بالالار ىزاقورلىعىنىڭ سەبەبى تابىلدى

استانا. قازاقپارات - كانادادا مونرەال ۋنيۆەرسيتەتىنىڭ جانە سەنت-جيۋستين اۋرۋحاناسىنىڭ قىزمەتكەرلەرى بالانىڭ ىزاقور بولۋى تۇقىم قۋالايتىن قاسيەت ەكەنىن انىقتاعان،دەپ جازادى «رەسەي گازەتى».

بۇرىن ساراپشىلار بالالاردىڭ ىزاقورلىعى ءسابي كەزەڭىندە، ال قارسى مىنەز-قۇلىق كورسەتۋدىڭ دەر كەزى ەكىدەن تورتكە دەيىنگى جاستى قامتيدى دەپ مالىمدەگەن. زەرتتەۋ بارىسىندا كانادالىقتار 667 جۇپ ەگىزدەردىڭ مىنەز-قۇلقى مەن شىققان تەگىن زەردەلەگەن، ال اتا-انالارىنا بالاعا 20، 32 جانە 52 اي بولعاندا، ولاردا بولاتىن فيزيكالىق ىزاقورلىق دەڭگەيىن باعالاۋدى ۇسىنعان.

ناتيجەسىندە بەلگىلى فاكتى راستالدى: فيزيكالىق ىزاقورلىقتىڭ دەر كەزى ەرتە بالالىق شاقتا بولادى ەكەن. الايدا باستاپقىداعى جاعدايلاردىڭ جيىلىگىنە، فيزيكالىق ىزاقورلىقتىڭ وزگەرۋ دەڭگەيىنە سىرتقى فاكتور دا، تۇقىم قۋالاۋشىلىق فاكتور دا اسەر ەتكەن. زەرتتەۋشىلەر بالالاردىڭ ىزاقورلىعىنا ىقپال ەتەتىن تۇقىم قۋالاۋشىلىق شامامەن 50 پايىزدى قۇرايدى دەپ سانايدى.

«تۇقىم قۋالاۋشىلىقپەن كەلەتىن فيزيكالىق ىزاقورلىق وزگەرمەيدى دەگەن ۇعىم جوق»، دەدى زەرتتەۋدىڭ اۆتورى ەريك لاكرۋس. ءبىراز ۋاقىتتان سوڭ كوپتەگەن بالالار مەن جاسوسپىرىمدەر بۇل اۋىر كەزەڭدى ەڭسەرىپ، ادامدارمەن جىلى قارىم-قاتىناستى داعدىعا اينالدىرا الادى.

چيكاگو ۋنيۆەرسيتەتىنىڭ بۇرىنعى قىزمەتكەرلەرى جاسوسپىرىمدەردىڭ وتپەلى كەزەڭىندە پايدا بولاتىن ءوزىن-ءوزى ۇستاي الماۋ، اشۋىن تەجەي الماۋ سياقتى ساتتەرىندە اسپيرين كومەكتەسە الاتىنىن انىقتاعان.