بالاباقشادا بالالارمەن جۇمىس ىستەگەن ۇنايدى - ساعىنىش نازكەنوۆ

پەتروپاۆل. KAZINFORM - ءبىلىم بەرۋ سالاسىندا، سونىڭ ىشىندە مەكتەپكە دەيىنگى ءبىلىم بەرۋ مەكەمەلەرىندە ەرلەردىڭ ۇلەسى تىم از. ماسەلەن، سولتۇستىك قازاقستان وبلىسىنداعى وسىنداي 449 مەكەمەدە ءۇش مىڭعا جۋىق پەداگوگ بولسا، سونىڭ 172- ءسى عانا ەر ادام.

Мамандығыңды жақсы көрсең, алынбайтын қамал жоқ – Сағыныш Назкенов
Фото: кейіпкердің жеке мұрағатынан

سودان دا بولار، بۇلدىرشىندەرمەن ەرتەڭگىلىكتە بيلەپ جۇرگەن جىگىتتىڭ جەلىدەگى بەينەروليگى كوپتى ءسۇيسىنتتى. 23 جاستاعى ساعىنىش نازكەنوۆ «باتىر» بالاباقشاسىندا مۋزىكا ءپانىنىڭ مۇعالىمى.

-ساعىنىش رۋسلان ۇلى، ءسىزدىڭ بالاباقشا بۇلدىرشىندەرىمەن بيلەپ جاتقان ۆيدەوڭىز الەۋمەتتىك جەلىدە تارادى. بۇل قاشان بولعان ەدى، ءبيدى ءسىز ۇيرەتتىڭىز بە؟

- «اقشاقار» دەپ اتالادى ءان. جاڭاجىلدىق ەرتەڭگىلىككە دايىنداعان ءبيىمىز. 1,5 اي بويى قىزدارمەن كىم قاي جەردە تۇرادى، كىم كىمنەن كەيىن شىعادى، ءبيدىڭ قوزعالىستارىن قايتالاپ، جاتتىقتىق. ءوزىم بۇرىن مۇلدە بيلەمەگەنمىن. ءبىراق بالالارمەن جۇمىس ىستەگەسىن ءبارىن ءبىلۋىڭ كەرەك. قازىر بىرگە ءان دە جاتتايمىز، بيلەيمىز دە. ال جۇمىس ءساتىنىڭ الەۋمەتتىك جەلىگە تاراعانىن انام ايتىپ، كورسەتتى. تاڭ قالعانىم راس. وقىرماندار ءالى دە قولداۋ كورسەتىپ جاتىر.

-بۇل ماماندىققا قالاي كەلىپ ءجۇرسىز؟

- بالا كەزىمنەن مۇعالىم بولۋدى ارماندادىم. كەيىن م. جۇمابايەۆ اتىنداعى جوعارى كوللەدجدى مۋزىكا ءپانىنىڭ مۇعالىمى ماماندىعى بويىنشا ءبىتىردىم. دومبىرادا، فورتەپيانودا وينايمىن. اپكەم دە ۇستاز. قازاق ءتىلى جانە ادەبيەتى ءپانىنىڭ مۇعالىمى بولىپ ەڭبەك ەتەدى.

Мамандығыңды жақсы көрсең, алынбайтын қамал жоқ – Сағыныш Назкенов
Фото: Кейіпкердің жеке мұрағатынан

- بۇلدىرشىندەرمەن جۇمىس ىستەگەن قيىن ەمەس پە؟ بۇل جۇمىستىڭ ەرەكشەلىگى نەدە؟

- بالاباقشادا جۇمىس ىستەپ جاتقانىما بيىل ەكىنشى جىل. از-مۇز تاجىريبەم بار. جاقسى ۇجىمعا ءتۇستىم، ارىپتەستەرىم ۇنەمى قولداپ، اقىل-كەڭەستەرىن ايامايدى. ەڭ باستىسى - ماعان بالالارمەن جۇمىس ىستەگەن ۇنايدى. ال ىستەگەن ءىسىڭ ۇناعاندا ەشقانداي قيىندىق كەدەرگى بولا المايدى.

مەكتەپكە دەيىنگى كەزەڭدە تاربيەنىڭ نەگىزى قالانادى، ياعني مۋزىكاعا دەگەن قىزىعۋشىلىقتى وياتىپ، شىعارماشىلىق قابىلەتتەرىن دامىتۋعا مىندەتتىمىز. ساباقتا ءان ايتۋ داعدىلارىن دامىتامىز، مۋزىكالىق مادەنيەتتى ۇيرەنەمىز.

مەرەكەلەرگە دايىندىق كوپ ۋاقىتتى الادى. ءبىراق، مەنىڭ ويىمشا، وسىنداي دايىندىقتار، جاڭا ءان، بي ۇيرەنۋ بالالارعا ۇنايدى. ءبىر توپتا جيىرما شاقتى بالا بار. جۇمىس ىستەۋ وڭاي ەمەس، الايدا تاربيەشىلەر ۇلكەن كومەك كورسەتەدى.

- قىزىقتى وقيعالار ءجيى بولىپ تۇراتىن شىعار؟

- ارينە، ەركەلەيدى. ءبىرى جاڭالىعىمەن بولىسكىسى كەلەدى، ەندى ءبىرى ءان ايتقىسى كەلمەي، وينايدى. ۇيالشاق بالالار بار. ءارقايسىسىنىڭ ءتىلىن تابۋعا تىرىسامىن.

-كوللەدجدى سىزبەن بىرگە نەشە جىگىت ءبىتىردى، ولار ماماندىق بويىنشا جۇمىس ىستەپ جاتىر ما؟

- توپتا قىزداردىڭ اراسىندا جەتى جىگىت بولدىق، قازىر سولاردىڭ مەنەن باسقا ەكەۋى عانا ماماندىق بويىنشا جۇمىس ىستەپ جاتىر. كوپشىلىگى باسقا سالاعا كەتتى، وقۋىن ءارى قاراي جالعاستىرعاندار بار. ال مەن بۇل سالادا جۇمىسىمدى جالعاستىرامىن، بولاشاعىمدى تەك وسى ماماندىقپەن كورەمىن.

بۇعان دەيىن شەتەلدىك فيلمدەرگە قازاقشا دۋبلياج جاساپ جۇرگەن پەتروپاۆلدىق بويجەتكەن تۋرالى جازعان ەدىك.

اۆتور

اقەركە داۋرەنبەك قىزى

سوڭعى جاڭالىقتار