بالالاردىڭ شىعارماشىلىق ءومىرى وڭ وزگەرىسكە تولى
استانا. KAZINFORM - مەملەكەت باسشىسى قاسىم-جومارت توقايەۆ بالالار مەن جاسوسپىرىمدەرگە ارنالعان شىعارماشىلىق ۇيىرمەلەردى مەملەكەتتىك تاپسىرىس نەگىزىندە ۇيىمداستىرۋعا كوڭىل بولگەن بولاتىن.
بۇل رەتتە، ءار وڭىردە شىعارماشىلىق ۇيىرمەلەردىڭ تامىرىنا قان جۇگىرىپ، بالالاردىڭ ونەرگە، سپورتقا دەگەن قىزىعۋشىلىعى ارتا ءتۇستى. جۋىردا استانا قالاسىندا «سارى ارقا» انسامبلىنىڭ «ءبىز بيلەۋ ءۇشىن جارالعانبىز» اتتى ەسەپتىك كونسەرتى ءوتتى.
انسامبل جەتەكشىسى ايىمگۇل نۇعۇماروۆانىڭ ايتۋىنشا، انسامبل 2021 -جىلدىڭ قاراشا ايىندا قۇرىلعان. از ۋاقىتتىڭ ىشىندە بالالار رەسپۋبليكالىق جارىستار بىلاي تۇرسىن، حالىقارالىق ونەر دودالارىندا جۇلدەلى ورىنداردى يەلەنگەن.
«جاس جەتكىنشەكتەردىڭ ەل الدىندا ونەر كورسەتۋى مەملەكەت تاراپىنان بالالارعا دەگەن قامقورلىعىنىڭ ارقاسىندا. اتاپ ايتساق، «دامۋ بالا» باعدارلاماسى ارقىلى تالانتتى دا تالاپتى بۇلدىرشىندەر ءوز-ءوزىن دامىتۋعا مۇمكىندىك الدى. بۇل رەتتە، جەتەكشىلەردىڭ دە، اتا-انالاردىڭ دا ەسەلى ەڭبەگىن اتاپ وتكەن ءجون. ءبىزدى بۇگىن 17 جىل ساحنادا ونەر كورسەتىپ كەلە جاتقان تەمىرتاۋلىق «گيۋزەل» ۇلگىلى بي ءانسامبلى قولداپ كەلىپ وتىر. ونەردى باعالايتىن بارشا جاندارعا العىسىم شەكسىز»، - دەدى ول.
ەسەپتىك كونسەرت بارىسىندا «سارى ارقا» ءانسامبلىنىڭ تاربيەلەنۋشىلەرى جىل بويى ۇيرەنگەن بيلەرىن پاش ەتىپ، اۋەلەتىپ ءان شىرقادى.
اۆتور
ورالحان قوجانوۆ
