بالالاردىڭ الەۋمەتتىك جەلىدەگى اككاۋنتتارىنا قاتىستى جاڭا ءتارتىپ ەنگىزىلمەك
استانا. KAZINFORM - ەلىمىزدە ونلاين-پلاتفورمانى پايدالانۋشىلاردىڭ جاسىن راستاۋدىڭ ارنايى قاعيدالارى ازىرلەنەدى. بۇل تۋرالى قۇرىلتاي دەپۋتاتتارىنىڭ ساۋالىنا پرەمەر- مينيستر ولجاس بەكتەنوۆتىڭ جاۋابىندا ايتىلعان.
- ۇكىمەت قولدانىستاعى زاڭعا ون التى جاسقا دەيىنگى پايدالانۋشىلاردى ونلاين- پلاتفورمالاردا تىركەۋدى رەتتەۋگە بايلانىستى تۇزەتۋلەر ازىرلەدى. قازىرگى تاڭدا تۇزەتۋلەر قازاقستان رەسپۋبليكاسى قۇرىلتايىنىڭ قاراۋىندا. زاڭنامالىق تۇزەتۋلەر قابىلدانعاننان كەيىن ونلاين-پلاتفورمانى پايدالانۋشىلاردىڭ جاسىن راستاۋدىڭ ارنايى قاعيدالارى ازىرلەنەدى. ازىرلەۋ بارىسىندا ونلاين-پلاتفورمالاردىڭ قولدانىلىپ جۇرگەن تەتىكتەرى، جاساندى ينتەللەكت كومەگىمەن سايكەستەندىرۋ، قارالاتىن كونتەنت پەن پايدالانۋشىنىڭ بەلسەندىلىگى ەسكەرىلەدى. بۇگىنگى تاڭدا ونلاين-پلاتفورمالاردا ءتيىستى تەحنولوگيالىق مۇمكىندىكتەر بار،-دەدى ۇكىمەت باسشىسى.
پرەمەر-ءمينيستردىڭ اتاپ وتۋىنشە، جاڭا تالاپتاردىڭ ساپالى ورىندالۋىن قامتاماسىز ەتۋ ماقساتىندا اتالعان نورمانى قولدانىسقا ەنگىزۋ ءۇشىن وتپەلى كەزەڭ كوزدەلەدى.
- ون التى جاسقا دەيىنگى ونلاين-پلاتفورمانى پايدالانۋشىلاردىڭ قولدانىستاعى اككاۋنتتارىن ۋاقىتشا توقتاتۋ قارالاتىن بولادى. نورماتيۆتىك قۇقىقتىق اكت قازاقستان رەسپۋبليكاسىنىڭ اۋماعىنداعى ونلاين-پلاتفورمالاردىڭ وكىلدىكتەرىمەن بىرلەسىپ تالقىلانادى. ۇسىنىلاتىن تاسىلدەر پايدالانۋشىنىڭ جەكە دەرەكتەرىنىڭ تارالۋىنا جول بەرمەۋ نەگىزىندە ونىڭ جاسىن راستاۋ قاعيداتىنا نەگىزدەلەدى. سول ارقىلى بالالاردىڭ سيفرلىق كەڭىستىكتەگى قۇقىقتارى مەن زاڭدى مۇددەلەرى قورعالىپ، كامەلەتكە تولماعاندار ءۇشىن قاۋىپسىز سيفرلىق ورتا قالىپتاستىرىلادى. قازاقستان رەسپۋبليكاسى قۇرىلتايىنىڭ دەپۋتاتتارىمەن جۇمىس توپتارىندا تالقىلاۋ كەزىندە ءتيىستى شەكتەۋدى ناقتى ىسكە اسىرۋ تەتىكتەرى ەگجەي-تەگجەيلى پىسىقتالاتىن بولادى،-دەدى ولجاس بەكتەنوۆ.
بۇعان دەيىن قۇرىلتاي بالالاردىڭ الەۋمەتتىك جەلىگە تىركەلۋىنە شەكتەۋ قويۋ تەتىگىن ناقتىلاۋ ماسەلەسىن كوتەرگەنىن جازعان ەدىك.
