بانكتەر تۋرالى جاڭا زاڭ 2025 -جىلدىڭ ماۋسىمىندا قابىلدانادى
استانا. KAZINFORM - بانكتەر تۋرالى جاڭا زاڭ 2025 -جىلدىڭ ماۋسىمىندا قابىلدانادى. بۇل تۋرالى ۇكىمەت وتىرىسىندا مەملەكەت باسشىسىنىڭ جولداۋىن ىسكە اسىرۋ جونىندەگى جالپىۇلتتىق ءىس-شارالار جوسپارىنىڭ جوباسىن تانىستىرعان پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ ايتتى.
«بانكتەر مەن كرەديتتىك ۇيىمدار قىزمەتىن رەتتەيتىن جاڭا زاڭ جوباسى ازىرلەنەتىن بولادى. زاڭ جوباسىنىڭ نەگىزگى مىندەتتەرى - ەكونوميكالىق بەلسەندىلىكتى ىنتالاندىرۋ، سيفرلىق اكتيۆتەردى جانە قارجىلىق تەحنولوگيالاردى رەتتەۋ. قابىلداۋ مەرزىمى 2025 -جىلعى ماۋسىم دەپ جوسپارلاپ وتىرمىز. وسى بانك بويىنشا تەڭگەرىمسىزدىكتى جويۋ ماقساتىندا تولەنەتىن ديۆيدەندتەردى ەسكەرە وتىرىپ، بانك سەكتورىنا تەڭگەرىمدى سالىق سالۋدۆ ەنگىزۋ جونىندەگى شارالار قابىلدانادى»، - دەدى ول.
ۆيتسە-پرەمەردىڭ اتاپ وتۋىنشە، سالىق جانە بيۋدجەت ساياساتىن جەتىلدىرۋ جەلىسى بويىنشا وسى جىلدىڭ سوڭىنا دەيىن كىرىستەر مەن شىعىستاردى جوسپارلاۋ ساپاسىن ارتتىرۋ، بيۋدجەت تاپشىلىعىن تولتىرۋدىڭ وتەماقىلىق تەتىكتەرىن ەنگىزۋ، ۇلتتىق قوردىڭ اكتيۆتەرىن باسقارۋ تيىمدىلىگىن ارتتىرۋ ماسەلەلەرىن قامتيتىن بيۋدجەت زاڭناماسىن جەتىلدىرۋ جونىندەگى ۇسىنىستار ازىرلەنەدى.
«2026 -جىلدىڭ باسىنان جاڭا سالىق كودەكسى قولدانىسقا ەنگىزىلەدى. مۇنىڭ نەگىزگى مىندەتتەرى كاسىپكەرلەر ءۇشىن ءتيىمدى جاعدايلاردى ناشارلاتپاي سالىق رەجيمدەرىن وڭتايلاندىرۋ، جەكە تابىس سالىعى سارالانعان مولشەرلەمەسىن بەلگىلەۋ، ماجبىرلەپ ءوندىرۋ الۋ شارالارىن قولدانباي سالىق بەرەشەگىنىڭ شەگىن ۇلعايتۋ، سالىق بەرەشەگى شەگىندە عانا شەكتەۋلەر قويۋ، كەپىلمەن قامتاماسىز ەتىلمەيتىن سالىقتار بويىنشا بەرەشەكتى ءبولۋ تولەۋدىڭ جانە باسقا دا پارمەندىردى ۇسىنۋ. جاڭا سالىق زاڭناماسىنىڭ باستى مىندەتى مەملەكەتتىڭ قاجەتتىلىكتەرى مەن بيزنەستىڭ مۇمكىندىكتەرى اراسىنداعى تەڭگەرىمدى ساقتاۋ. 2025 -جىلدىڭ سوڭىنا دەيىن سالىقتىق اكىمشىلەندىرۋدىڭ ءبىرىڭعاي اقپاراتتىق جۇيەسىن ەنگىزۋ كوزدەلەدى. مۇنان باسقا، شەكارا ماڭىنداعى كەدەن بەكەتتەرى بويىنشا جۇمىستاردى اياقتاۋعا، سونداي-اق كىرىستەردىڭ زاڭسىز اعىنىنا جول بەرمەۋگە باعىتتالعان كەشەندى شارالار ىسكە اسىرىلادى. سالىقتىق اكىمشىلەندىرۋدىڭ بارلىق پروتسەستەرىن جەتىلدىرۋ جونىندەگى جۇمىس دەپۋتاتتىق كورپۋسپەن، قوعاممەن بىرلەسىپ جانە ساراپشىلار مەن بيزنەس-قوعامداستىق وكىلدەرىن جۇمىلدىرۋ جولىمەن جالعاسادى»، - دەدى نۇرلان بايبازاروۆ.
اۆتور
مارلان جيەمباي
