭ ساياسي جانە الەۋمەتتىك- ەكونوميكالىق دامۋ كەلەشەگىمەن بايلانىستى ماسەلەلەر قامتىلاتىنى ايتىلعان بولاتىن.

اۆتور
رۋسلان عابباسوۆ