بالا كوپ نارسەنى ويىن ارقىلى ۇيرەنەدى: اسحات ايماعامبەتوۆ بالا تاربيەسى تۋرالى
ءماجىلىس دەپۋتاتى اسحات ايماعامبەتوۆ جۋرناليست ايگەرىم سەيفوللانىڭ Youtube ارناسىنا بەرگەن سۇحباتىندا بالا تاربيەسى جايلى ايتتى، دەپ حابارلايدى قازاقپارات ءتىلشىسى.
«ۇل بالاعا دا، قىز بالاعا دا اكە تاربيەسىن كورۋدىڭ ۇلكەن، ەرەكشە ماڭىزى بار. ارينە، انانىڭ دا، اكەنىڭ دە ورنى بولەك. ۇلدىڭ دا، قىزدىڭ دا اكە مەن انا تاربيەسىن كورۋى، بىردەي قامقورلىعىنا بولەنۋى، ماحابباتىن بىردەي سەزىنۋ، تاربيەسىن تەڭ كورۋ ەرتەڭگى كۇنگى بولاشاعى جارقىن، باسەكەگە قابىلەتتى، ارى قاراي دامۋى ءۇشىن وتە ماڭىزدى. ارينە، اكە بولعاننان كەيىن جاقسى اكە بولۋعا تىرىسامىن. اكە بولۋ ادامعا تۋا بىتە قالىپتاساتىن قاسيەت ەمەس. تۋعاندا اكە بولىپ تۋمايمىز. ونى ءوزىمىز ۇيرەنەمىز. اكە بولۋ - ەڭ ءبىرىنشى كەزەكتە وزىڭمەن جۇمىس ىستەۋ. ءبىرىنشىسى - نە ايتاسىڭ، ەكىنشىسى - ۇيدە نە ىستەيسىڭ؟ «ۇيادا نە كورسە، ۇشقاندا سونى» ىلەدى دەگەن ءسوز بار»، - دەدى دەپۋتات.
ونىڭ اتاپ وتۋىنشە، ءوزىڭنىڭ كۇندەلىك جاقسى ءىس-ارەكەتىڭ بالاعا دۇرىس ءتالىم-تاربيە بەرۋگە بولادى.
«ءبىز كوبىنە تاريبەنى ۇيرەتۋ، اقپارات بەرۋ رەتىندە قابىلدايمىز. ءبىراق، مەنىڭ ويىمشا بۇل دۇرىس ەمەس. ويتكەنى، بالا سەنىڭ كۇندەلىكتى نە ىستەپ جۇرگەنىڭدى قارايدى. ءوزىڭنىڭ اتا-اناڭمەن، باۋىرلارىڭمەن قانداي قارىم-قاتىناسىڭ بار، ولارمەن قالاي سويلەسەسىڭ؟ دۇكەندە، ايالدامادا تۇرعاندا، اۆتوبۋسقا مىنگەندە، الدە ءبىر جەرگە بارعاندا كەزەكتە تۇرىپ، كۇتەسىڭ بە؟ رۋلدە كەلە جاتقانداعى ءىس-ارەكەتىڭ قانداي بولادى. ۇيدە تاماق ىشكەننەن، كىتاپ وقىعاننان، تەلەديدار كورگەننەن باستاپ ءوزىڭ ءمان بەرە بەرمەيتىن ءىس-ارەكەتىڭ - مىنە وسى تاربيە. كىم بالاسىن جامان بولسىن دەيدى. بارلىعىمىز «مىنانى جاساما، ۇيات بولادى» دەيمىز. ءبىراق، ايتۋ ءبىر ماسەلە، ال كۇندەلىكتى ءىس-ارەكەتىڭمەن ۇلگى-ونەگە كورسەتۋ مۇلدەم باسقا ماسەلە»، - دەدى اسحات ايماعامبەتوۆ.
دەپۋتات جۇمىستان كەيىن ۇيگە كەلگەن سوڭ بالالارىنا قالاي ءتالىم-تاربيە بەرەتىندىگىن ايتتى.
«بالالارعا نە كەرەك؟ بالالار اكەسىمەن، اناسىمەن ويناعىسى كەلەدى. بالالارمەن ويناۋ، سويلەسۋ قاجەت. بۇل رەتتە سەنىڭ ءوزىڭنىڭ نە ويناعىڭ كەلەتىندى ويناۋ ەمەس. بالانىڭ جاس ەرەكشەلىگىن، كوڭىل-كۇيىن، ىنتاسىن ءتۇسىنىپ، ءتىلىن تابا ءبىلۋ كەرەك. اندا-ساندا ارقاڭا ءمىنىپ الادى، ات بولاسىڭ. كونسترۋكتور قۇراستىرىپ، ەرتەگى وقىپ بەرەسىڭ، تىعىلىسپاق، مۇمكىن فۋتبول وينايسىڭ. ول بالانىڭ كوڭىل-كۇيىنە بايلانىستى. بالامەن ويناۋ وتە ماڭىزدى. بالانىڭ ەڭ باستى ءىس-ارەكەتى - بۇل ويىن. بالا ويناۋ كەرەك. بالا كوپ نارسەنى ويىن ارقىلى ۇيرەنەدى»، - دەدى ول.
